તહેવારોની સિઝનમાં સુરતનું કાપડ માર્કેટ ધમધમી ઉઠે છે, પરંતુ દિવાળીની આ ઘરાકીમાં તમારો નફો અને મૂડી ક્યાંક ગઠિયાઓના ખિસ્સામાં ન જતાં રહે તે માટે સાવધાન થવાનો સમય આવી ગયો છે. મોટી કમાણીની લ્હાયમાં ઉતાવળિયો વેપાર કરતા પહેલાં ચેતી જજો, કારણ કે સુરતના કાપડ માર્કેટમાં છેતરપિંડીના વધતા કિસ્સાઓને લઈને ફેડરેશન ઓફ સુરત ટેક્સટાઈલ એસોસિએશન્સ (FOSTTA) દ્વારા એક અત્યંત મહત્વની એડવાઈઝરી જારી કરવામાં આવી છે. જો તમે પણ કાપડના વેપાર સાથે સંકળાયેલા છો, તો આ માહિતી તમારા વ્યાપારને લાખોના નુકસાનથી બચાવી શકે છે.
ફોસ્ટા દ્વારા સ્પષ્ટ તાકીદ કરવામાં આવી છે કે નવા વેપારીઓ કે દલાલો (એજન્ટ) સાથે કામ કરતી વખતે માત્ર તેમના મૌખિક રેફરન્સ કે ઓળખાણ પર આંધળો વિશ્વાસ ન કરવો. કોઈની પણ સાથે મોટો આર્થિક વ્યવહાર કરતા પહેલાં રૂબરૂ જઈને ફિઝિકલ વેરિફિકેશન (સ્થળ તપાસ) કરવું અનિવાર્ય છે. સુરક્ષિત વેપાર માટે ટેકનોલોજીનો ઉપયોગ કરી ‘FOSTTA FORUM’ એપ્લિકેશનમાં નવા વેપારીનો GST નંબર અથવા મોબાઈલ નંબર નાખીને તેમનો રેકોર્ડ ચેક કરી લેવા સલાહ અપાઈ છે. આનાથી તે વેપારી અગાઉ કોઈ પેમેન્ટ કૌભાંડ કે ચીટિંગમાં સંડોવાયેલ છે કે કેમ તેનો સચોટ તાગ મેળવી શકાશે.
ફોસ્ટાના પ્રમુખ હંસરાજ જૈન અને મહામંત્રી દિનેશ કટારિયાના જણાવ્યા અનુસાર, તાજેતરની ફરિયાદોમાં એવું સામે આવ્યું છે કે કેટલાક લેભાગુ તત્વો નવા GST નંબર અને ભાડાની દુકાનોનો સહારો લઈ છેતરપિંડી આચરી રહ્યા છે. જોકે દરેક નવો વેપારી કે ભાડુઆત ખોટો નથી હોતો, પરંતુ માલ આપતા પહેલાં તેમના દસ્તાવેજો અને ધંધાકીય સરનામાની સઘન ચકાસણી કરવી ખૂબ જરૂરી છે. દિવાળીની આ સીઝનમાં કોઈપણ મોટા નુકસાનથી બચવા અને હાર્ડ-અર્ન્ડ મની સુરક્ષિત રાખવા તમામ વેપારીઓને મહત્તમ સાવધાની રાખવા અપીલ કરવામાં આવી છે.
