‘વંદે માતરમ’ને લઈને સંસદમાં મોટો નિર્ણય લેવામાં આવ્યો છે. ગઈકાલે રાજ્યસભામાં પસાર થયેલું ‘Prevention of Insults to National Honour (Amendment) Bill, 2026’ આજે લોકસભામાં પણ મંજૂર થઈ ગયું છે. આ સાથે રાષ્ટ્રીય ગીત ‘વંદે માતરમ’ને રાષ્ટ્રગીત ‘જન ગણ મન’ સમાન કાનૂની રક્ષણ આપવાનો માર્ગ ખુલ્યો છે.
હવે આ બિલ કાયદો બનવા માટે રાષ્ટ્રપતિની મંજૂરી માટે મોકલવામાં આવશે. મંજૂરી મળ્યા બાદ ‘વંદે માતરમ’ના અપમાન અથવા તેના ગાનમાં વિક્ષેપ જેવા મામલાઓ સામે પણ કાયદાકીય કાર્યવાહીનો માર્ગ ખુલશે.
આ સુધારા દ્વારા Prevention of Insults to National Honour Act, 1971માં ફેરફાર કરવામાં આવશે. હાલમાં આ કાયદા હેઠળ રાષ્ટ્રીય ધ્વજ, બંધારણ અને રાષ્ટ્રગીતના અપમાન સામે કાર્યવાહી કરવાની જોગવાઈ છે. નવા સુધારા બાદ રાષ્ટ્રીય ગીત ‘વંદે માતરમ’ને પણ આ જ સુરક્ષા હેઠળ લાવવામાં આવશે.
સરકારનું કહેવું છે કે ‘વંદે માતરમ’ ભારતના સ્વતંત્રતા સંગ્રામનું પ્રતીક રહ્યું છે અને તેને રાષ્ટ્રીય સન્માન સાથે જોડાયેલી સમાન કાનૂની સુરક્ષા મળવી જોઈએ.
