ભારતીય ક્રિકેટના પૂર્વ કેપ્ટન મહેન્દ્ર સિંહ ધોની ફરી એકવાર પોતાના બાઇક પ્રેમને કારણે ચર્ચામાં આવ્યા છે. ચેન્નઈના મદ્રાસ ઇન્ટરનેશનલ સર્કિટ (MIC) પર ધોનીને KTM 390 Duke ચલાવતા જોતા જ તેમના વીડિયો અને તસવીરો સોશિયલ મીડિયા પર ઝડપથી વાયરલ થઈ રહ્યા છે. ક્રિકેટના મેદાન બાદ હવે રેસિંગ ટ્રેક પર ધોનીનો આત્મવિશ્વાસભર્યો અંદાજ ચાહકોને ખૂબ જ પસંદ આવી રહ્યો છે અને બાઇકિંગ પ્રેમીઓમાં પણ આ દૃશ્ય ચર્ચાનો વિષય બન્યું છે.
વાયરલ વીડિયોમાં ધોની ટ્રેક પર અનેક લેપ પૂર્ણ કર્યા બાદ પિટ લેનમાં પરત ફરતા જોવા મળે છે. બાઇક્સ પ્રત્યેનો તેમનો શોખ કોઈ નવી વાત નથી. તેમના ગેરેજમાં વિવિધ પ્રીમિયમ અને હાઈ-પરફોર્મન્સ મોટરસાઇકલ્સનો વિશાળ કલેક્શન છે અને તેઓ સમયાંતરે ટ્રેક રાઇડિંગનો આનંદ લેતા રહે છે.
ધોની જે KTM 390 Duke ચલાવતા જોવા મળ્યા, તે તેની શાર્પ હેન્ડલિંગ અને શક્તિશાળી પરફોર્મન્સ માટે જાણીતી નેકેડ સ્પોર્ટ્સ બાઇક છે. ભારતીય બજારમાં ઉપલબ્ધ મોડેલમાં અંદાજે 350cc એન્જિન આપવામાં આવ્યું છે, જે લગભગ 41 hp પાવર અને 33.5 Nm ટોર્ક ઉત્પન્ન કરે છે. તેની પ્રારંભિક એક્સ-શોરૂમ કિંમત લગભગ ₹2.84 લાખથી શરૂ થાય છે.
આ બાઇકમાં 5-ઇંચ TFT ડિસ્પ્લે, સ્માર્ટફોન કનેક્ટિવિટી, ત્રણ રાઇડિંગ મોડ્સ, બાય-ડાયરેક્શનલ ક્વિકશિફ્ટર, કોર્નરિંગ ABS, ટ્રેક્શન કંટ્રોલ, લોન્ચ કંટ્રોલ અને ક્રૂઝ કંટ્રોલ જેવા આધુનિક ફીચર્સ આપવામાં આવ્યા છે. તેના હળવા વજન અને ટ્રેક-ફ્રેન્ડલી સેટઅપને કારણે KTM 390 Dukeને ઉત્સાહી રાઇડર્સ માટે લોકપ્રિય પસંદગી માનવામાં આવે છે.
