સુરતનાં મોરાભાગળ-રાંદેર વિસ્તાર સ્થિત લાઈફલાઈન મલ્ટી સ્પેશ્યાલિટી હોસ્પિટલનાં નામે નોંધાઈ અનોખી સિદ્ધિ. ગુજરાત રાજ્યનાં માનનીય ઉપમુખ્યમંત્રી શ્રી હર્ષ સંઘવી તથા ધારાસભ્ય મુકેશ પટેલના હસ્તે વર્લ્ડ રેકોર્ડનાં પ્રમાણપત્ર અને મેડલ એનાયત કરાયાં
સુરતનાં મોરાભાગળ-રાંદેર રોડ પર આવેલી લાઈફલાઈન મલ્ટીસ્પેશ્યાલિટી હોસ્પિટલનાં ડિરેક્ટર અને કન્સલ્ટન્ટ જનરલ લેપ્રોસ્કોપિક તેમજ ગેસ્ટ્રોઈન્ટેસ્ટાઈનલ સર્જન ડૉ. નૈનેશ પટેલ અને તેમની સર્જિકલ ટીમે તબીબી ક્ષેત્રે એક અદભુત અને ઐતિહાસિક સિદ્ધિ હાંસલ કરી છે. તેમના દ્વારા એક જ દર્દીનાં શરીરમાંથી એક જ સર્જરી દરમિયાન સૌથી વધુ સોફ્ટ-ટિશ્યૂ ટ્યુમર્સ (લિપોમા) સફળતાપૂર્વક દૂર કરવાનો નવો વર્લ્ડ રેકોર્ડ બનાવવામાં આવ્યો છે. ઓગસ્ટ- 2025માં કરવામાં આવેલી આ અત્યંત જટિલ સર્જરી દરમિયાન ડૉ. નૈનેશ પટેલ અને તેમની ટીમે સતત 7 કલાક સુધી સફળ ઓપરેશન કરીને દર્દીના શરીરમાંથી કુલ 370 લિપોમા બહાર કાઢ્યાં હતાં.
આ અસાધારણ સફળતા અને તબીબી ક્ષેત્રે મેળવેલ સિદ્ધિને ‘વર્લ્ડ રેકોર્ડ્સ ઈન્ડિયા’ World Records India) દ્વારા 20 જુલાઈ, 2026નાં રોજ આધિકારીક રીતે નવા વર્લ્ડ રેકોર્ડ તરીકે માન્યતા આપવામાં આવી છે. આ વર્લ્ડ રેકોર્ડનું સત્તાવાર પ્રમાણપત્ર ગુજરાત રાજ્યનાં માનનીય ઉપમુખ્યમંત્રી હર્ષ સંઘવી તથા ધારાસભ્ય મુકેશ પટેલનાં હસ્તે ડૉ. નૈનેશ પટેલને એનાયત કરવામાં આવ્યું હતું.
આ સિદ્ધિ અંગે ખુશી વ્યક્ત કરતાં ડૉ. નૈનેશ પટેલે જણાવ્યું હતું કે, 7 કલાક સુધી ચાલેલી આ સર્જરી તબીબી દ્રષ્ટિએ અત્યંત પડકારજનક હતી. પરંતુ દર્દીની સુરક્ષા અને તેને નવી જિંદગી આપવી એ જ અમારો પ્રાથમિક ધ્યેય હતો. માનનીય ઉપમુખ્યમંત્રી શ્રી હર્ષ સંઘવીજી તથા ધારાસભ્ય મુકેશ પટેલનાં હસ્તે આ એવોર્ડ પ્રાપ્ત થવો એ અમારી આખી ટીમ માટે અત્યંત ગૌરવની ક્ષણ છે.
સુરતની તબીબી સેવાઓને વિશ્વ ફલક પર સ્થાન અપાવતી આ સફળતાથી સમગ્ર સુરત શહેર અને તબીબી આલમમાં ખુશીનો માહોલ છે.
