ગુજરાતમાં ચોમાસું ફરી એકવાર આક્રમક બનવાના સંકેતો મળી રહ્યા છે. ભારતીય હવામાન વિભાગ (IMD) દ્વારા જાહેર કરાયેલી નવી આગાહી મુજબ 31 જુલાઈ, શુક્રવારે રાજ્યના અનેક જિલ્લાઓમાં ભારેથી અતિભારે વરસાદ, જ્યારે કેટલાક વિસ્તારોમાં અત્યંત ભારે વરસાદ વરસવાની શક્યતા વ્યક્ત કરવામાં આવી છે. હવામાન વિભાગે સંભવિત ભારે વરસાદને ધ્યાનમાં રાખીને લોકોને સતર્ક રહેવા અને બિનજરૂરી મુસાફરી ટાળવાની અપીલ કરી છે.
દક્ષિણ ગુજરાતમાં સુરત, નવસારી, વલસાડ, ડાંગ, તાપી, ભરૂચ અને નર્મદા જિલ્લામાં વરસાદ સૌથી વધુ અસરકારક રહેવાની સંભાવના છે. ખાસ કરીને નર્મદા જિલ્લામાં કેટલાક સ્થળોએ અત્યંત ભારે વરસાદ નોંધાઈ શકે છે. નીચાણવાળા વિસ્તારોમાં પાણી ભરાવા, નદી-નાળાઓમાં જળસ્તર વધવા અને સ્થાનિક સ્તરે જળબંબાકાર જેવી સ્થિતિ સર્જાવાની શક્યતા નકારી શકાય નહીં.
મધ્ય ગુજરાતમાં અમદાવાદ, ગાંધીનગર, વડોદરા, આણંદ, ખેડા, પંચમહાલ, દાહોદ, મહીસાગર અને છોટાઉદેપુર જિલ્લામાં પણ ભારે વરસાદની આગાહી કરવામાં આવી છે. વરસાદ સાથે 40થી 50 કિમી પ્રતિ કલાકની ઝડપે પવન અને વીજળીના કડાકા પડવાની સંભાવના હોવાથી નાગરિકોને ખુલ્લા વિસ્તારોમાં ન જવાની સલાહ આપવામાં આવી છે.
ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા અને અરવલ્લી જિલ્લામાં પણ ભારે વરસાદની સંભાવના છે. જ્યારે સૌરાષ્ટ્ર-કચ્છમાં રાજકોટ, સુરેન્દ્રનગર, ભાવનગર, બોટાદ, મોરબી, જામનગર, પોરબંદર, જૂનાગઢ, દેવભૂમિ દ્વારકા, ગીર સોમનાથ અને કચ્છ જિલ્લામાં પણ મેઘરાજા જોરદાર બેટિંગ કરી શકે છે.
