જમ્મુ-કાશ્મીરના કિશ્તવાડ જિલ્લામાં પોલીસે આતંકવાદીઓ સામે મોટી કાર્યવાહી કરતા સૈફુલ્લાહ ગ્રુપ સાથે જોડાયેલા બે કથિત ઓવરગ્રાઉન્ડ વર્કર્સ (OGWs)ની ધરપકડ કરી છે. પોલીસના જણાવ્યા મુજબ બંને આરોપીઓ વિદેશી આતંકવાદીઓને મદદ પહોંચાડવા અને તેમને સુરક્ષિત ઠેકાણા ઉપલબ્ધ કરાવવામાં સામેલ હતા. સમગ્ર આતંકી નેટવર્કને ખતમ કરવા માટે સતત અભિયાન ચલાવવામાં આવી રહ્યું હોવાનું પોલીસે જણાવ્યું છે.

પોલીસે માહિતી આપી કે સિંહપોરા-ચતરું વિસ્તારમાં ચલાવવામાં આવેલા વિશેષ ઓપરેશન દરમિયાન આ કાર્યવાહી હાથ ધરવામાં આવી હતી. આ મામલે FIR નોંધવામાં આવી છે અને આરોપીઓ સામે ભારતીય ન્યાય સંહિતા (BNS)ની વિવિધ કલમો ઉપરાંત UAPA અને આર્મ્સ એક્ટ હેઠળ પણ ગુનાઓ દાખલ કરવામાં આવ્યા છે. પોલીસના જણાવ્યા મુજબ ધરપકડ કરાયેલા આરોપીઓ આતંકવાદીઓને દરેક પ્રકારની મદદ પહોંચાડી રહ્યા હતા.

કિશ્તવાડના SSPએ જણાવ્યું કે તપાસ અને ગુપ્તચર માહિતીના આધારે પોલીસે મશ્કૂર અહમદની ધરપકડ કરી હતી. મશ્કૂર અહમદ મોહમ્મદ રમઝાનનો પુત્ર છે અને સિંહપોરાના બેઘપોરા વિસ્તારનો રહેવાસી છે. તે શાળા શિક્ષણ વિભાગમાં શિક્ષક તરીકે ફરજ બજાવતો હતો. પોલીસના જણાવ્યા મુજબ તે આતંકવાદીઓ માટે સુરક્ષિત ઠેકાણા તૈયાર કરાવવા અને તેમને સહકાર આપવા સીધો સંકળાયેલો હતો.

પોલીસનું કહેવું છે કે મશ્કૂર અહમદની ધરપકડ બાદ આતંકવાદીઓને મળતું મહત્વપૂર્ણ લોજિસ્ટિક સપોર્ટ નબળું પડ્યું છે. તપાસ દરમિયાન એ પણ સામે આવ્યું છે કે આરોપી લાંબા સમયથી આતંકી નેટવર્કના સંપર્કમાં હતો. હવે પોલીસે તેના અન્ય સાથીદારો અને સંપર્કોની તપાસ પણ શરૂ કરી છે, જેથી સમગ્ર મોડ્યુલનો પર્દાફાશ કરી શકાય.

આ પહેલા આ જ કેસમાં મનીર અહમદ નામના બીજા એક આરોપીની પણ ધરપકડ કરવામાં આવી હતી. મનીર અહમદ બાંદેયાન નૈડગામ વિસ્તારનો રહેવાસી છે. પોલીસના જણાવ્યા મુજબ તેના પર પણ વિદેશી આતંકવાદીઓને મદદ કરવાનો અને તેમને સુરક્ષિત સહયોગ પૂરો પાડવાનો આરોપ છે. બંને આરોપીઓની પૂછપરછના આધારે આગળની કાર્યવાહી હાથ ધરવામાં આવી રહી છે.

નવસારી જિલ્લાના જલાલપોર તાલુકાના મગોબ ભાઠા ગામ નજીક આજે ઈન્ડિગો કંપની સાથે સંકળાયેલા એક હેલિકોપ્ટરનું ઇમરજન્સી લેન્ડિંગ કરવું પડ્યું હતું. ઉડાન દરમિયાન અચાનક ટેકનિકલ સમસ્યા ઉભી થતાં પાયલોટે સાવચેતીના ભાગરૂપે હેલિકોપ્ટરને ખુલ્લા મેદાનમાં સુરક્ષિત રીતે ઉતારવાનો નિર્ણય લીધો હતો.

ઉડાન દરમિયાન ટેકનિકલ ખામી જણાતા પાયલોટે તાત્કાલિક પરિસ્થિતિ પર કાબૂ મેળવી નજીકના વિસ્તારને પસંદ કરી સલામત લેન્ડિંગ કર્યું હતું. બંને પાયલોટની સતર્કતા અને સમયસૂચકતાને કારણે મોટી દુર્ઘટના ટળી હોવાનું માનવામાં આવી રહ્યું છે.

