તાપી જિલ્લામાં ભારે વરસાદની સંભાવના વચ્ચે વહીવટી તંત્ર દ્વારા સાવચેતીના પગલાં તેજ કરવામાં આવ્યા છે. રેડ એલર્ટની સ્થિતિને ધ્યાનમાં રાખીને આરોગ્ય વિભાગે પણ આગોતરી તૈયારી હાથ ધરી હતી, જેમાં પ્રસૂતિની સંભવિત તારીખ નજીક હોય તેવી 20 સગર્ભા મહિલાઓને સમયસર ઓળખી સુરક્ષિત આરોગ્ય કેન્દ્રોમાં ખસેડવામાં આવી હતી. આ નિર્ણયથી વરસાદી પરિસ્થિતિમાં માતા અને બાળકને તાત્કાલિક તબીબી સુવિધા મળી રહે તે સુનિશ્ચિત કરવામાં આવ્યું છે.
તાપી જિલ્લામાં ભારે વરસાદની આગાહીને પગલે આરોગ્ય ટીમો દ્વારા વિવિધ વિસ્તારોમાં ઘર-ઘર જઈને સગર્ભા મહિલાઓની તપાસ કરવામાં આવી હતી. જે મહિલાઓની પ્રસૂતિ નજીક હતી તેમને કોઈપણ કટોકટી સમયે મુશ્કેલી ન સર્જાય તે માટે નજીકના આરોગ્ય કેન્દ્રોમાં શિફ્ટ કરવામાં આવી હતી.
આ કામગીરી અંતર્ગત વાલોડ, વેલધા, ખેરવાડા, ગડત અને બોરદા સહિતના આરોગ્ય કેન્દ્રોમાં સગર્ભા માતાઓને સુરક્ષિત રીતે પહોંચાડવામાં આવી હતી. અત્યાર સુધીમાં કુલ 20 મહિલાઓને પ્રાથમિક આરોગ્ય કેન્દ્ર (PHC), સામૂહિક આરોગ્ય કેન્દ્ર (CHC) તેમજ સબ-ડિવિઝનલ હોસ્પિટલ ખાતે ખસેડવામાં આવી છે.
આરોગ્ય વિભાગ દ્વારા વરસાદી પરિસ્થિતિ દરમિયાન માતા અને નવજાત શિશુના આરોગ્યની સુરક્ષા માટે સતત દેખરેખ રાખવામાં આવી રહી છે. તંત્રએ લોકોને પણ વરસાદ દરમિયાન સતર્ક રહેવા અને જરૂરી સૂચનાઓનું પાલન કરવા અપીલ કરી છે.
