સુરત શહેરમાં પડી રહેલી કાળઝાળ ગરમી હવે શ્રમજીવીઓ માટે જીવલેણ સાબિત થઈ રહી છે. સુરતના સચિન GIDC વિસ્તારમાં કામ કરી રહેલા એક 28 વર્ષીય યુવકનું અચાનક બેભાન થઈને ઢળી પડ્યા બાદ કમકમાટીભર્યું મોત નીપજ્યું છે. પ્રાથમિક રીતે યુવકનું મોત હીટ સ્ટ્રોકને કારણે થયું હોવાનું માનવામાં આવે છે.
ભાઈની નજર સામે જ ઢળી પડ્યો યુવક
આ ઘટના અંગે મૃતકના ભાઈ કુંદન કુમારે જણાવ્યું હતું કે, તેઓ સચિન કનસાડ રોડ પર ગયા હતા, જે રસ્તો એકદમ સૂમસામ છે અને ત્યાં લોકોની અવરજવર બહુ ઓછી હોય છે. અનુજ કુમાર ત્યાં રિપેરિંગ મશીન ચલાવતો હતો અને તે જ સમયે અસહ્ય ગરમીને કારણે તે અચાનક રસ્તા પર જ બેભાન થઈને ઢળી પડ્યો હતો.
ભાઈની નજર સામે જ જમીન પર પટકાયેલા યુવકને તાત્કાલિક સારવાર માટે નજીકની હોસ્પિટલ લઈ જવામાં આવ્યો હતો. કમનસીબે ફરજ પર હાજર તબીબે તેને તપાસીને મૃત જાહેર કર્યો હતો. પ્રાપ્ત વિગતો અનુસાર, મૂળ બિહારના ગોપાલગંજનો વતની 28 વર્ષીય અનુજ કુમાર રોજગારી અર્થે સુરત આવ્યો હતો, અને સચિન સ્થિત કંસાડ વિસ્તારમાં કામ કરતો હતો.
અનુજ કુમાર પોતાના પરિવાર માટે કમાનાર એકમાત્ર મુખ્ય વ્યક્તિ અને આધાર સ્તંભ હતો. તે સુરતમાં રહીને રીપેરીંગ મશીન ચલાવીને જે પણ કમાણી કરતો તે પોતાના વતન બિહાર ઘરે મોકલતો હતો. કાળઝાળ ગરમીએ એક ઝાટકે પરિવારનો માળો વિખેરી નાખતા મૃતક યુવકના પરિવારજનો ભારે શોકમાં ગરકાવ થઈ ગયા છે.
સુરત પોલીસ દ્વારા તપાસનો ધમધમાટ શરૂ
કાળઝાળ ગરમીમાં રસ્તા પર સતત કામ કરવાના કારણે યુવકને હીટ સ્ટ્રોકની અસર થઈ હોવાનું પ્રાથમિક દ્રષ્ટિએ સ્પષ્ટ જણાઈ રહ્યું છે. તેમ છતાં, સુરત પોલીસે આ અકાળે મોત પાછળ અન્ય કોઈ કારણ જવાબદાર છે કે કેમ તે જાણવા માટે કાયદેસરની તપાસ પણ શરૂ કરી દીધી છે. ઉલ્લેખનીય છે કે, રાજ્યમાં ગરમીનો પ્રકોપ વધી રહ્યો છે. ત્યારે બપોરના સમયે ખુલ્લામાં કામ કરતા લોકોએ ખાસ તકેદારી રાખવી જરૂરી બની ગઈ છે.