હેલિકોપ્ટર અચાનક ગામ નજીક ઉતરતાં સ્થાનિક લોકોમાં ઉત્સુકતા સાથે થોડો ભયનો માહોલ પણ સર્જાયો હતો. ઘટનાની જાણ થતાં જ મરોલી પોલીસની ટીમ તાત્કાલિક સ્થળ પર પહોંચી હતી અને આસપાસ સુરક્ષા વ્યવસ્થા ગોઠવી હતી, જેથી લોકોની ભીડને નિયંત્રિત કરી શકાય.

સદનસીબે આ ઘટનામાં કોઈ જાનહાનિ કે ઇજાના સમાચાર સામે આવ્યા નથી. હાલ ટેકનિકલ નિષ્ણાતોની ટીમ હેલિકોપ્ટરમાં આવેલી ખામીનું ચોક્કસ કારણ શોધવા માટે તપાસ કરી રહી છે. પ્રાથમિક તપાસમાં ટેકનિકલ ફોલ્ટને કારણે ઇમરજન્સી લેન્ડિંગ કરાયું હોવાનું સામે આવ્યું છે.

સમાજવાદી પાર્ટીના સ્થાપક મુલાયમ સિંહ યાદવના નાના પુત્ર અને અખિલેશ યાદવના ભાઈ પ્રતીક યાદવનું 38 વર્ષની વયે નિધન થયું છે. પ્રતીક યાદવ એક પ્રભાવશાળી રાજકીય પરિવારમાંથી આવતા હોવા છતાં તેમણે હંમેશા રાજકારણથી દૂરી જાળવી રાખી હતી. મીડિયા રિપોર્ટસ અનુસાર લંડનની લીડ્સ યુનિવર્સિટીમાંથી MBA કરનાર પ્રતીકે રિયલ એસ્ટેટ અને ફિટનેસ ક્ષેત્રમાં પોતાની કારકિર્દી બનાવી હતી.

મીડિયા અહેવાલ અનુસાર પ્રતીક યાદવની કુલ સંપત્તિ કરોડોમાં હોવાનો અંદાજ છે. રિયલ એસ્ટેટ વ્યવસાયમાં તેમની અંદાજિત સંપત્તિ 6-7 કરોડ આંકવામાં આવી હતી. આ ઉપરાંત, લખનૌમાં હાઈ-પ્રોફાઈલ જીમ અને ફિટનેસ સેન્ટર્સ દ્વારા પણ તેઓ મોટી કમાણી કરતા હતા. જો કે તેઓ લક્ઝરી કારના શોખીન હતા અને તેમની પાસે 5 કરોડની કિંમતની લેમ્બોર્ગિની સહિત રેન્જ રોવર જેવી ગાડીઓનું શાનદાર કલેક્શન પણ હતું.

પ્રતીક યાદવ રિયલ એસ્ટેટ અને જીમ વ્યવસાયની સાથે લકઝરી કારના શોખીન હતા. તેમની પાસે કાર કલેક્શનમાં આશરે ₹5 કરોડની કિંમતની લેમ્બોર્ગિની શામેલ છે તે વાત પરથી જ અંદાજ લગાવી શકાય છે. વધુમાં જણાવીએ તો પ્રતીક યાદવના કાર કલેકશનમાં રેન્જ રોવર્સથી લઈને ટોયોટા ફોર્ચ્યુનર્સ સુધીની લક્ઝરી કારનો સમાવેશ થાય છે. તેઓ કાર રેસિંગનો પણ શોખીન હતા.

ઉલ્લેખનીય છે કે એક અગ્રણી રાજકીય પરિવાર સાથેના સંબંધો હોવા છતાં, પ્રતીક યાદવે હંમેશા પોતાને રાજકારણથી દૂર રાખ્યા છે. તેમણે પોતે એક ઇન્ટરવ્યુમાં કહ્યું હતું કે તેઓ શક્ય હોય ત્યાં સુધી રાજકારણમાં પ્રવેશ કરશે નહીં. આ જ કારણ છે કે, સમાજવાદી પરિવારમાંથી હોવા છતાં, તેમણે અત્યાર સુધી કોઈ ચૂંટણી લડી નથી. પ્રતીક યાદવે લંડનની લીડ્સ યુનિવર્સિટીમાંથી MBA ની ડિગ્રી મેળવી અને રાજકારણથી દૂર રહીને GIF, ફિટનેસ અને રિયલ એસ્ટેટ ક્ષેત્રોમાં કારકિર્દી બનાવી હતી