કેન્દ્ર સરકારની ‘મેક-ઇન-ઇન્ડિયા’ અને SEZ નીતિઓનો દુરુપયોગ કરીને સુરતમાં કરોડો રૂપિયાનું મની લોન્ડરિંગ અને હવાલા કૌભાંડ ચલાવવામાં આવતું હોવાનો મોટો પર્દાફાશ થયો છે. DRIની વાપી ટીમે સુરત SEZમાં કાર્યરત એક જવેલર્સ ફર્મ સાથે જોડાયેલા કેસમાં મુખ્ય આરોપી મોન્ટુ હર્ષદ ગાંધીની ધરપકડ કરી છે. પ્રાથમિક તપાસ મુજબ સમગ્ર કૌભાંડનો આંક અંદાજે 2,000 કરોડ રૂપિયા સુધી પહોંચે છે.
તપાસ દરમિયાન સામે આવ્યું છે કે વિદેશમાંથી નીચી ગુણવત્તાવાળા હીરાની આયાત કરવામાં આવતી હતી અને ત્યારબાદ તેની કિંમત કાગળ પર અસલી મૂલ્ય કરતાં અનેકગણી વધારે દર્શાવીને એક્સપોર્ટ કરવામાં આવતો હતો. આ રીતે હીરાની ઓવર વેલ્યુએશન કરીને કસ્ટમ ડ્યુટીમાં ગેરરીતિ કરવામાં આવતી હતી તેમજ સરકારી સબસિડી અને અન્ય આર્થિક લાભો મેળવવામાં આવતા હતા. અધિકારીઓના જણાવ્યા અનુસાર હીરાની કિંમત વાસ્તવિક મૂલ્ય કરતાં લગભગ 50 ગણી વધારે બતાવવામાં આવતી હતી.
DRIની પૂછપરછમાં ખુલાસો થયો કે મોન્ટુ ગાંધી ડમી પાર્ટનર્સના નામે અનેક પેઢીઓ ચલાવતો હતો અને પોતે પડદા પાછળ રહી સમગ્ર નાણાકીય વ્યવહાર સંભાળતો હતો. વિદેશી ખરીદદારો સાથેના સોદા અને ટ્રાન્ઝેક્શનનું સંચાલન પણ તે જ કરતો હોવાનું સામે આવ્યું છે. લાંબા સમયથી નજર રાખ્યા બાદ DRIએ ડિજિટલ પુરાવાના આધારે તેની ધરપકડ કરી હતી.
આરોપીને બાદમાં સુરત કોર્ટમાં રજૂ કરવામાં આવ્યો હતો, જ્યાં અદાલતે તેને ત્રણ દિવસના રિમાન્ડ પર મોકલવાનો આદેશ આપ્યો છે. સમગ્ર મામલે વધુ તપાસ ચાલુ છે અને આગામી દિવસોમાં વધુ ખુલાસા થવાની શક્યતા વ્યક્ત કરવામાં આવી રહી છે.
