ગુજરાત ATSને આંતરરાષ્ટ્રીય ડ્રગ્સ નેટવર્ક સામેની કાર્યવાહીમાં મોટી સફળતા મળી છે. અંડરવર્લ્ડ ડોન દાઉદ ઇબ્રાહિમનો નજીકનો સાગરિત મનાતો અને આંતરરાષ્ટ્રીય ડ્રગ્સ માફિયા સલીમ ઇસ્માઇલ ડોલાની કસ્ટડી ગુજરાત ATSએ મેળવી છે. વર્ષ 2022ના વડોદરાના સિંધરોટ ડ્રગ્સ કેસમાં સલીમ ડોલા લાંબા સમયથી વોન્ટેડ હતો.
સિંધરોટમાં MD ડ્રગ્સ બનાવતી ફેક્ટરી ઝડપાઈ હતી
વર્ષ 2022માં ગુજરાત ATSએ બાતમીના આધારે વડોદરાના સિંધરોટ ગામમાં દરોડો પાડ્યો હતો. આ કાર્યવાહી દરમિયાન ગેરકાયદેસર રીતે મેફેડ્રોન (MD) ડ્રગ્સ બનાવતી ફેક્ટરીનો પર્દાફાશ થયો હતો. દરોડા દરમિયાન સ્થળ પરથી 87.728 કિલોગ્રામ MD ડ્રગ્સનો જથ્થો જપ્ત કરવામાં આવ્યો હતો. આંતરરાષ્ટ્રીય બજારમાં આ જથ્થાની કિંમત કરોડો રૂપિયાની આંકવામાં આવી હતી.
આ કેસમાં અનેક આરોપીઓની ધરપકડ કરવામાં આવી હતી, પરંતુ ડ્રગ્સ નેટવર્કનો મુખ્ય આરોપી સલીમ ડોલા તપાસ એજન્સીઓની પકડથી દૂર રહ્યો હતો.
રેડ કોર્નર નોટિસ બાદ ATSને સફળતા
સલીમ ડોલાને ઝડપી પાડવા માટે ગુજરાત ATSએ ઇન્ટરપોલની મદદથી રેડ કોર્નર નોટિસ જારી કરાવી હતી. લાંબી તપાસ અને કાનૂની પ્રક્રિયા બાદ હવે અન્ય એજન્સીઓના સહયોગથી તેની કસ્ટડી મેળવવામાં સફળતા મળી છે. સલીમ ડોલાની પૂછપરછ દરમિયાન ડ્રગ્સ સિન્ડિકેટના આંતરરાષ્ટ્રીય નેટવર્ક, નાણાકીય વ્યવહારો અને અન્ય સંભવિત સાગરિતો અંગે મહત્વપૂર્ણ વિગતો બહાર આવે તેવી શક્યતા છે.
