આસામ વિમાન દુર્ઘટનામાં શહીદ થયેલા બિહારના ફલાઈટ લેફિટનેન્ટ શુભમ કુમારના પરિવાર પર દુખાનો પહાડ તૂટી પડ્યો છે. દીકરો નથી રહ્યો, પણ વહુએ ટાઢા કલેજે વળતરના ૨૧ લાખ રૂપિયા લઈ લીધા અને ગાયબ થઈ ગઈ. મૃતક શુભમ શર્માના પિતા કહે છે કે જો સાચે જ પત્ની હોત તો શ્રાદ્ધકર્મ કરતી. સાથે જ તેમણે આરોપ લગાવ્યો છે કે અમારી સામે લગ્ન નથી થયા, અમે તે બંનેના લગ્ન આવતા નવેમ્બરમાં નક્કી કર્યા હતા. તેમણે ચૂપચાપ કોર્ટ મેરેજ કરી લીધા હતા. તેની અમને કોઈ જાણકારી નથી.

શુભમના પિતા અમરેન્દ્ર શર્માનું કહેવું છે કે પરિવારે શુભમના લગ્ન નવેમ્બરમાં નક્કી કર્યા હતા. હિન્દુ રીતિ-રિવાજથી લગ્નની તૈયારી ચાલી રહી હતી, પણ હવે એક છોકરી શ્રેયા રાય ખુદને શુભમની પત્ની ગણાવી રહી છે, તેને ૨૧ લાખ રૂપિયાના વળતરનો ચેક પણ સોંપી દીધો. અમરેન્દ્ર શર્માનો આરોપ છે કે શ્રેયા રાય અને તેમના પરિવારે તેમને અને તેમના આખા પરિવારથી આ વાત છુપાવી અમદાવાદમાં કોર્ટ મેરેજ કરી લીધા. તેમણે કહ્યું કે, જો વાસ્તવમાં તેમના દીકરાએ લગ્ન કર્યા હતા અને શ્રેયા તેમની વહુ છે તો તેણે પરિવાર સાથે ઊભા રહેવું જોઈતું હતું.

શુભમના પિતાએ કહ્યું કે જો તે સાચે પત્ની છે અને ચેકની હકદાર છે તો તેને તેમના દીકરાના શ્રાદ્ધકર્મ અને અન્ય પારિવારિક દાયિત્વ પણ નિભાવવા જોઈતા હતા. પતિના મોત બાદ પરિવારનું દુખ વહેંચવું જોઈએ. પણ તે ચેક લઈને જતી રહી. શુભમના પિતાએ એવો પણ દાવો કર્યો કે રાજ્ય સરકાર તરફથી મળેલા ૨૧ લાખ રૂપિયાની મદદ વિશે પરિવારને કોઈ જાણકારી નથી. તેમનો આરોપ છે કે ગયામાં અધિકારીઓએ પરિવારની હાજરી વિના શ્રેયા રાયને ચેક સોંપી દીધો. તેમણે કહ્યું કે, જો તે પરિવારની વહુ હતી તો ચેક તેના ઘર પર પરિવાર સામે આપવો જોઈતો હતો. તેમણે આ સમગ્ર પ્રક્રિયા પર સવાલ ઉઠાવતા પ્રશાસનિક અધિકારીઓની ભૂમિકાની તપાસ કરવાની પણ માગ કરી છે.

અમરેન્દ્ર શર્માના જણાવ્યા અનુસાર, શુભમે તેમને ખાલી એટલું જણાવ્યું હતું કે આ છોકરી આઝમગઢની રહેવાસી છે. તેમના પિતા સેનામાં જૂનિયર કમિશન્ડ અધિકારી રહી ચૂક્યા છે. પરિવારને ક્યારેય નથી જણાવ્યું કે બંનેએ કોર્ટ મેરેજ કર્યા છે. તેમણે કહ્યું કે, દીકરાના શહાદત બાદ સામે આવેલા આ વિવાદે પરિવારની મુશ્કેલી વધારી દીધી છે. આપને જણાવી દઈએ કે, ૧૩ જૂનના રોજ આસામના જોરહાટમાં ઈન્ડિયન એરફોર્સનું એક વિમાન ક્રેશ થઈ ગયું હતું. આ દુર્ઘટનામાં બિહારના જહાનાબાદના રહેવાસી ફલાઈટ લેફિટનેન્ટ શુભમ કુમાર શહીદ થઈ ગયા હતા. સરકાર તરફથી પીડિતની પત્નીને વળતર આપવામાં આવ્યું છે, આ વાતને લઈ હવે વિવાદ થઈ રહ્યો છે.

