નવી દિલ્હી: દેશની રાજધાની દિલ્હીમાં કોકરોચ જનતા પાર્ટી (CJP) દ્વારા આયોજિત વિરોધ પ્રદર્શન દરમિયાન રાજકીય માહોલ ગરમાયો છે. જંતર-મંતર ખાતે યોજાયેલા પ્રદર્શનમાં ભાગ લેવા જઈ રહેલા આમ આદમી પાર્ટીના રાષ્ટ્રીય સંયોજક અરવિંદ કેજરીવાલની દિલ્હી પોલીસે અટકાયત કરી હતી. આ પહેલાં તૃણમૂલ કોંગ્રેસ (TMC)નાં નેતા મમતા બેનર્જીની પણ અટકાયત કરવામાં આવી હોવાના અહેવાલ છે.
જંતર-મંતર પહોંચે તે પહેલાં જ કેજરીવાલની અટકાયત
CJPના વિરોધ પ્રદર્શનને આમ આદમી પાર્ટી અને ડાબેરી પક્ષોએ પણ સમર્થન આપ્યું હતું. અરવિંદ કેજરીવાલ પોતાના નિવાસસ્થાનેથી જંતર-મંતર જવા નીકળ્યા હતા, પરંતુ કાર્યક્રમ સ્થળે પહોંચે તે પહેલાં જ પોલીસે તેમને અટકાયતમાં લીધા હતા. તેમની સાથે AAPના નેતા સૌરભ ભારદ્વાજ સહિત ચાર નેતાઓની અટકાયત કરવામાં આવી હતી. આ દરમિયાન પોલીસ અને AAPના કાર્યકરો વચ્ચે ખેંચતાણ પણ જોવા મળી હતી.
મોઢા પર બેન્ડ-એઇડ લગાવી પહોંચ્યાં મમતા બેનર્જી
વિરોધ પ્રદર્શનમાં ભાગ લેવા મમતા બેનર્જી TMCના નેતાઓ સાથે જંતર-મંતર પહોંચ્યાં હતાં. તેમણે પોતાના મોઢા પર બેન્ડ-એઇડ લગાવી વિરોધ નોંધાવ્યો હતો. જોકે, પોલીસે તેમની પણ તાત્કાલિક અટકાયત કરી હતી. બીજી તરફ ભાજપના મુખ્યાલય નજીક ઓલ ઇન્ડિયા સ્ટુડન્ટ્સ એસોસિએશન (AISA) અને ડાબેરી પક્ષોના કાર્યકરોએ વિરોધ પ્રદર્શન કરતાં પોલીસે અનેક લોકોની અટકાયત કરી હતી.
આકાશવાણી કાર્યાલય નજીક પોલીસ પર પથ્થરમારો
વિરોધ પ્રદર્શન દરમિયાન નવી દિલ્હીના આકાશવાણી કાર્યાલય નજીક પથ્થરમારાની ઘટના પણ સામે આવી હતી. પ્રાથમિક માહિતી મુજબ, આશરે 50 પ્રદર્શનકારીઓ ત્યાં પહોંચ્યા હતા. આ દરમિયાન કેટલાક પ્રદર્શનકારીઓએ પોલીસ પર પથ્થરમારો કર્યો હોવાનો આરોપ છે, જેમાં બે પોલીસકર્મીઓ ઈજાગ્રસ્ત થયા હોવાનું જણાવાયું છે.
દિલ્હીમાં CJPના વિરોધ પ્રદર્શનને પગલે 600થી વધુ લોકોની અટકાયત કરવામાં આવી હોવાનો દાવો કરવામાં આવ્યો છે.
