ગાંધીજીએ આપેલો અહિંસાનો સંદેશ શું આજે માત્ર પુસ્તકો પૂરતો સીમિત રહી ગયો છે? મહાત્મા ગાંધીની જન્મજયંતિના પાવન અવસરે, જ્યાં સમગ્ર દેશ ‘અહિંસા પરમો ધર્મ’ના પાઠ યાદ કરી રહ્યો છે, ત્યાં જ સુરતમાં અહિંસાના રક્ષણ માટે હજારો લોકોએ રસ્તા પર ઉતરવું પડ્યું!આજે સુરતમાં ગેરકાયદે કતલખાનાઓના વિરોધમાં 5,000થી વધુ સાધુ-સંતો અને નાગરિકોએ ‘અહિંસા માર્ચ’ કાઢીને તંત્રને સ્પષ્ટ સંદેશ આપ્યો છે કે, અબોલ જીવોની હત્યા હવે સાંખી લેવામાં નહીં આવે.
આજે સવારે ઉમરા સ્થિત સરગમ શોપિંગ સેન્ટરથી શરૂ થયેલી આ ભવ્ય અને શાંતિપૂર્ણ રેલી શહેરના મુખ્ય માર્ગો પરથી પસાર થઈને કલેક્ટર કચેરી સુધી પહોંચી હતી. આ માર્ચમાં જૈન સાધ્વીજી ભગવંતો, વિવિધ સંપ્રદાયના સાધુ-સંતો, સામાજિક સંગઠનોના અગ્રણીઓ અને જીવદયા પ્રેમીઓ બહોળી સંખ્યામાં જોડાયા હતા. હાથમાં અહિંસાના બેનરો અને ગૌરક્ષાના નારાઓ સાથે કલેક્ટર કચેરીએ પહોંચેલી આ વિશાળ જનમેદનીએ વહીવટીતંત્રને ઢંઢોળવાનો ભગીરથ પ્રયાસ કર્યો છે.
રેલીના સમાપન બાદ પ્રતિનિધિ મંડળ દ્વારા જિલ્લા કલેક્ટરને એક વિસ્તૃત આવેદનપત્ર પાઠવવામાં આવ્યું હતું. આવેદનપત્રમાં સ્પષ્ટ આક્ષેપ કરવામાં આવ્યો છે કે, સુરત શહેર અને તેની આસપાસના વિસ્તારોમાં અનેક ગેરકાયદે કતલખાનાઓ બેરોકટોક ધમધમી રહ્યા છે. ગાંધી જયંતીના પવિત્ર દિવસે પણ આવા કતલખાનાઓ અહિંસાના મૂલ્યોની ખુલ્લેઆમ મજાક ઉડાવી રહ્યા છે. જીવદયા પ્રેમીઓ અને સંતોએ માંગ કરી છે કે તંત્ર દ્વારા સત્વરે પોલીસ તપાસ હાથ ધરીને આ તમામ ગેરકાયદે પ્રવૃત્તિઓ પર કાયમી પ્રતિબંધ મૂકવામાં આવે.
આ ઉપરાંત, રેલીનો મુખ્ય અને સૌથી મહત્વનો ઉદ્દેશ્ય ગૌવંશનું રક્ષણ કરવાનો પણ હતો. ઉપસ્થિત સાધુ-સંતોએ ગૌમાતાને કાનૂની રક્ષણ પૂરું પાડવા અને તેમને સત્વરે ‘રાષ્ટ્રમાતા’ જાહેર કરવાની પ્રબળ માંગ દોહરાવી હતી. વહીવટીતંત્રને કડક શબ્દોમાં ચેતવણી આપતા સંતોએ જણાવ્યું હતું કે, જો આગામી દિવસોમાં આ ગેરકાયદે ચાલતા કતલખાનાઓ સામે નક્કર અને કડક કાનૂની પગલાં લેવામાં નહીં આવે, તો આ આંદોલન વધુ ઉગ્ર બનશે અને ગાંધી ચીંધ્યા માર્ગે રાજ્યવ્યાપી સ્તરે મોટા પાયે વિરોધ પ્રદર્શનો શરૂ કરવામાં આવશે. સુરતમાં યોજાયેલી આ અહિંસા માર્ચ એક તરફ અહિંસાના સિદ્ધાંતને જમીન પર ઉતારવાનો સરાહનીય પ્રયાસ છે, તો બીજી તરફ વહીવટીતંત્રની નિષ્ક્રિયતા સામે આમ જનતાનો આક્રોશ પણ છતો કરે છે.