ભારતમાં સોના પ્રત્યે લોકોનો આકર્ષણ અને ક્રેઝ સદીઓ જૂનો છે. પરંતુ અત્યાર સુધી ભારતે પોતાની સોનાની મોટાભાગની જરૂરિયાતો પૂરી કરવા માટે વિદેશી આયાત પર નિર્ભર રહેવું પડતું હતું. આ દરમિયાન દેશના અર્થતંત્ર અને નાગરિકો માટે દક્ષિણ ભારતના આંધ્રપ્રદેશ રાજ્યમાંથી એક અત્યંત પ્રોત્સાહક અને ઐતિહાસિક સમાચાર સામે આવ્યા છે. આંધ્રપ્રદેશના કુર્નૂલ જિલ્લામાં અંદાજે 50 ટન સોનાનો એક વિશાળ ભંડાર મળી આવ્યો છે. વન વિભાગ અને ખાણકામ ક્ષેત્રના નિષ્ણાતોના મતે આ શોધ ભારતનું ભાગ્ય બદલી શકે છે.

આંધ્રપ્રદેશ બનશે દેશનું સૌથી મોટું ગોલ્ડ ડબ
ભૂસ્તરશાસ્ત્રીઓ અને ખાણ વિભાગના વરિષ્ઠ અધિકારીઓના જણાવ્યા અનુસાર, આ ઐતિહાસિક શોધ બાદ આગામી કેટલાક વર્ષોમાં આંધ્રપ્રદેશ દેશમાં સોનાના સૌથી મોટા ઉત્પાદક અને સપ્લાયર રાજ્ય તરીકે ઉભરી આવશે. હાલમાં ભારતમાં કર્ણાટક સોનાના ઉત્પાદનમાં અગ્રેસર છે, પરંતુ કુર્નૂલના આ ભંડારના સંપૂર્ણ ઉત્ખનન બાદ આંધ્રપ્રદેશ મોખરે પહોંચી જશે. આ અનામત ભંડાર મળવાથી માત્ર સ્થાનિક સ્તરે રોજગારીની તકો જ નહીં વધે, પરંતુ વિદેશમાંથી મોંઘા ભાવે થતી સોનાની આયાત પર ભારતની નિર્ભરતા ઘણી હદ સુધી ઘટી જશે, જેનાથી દેશનું વિદેશી હૂંડિયામણ પણ બચશે.

અન્ય ચાર વિસ્તારોમાં પણ સોનાની ખાણની શોધ
આંધ્રપ્રદેશના ખાણ વિભાગના અગ્ર સચિવ મુકેશ કુમાર મીનાએ એક પત્રકાર પરિષદ દરમિયાન આ ઐતિહાસિક સફળતાની સત્તાવાર પુષ્ટિ કરી છે. તેમણે ગર્વપૂર્વક જણાવ્યું કે વિભાગે કુર્નૂલ જિલ્લાના માત્ર જોન્નાગીરી વિસ્તારમાં જ નહીં, પરંતુ રાજ્યના અન્ય ચાર સંભવિત વિસ્તારોમાં પણ સોનાની ખાણકામ માટેની સાઇટ્સની ઓળખ કરી લીધી છે. જીઓલોજિકલ સર્વેમાં જે અન્ય મહત્વના સ્થળો સામે આવ્યા છે તેમાં રામાગીરી, જાવાવકુલા અને ચિગુરુકુંતા બિસ્નાટ્ટમનો સમાવેશ થાય છે. આ તમામ સ્થળોએ પણ આગામી સમયમાં સંશોધન અને ઉત્ખનનની કામગીરી હાથ ધરવામાં આવશે.

અર્થતંત્ર અને ઝવેરી બજાર પર સકારાત્મક અસર
અત્યાર સુધી ભારત વાર્ષિક સેંકડો ટન સોનું સ્વિટ્ઝર્લેન્ડ, સંયુક્ત આરબ અમીરાત (UAE) અને અન્ય દેશોમાંથી આયાત કરે છે, જેને કારણે દેશની ચાલુ ખાતાની ખાધ પર દબાણ રહે છે.

