ગ્લાસગો કોમનવેલ્થ ગેમ્સમાં મેડલ જીત્યા બાદ ઉજવણીના માહોલમાં ભારતના નકશામાંથી પૂર્વોત્તર ગાયબ જોવા મળતાં બોક્સર લવલીના બોરગોહેનએ અવાજ ઉઠાવ્યો હતો. એક નાની લાગતી ભૂલ સામે તેમણે જે રીતે અવાજ ઉઠાવ્યો, તેની હવે વડાપ્રધાન નરેન્દ્ર મોદીએ પણ પ્રશંસા કરી છે. મોદીએ લવલીનાના આ પગલાને સામાન્ય ઘટના નહીં ગણાવી અને કહ્યું કે આ ક્ષણ લાંબા સમય સુધી યાદ રહેશે.
ગ્લાસગો કોમનવેલ્થ ગેમ્સ-2026માં મેડલ જીતનારા ભારતીય ખેલાડીઓ સાથે મુલાકાત દરમિયાન વડાપ્રધાન મોદીએ લવલીના સાથે આ ઘટનાનો ઉલ્લેખ કર્યો હતો. તેમણે પૂછ્યું કે રેસ્ટોરન્ટમાં શું થયું હતું. તેના જવાબમાં લવલીનાએ જણાવ્યું કે ઉજવણી દરમિયાન રેસ્ટોરન્ટમાં ભારતનો એક અધૂરો નકશો નજરે પડ્યો હતો, જેમાં પૂર્વોત્તર ભારતનો ભાગ દર્શાવવામાં આવ્યો ન હતો.
આ જોઈને આસામની બોક્સર લવલીનાએ રેસ્ટોરન્ટ મેનેજર સમક્ષ શાંતિપૂર્વક પોતાની નારાજગી વ્યક્ત કરી હતી. તેમણે સ્પષ્ટ કર્યું હતું કે પૂર્વોત્તર ભારતનો અભિન્ન હિસ્સો છે અને નકશામાં તેનો અભાવ તેમને દુઃખદ લાગ્યો હતો. તેમના વિરોધ બાદ રેસ્ટોરન્ટ તરફથી નકશો સુધારવાની ખાતરી આપવામાં આવી હતી.
મોદીએ લવલીનાના આ વલણની પ્રશંસા કરતાં કહ્યું કે ઉજવણીના સમયે પણ તેમણે આ મુદ્દાની ગંભીરતા સમજી અને અવાજ ઉઠાવ્યો હતો. તેમણે લવલીનાના વીડિયોનો ઉલ્લેખ કરીને કહ્યું કે “એ વીડિયો સામાન્ય નહોતો” અને આ ઘટના લોકોને લાંબા સમય સુધી યાદ રહેશે.
લવલીના બોરગોહેને 75 કિલોગ્રામ વર્ગમાં સિલ્વર મેડલ જીતીને ભારતનું ગૌરવ વધાર્યું હતું. ગ્લાસગોમાં શરૂઆતથી જ તેઓ ભારતીય ટીમની મહત્વપૂર્ણ ખેલાડી રહી હતી.
