તમિલનાડુની રાજનીતિમાં અભિનેત્રી ત્રિશા કૃષ્ણનના નામે શરૂ થયેલો વિવાદ હવે કાનૂની અને રાજકીય ટકરાવમાં ફેરવાયો છે. ડીએમકેના નેતા અને વિપક્ષના નેતા ઉધયનિધિ સ્ટાલિનને તેમના એક જાહેર ભાષણ દરમિયાન કરવામાં આવેલી કથિત ટિપ્પણીને લઈને પોલીસે કસ્ટડીમાં લીધા બાદ સમગ્ર રાજ્યમાં રાજકીય ગરમાવો વધી ગયો છે. આ મામલે અભિનેત્રીના નામનો ઉલ્લેખ અને કથિત દ્વિઅર્થી નિવેદનને લઈને ટીવીકે એ કડક વિરોધ નોંધાવ્યો છે.
અહેવાલો મુજબ, થંજાવુરમાં કાવેરી જળ વિવાદ મુદ્દે યોજાયેલી જાહેર સભા દરમિયાન ભીડમાંથી “ત્રિશા, ત્રિશા”ના નારા લાગ્યા હતા. તે દરમિયાન ઉધયનિધિ સ્ટાલિને આપેલા જવાબને ટીવીકેએ મહિલાનું અપમાન કરતી અને દ્વિઅર્થી ટિપ્પણી ગણાવી છે. આ મુદ્દે ટીવીકેના મહિલા મોરચાની નેતા એસ. બૈરવીએ થંજાવુર પૂર્વ પોલીસ સ્ટેશનમાં ફરિયાદ નોંધાવી હતી. સાથે જ પાર્ટીના રાષ્ટ્રીય પ્રવક્તા પઝા સેલ્વકુમારે રાષ્ટ્રીય મહિલા આયોગ (NCW) સમક્ષ પણ ફરિયાદ કરી છે.
ટીવીકેએ આરોપ લગાવ્યો છે કે ડીએમકે અને તેની આઈટી વિંગે આ ઘટનાનો વીડિયો સોશિયલ મીડિયા પર પ્રસારિત કરીને મહિલાઓની પ્રતિષ્ઠાને ઠેસ પહોંચાડી છે. ટીવીકેના નેતાઓએ આ ઘટનાને “અત્યંત શરમજનક” ગણાવી ડીએમકેની રાજકીય સંસ્કૃતિ પર સવાલ ઉઠાવ્યા છે. બીજી તરફ ભાજપના રાજ્ય નેતાઓએ પણ ઉધયનિધિ સ્ટાલિન સામે કડક કાર્યવાહી કરવાની માંગ કરી છે.
જોકે, ડીએમકેએ તમામ આરોપોને નકારી કાઢ્યા છે. પાર્ટીના વરિષ્ઠ નેતા ટી.આર. બાલુએ સ્પષ્ટ કહ્યું કે ઉધયનિધિ સ્ટાલિને કોઈ વ્યક્તિ કે અભિનેત્રીનું નામ લઈને અપમાનજનક ટિપ્પણી કરી નથી અને તેમના નિવેદનને ખોટી રીતે રજૂ કરવામાં આવી રહ્યું છે. હાલ સમગ્ર મામલે પોલીસ તપાસ ચાલુ છે અને ફરિયાદોના આધારે આગળની કાનૂની કાર્યવાહી કરવામાં આવી રહી છે.