ભારતમાં જ આટલો મોટો સોનાનો સ્ત્રોત મળી આવતા લાંબા ગાળે સ્થાનિક બજારમાં સોનાના ભાવો સ્થિર રાખવામાં અને જ્વેલરી ઉદ્યોગને વેગ આપવામાં મોટી મદદ મળશે. સરકાર હવે આ સાઈટ્સ પર આધુનિક ટેકનોલોજીની મદદથી ઝડપથી ખાણકામ શરૂ કરવા માટેની યોજનાઓ ઘડી રહી છે, જેથી વહેલી તકે આ સોનાનો ઉપયોગ દેશના વિકાસમાં થઈ શકે.

પટનાના મુસલ્લહપુર હાટ વિસ્તારમાં આવેલી ખાન ગ્લોબલ સ્ટડીઝ સંસ્થામાં 2 જૂનની રાત્રે થયેલા હંગામા અને કથિત ફાયરિંગ કેસમાં પટના સિવિલ કોર્ટે શનિવારે ફૈઝલ ખાન ઉર્ફે ખાન સરને ફરી એકવાર મોટી રાહત આપી છે. કોર્ટે તેમની ધરપકડ પર લગાવેલી રોકને આગામી આદેશ સુધી યથાવત રાખવાનો નિર્દેશ આપ્યો છે.

બંને પક્ષોની દલીલો સાંભળ્યા બાદ અદાલતે ફૈઝલ ખાન ઉર્ફે ખાન સરને મળેલું વચગાળાનું રક્ષણ (ઇન્ટરિમ પ્રોટેક્શન) ચાલુ રાખવાનો નિર્ણય કર્યો હતો. હવે આ કેસની આગામી સુનાવણી 25 જૂને યોજાશે. સુનાવણી દરમિયાન પોલીસે ખાન સર અને તેમના બે ખાનગી સુરક્ષા ગાર્ડ સંબંધિત અપડેટેડ કેસ ડાયરી પણ કોર્ટ સમક્ષ રજૂ કરી હતી.

FIRમાં ફૈઝલ ખાનનું નામ સામેલ
2 જૂનની રાત્રે ખાન સરની કોચિંગ સંસ્થા બહાર થયેલા હંગામા દરમિયાન તેમના બે સુરક્ષા ગાર્ડ પર બે-બે રાઉન્ડ ફાયરિંગ કરવાનો આરોપ મૂકવામાં આવ્યો હતો. પોલીસે આ મામલે બંને ગાર્ડની ધરપકડ કરીને તેમને જેલમાં મોકલી દીધા હતા. ફરિયાદીઓનો આરોપ છે કે ગાર્ડોએ આ ફાયરિંગ ફૈઝલ ખાનના નિર્દેશ પર કર્યું હતું. જેના આધારે પોલીસે નોંધાયેલી FIRમાં ફૈઝલ ખાનનું નામ પણ સામેલ કર્યું હતું.

આ કેસમાં જ્ઞાન બિંદુ GS એકેડમીના ડિરેક્ટર રોશન આનંદની પણ પટના પોલીસે ધરપકડ કરી હતી. જોકે, બાદમાં કોર્ટના આદેશ બાદ તેમને જામીન પર મુક્ત કરવામાં આવ્યા હતા.

રોશન આનંદ અને ફૈઝલ ખાન વચ્ચેનો વિવાદ
રોશન આનંદ અને ફૈઝલ ખાન વચ્ચેનો વિવાદ ત્યારે વધુ ઉગ્ર બન્યો હતો જ્યારે રોશન આનંદના ભાઈ પ્રિન્સ યાદવનું નેપાળમાં મૃત્યુ થયું હતું.

રોશન આનંદે આ મામલે ફૈઝલ ખાન ઉર્ફે ખાન સર પર ગંભીર આક્ષેપો કરતાં જણાવ્યું હતું કે તેમના ભાઈની હત્યાનું કાવતરું ફૈઝલ ખાને જ રચ્યું હતું. તેમણે આ અંગે પટનાના કદમકુઆં પોલીસ સ્ટેશનમાં ફરિયાદ નોંધાવવાનો પ્રયાસ પણ કર્યો હતો, પરંતુ પોલીસે તેમની FIR સ્વીકારવાનો ઇનકાર કર્યો હતો. બીજી તરફ, ફૈઝલ ખાને એક વીડિયો જાહેર કરીને પ્રિન્સ યાદવના મૃત્યુમાં પોતાની કોઈપણ પ્રકારની સંડોવણી હોવાનો સ્પષ્ટ ઇનકાર કર્યો છે.