તાપી જિલ્લામાં આજે સવારે માત્ર બે કલાકના ગાળામાં વરસાદે જોરદાર હાજરી નોંધાવતા અનેક તાલુકાઓમાં જનજીવન પર તેની અસર જોવા મળી છે. 10થી 12 વાગ્યા દરમિયાન વ્યારા તાલુકામાં સૌથી વધુ 50 મિમી વરસાદ નોંધાયો હતો. ત્યારબાદ ડોલવણમાં 48 મિમી અને વાલોડમાં 44 મિમી વરસાદ વરસતા નીચાણવાળા વિસ્તારોમાં પાણી ભરાવાની સ્થિતિ સર્જાઈ હતી. છેલ્લા કેટલાક દિવસોથી દક્ષિણ ગુજરાતમાં સક્રિય બનેલી વરસાદી સિસ્ટમ વચ્ચે તાપી જિલ્લામાં પણ સતત વરસાદી માહોલ યથાવત રહ્યો છે.
સત્તાવાર વરસાદના આંકડા મુજબ નિઝર તાલુકામાં 25 મિમી, ઉચ્છલમાં 18 મિમી, ઉકાઈમાં 16 મિમી, સોનગઢમાં 15 મિમી અને કૂકરમુંડામાં 8 મિમી વરસાદ નોંધાયો હતો. વરસાદના કારણે ગ્રામ્ય વિસ્તારોમાં નાના નાળા અને ખાળાઓમાં પાણીની આવક વધી છે, જ્યારે કેટલાક માર્ગો પર પાણી ભરાતા વાહનચાલકોને સાવચેતી રાખવાની ફરજ પડી હતી.
સતત વરસાદને પગલે ખેતી માટે અનુકૂળ સ્થિતિ સર્જાઈ છે અને ખેડૂતોમાં ખુશીનો માહોલ જોવા મળી રહ્યો છે. બીજી તરફ જિલ્લા વહીવટીતંત્ર દ્વારા નદી-નાળા અને નીચાણવાળા વિસ્તારોમાં રહેતા લોકોને સાવચેત રહેવાની અપીલ કરવામાં આવી છે. જો આગામી કલાકોમાં વરસાદની તીવ્રતા યથાવત રહેશે તો જળાશયો અને નદીઓમાં પાણીની આવકમાં વધુ વધારો થવાની શક્યતા વ્યક્ત કરવામાં આવી રહી છે.
