ગુજરાતમાં ટ્રફ, શિયર ઝોન, અપર એર સાયક્લોનિક સર્ક્યુલેશન, સીઝનલ ટ્રફ અને લો-પ્રેશર સહિતની વરસાદી સિસ્ટમો એકસાથે સક્રિય થતાં ચોમાસું જોર પકડી રહ્યું છે. જેના કારણે મેઘરાજાએ ધમાકેદાર બેટિંગની શરૂઆત કરી દીધી છે. સૌરાષ્ટ્રના અને દક્ષિણ ગુજરાતમાં વરસાદમનમુકીને વરસી રહ્યો છે. સાંબેલાધાર વરસાદથી જનજીવન પ્રભાવિત થયું છે. રાજ્યમાં છેલ્લા 24 કલાકમાં 225 તાલુકામાં વરસાદ વરસ્યો હતો. જૂનાગઢના માંગરોળમાં સૌથી વધુ 22.24 ઇંચ વરસાદ ખાબક્યો હતો. માળીયા હાટીનામાં 14 ઇંચ, મેંદરડા અને કેશોદમાં 13-13 ઇંચ જેટલો વરસાદ વરસ્યો હતો. જૂનાગઢ જિલ્લામાં કુલ 60 ઇંચથી વધુ વરસાદ પડતાં ચારેબાજુ જળબંબાકારની સ્થિતિ સર્જાઈ હતી.

ક્યાં કેટલો વરસાદ
સ્ટેટ ઈમરજન્સી ઑપરેશન સેન્ટર, ગાંધીનગર મુજબ આજે સવારે 6 વાગે પૂરા થયેલા 24 કલાકમાં 225 તાલુકામાં વરસાદ વરસ્યો છે. એક તાલુકામાં 22 ઇંચથી વધારે, ચાર તાલુકામાં 13 ઇંચથી વધારે, બે તાલુકામાં 12 ઇંચથી વધારે, એક તાલુકામાં 11 ઇંચથી વધારે, ચાર તાલુકામાં 9ઇંચથી વધારે, ત્રણ તાલુકામાં 8 ઇંચથી વધારે, એક તાલુકામાં 7 ઇંચથી વધારે, એક તાલુકામાં 6 ઇંચથી વધારે, ચાર તાલુકામાં 5 ઇંચથી વધારે, સાત તાલુકામાં 4 ઇંચથી વધારે, 11 તાલુકામાં 3 ઇંચથી વધારે, 22 તાલુકામાં 2 ઇંચથી વધારે, 45 તાલુકામાં 1 ઇંચથી વધારે તથા 117 તાલુકામાં 1 ઇંચથી ઓછો વરસાદ વરસ્યો હતો.

માંગરોળમાં 22 ઇંચથી જળબંબાકાર
માંગરોળમાં 22.24 ઇંચ, માળીયા હાટીનામાં 14.09 ઇંચ, વઘઈમાં 13.43 ઇંચ, સુબીરમાં 13.23 ઇંચ, અંબિકામાં 13.19 ઇંચ, કેશોદમાં 12.8 ઇંચ, મેંદરડામાં 12.56 ઇંચ, ડોલવણમાં 11.65 ઇંચ, વાંસદામાં 9.8 ઇંચ, ચીખલીમાં 9.61 ઇંચ, વાલોદમાં 9.17 ઇંચ, ડાંગમાં 9.09 ઇંચ, પાટણ વેરાવળમાં 8.5 ઇંચ, ગણદેવીમાં 8.39 ઇંચ, વલસાડમાં 8.15 ઇંચ, વ્યારામાં 7.24 ઇંચ, ખેરગામમાં 6.61 ઇંચ, ધોરાજીમાં 5.94 ઇંચ, માંગરોળ(સુરત)માં 5.89 ઇંચ, મહુવા(સુરત)માં 5.79 ઇંચ, પાટણમાં 5.12 ઇંચ, માંડવીમાં 5 ઇંચ, સરસ્વતીમાં 4.96 ઇંચ, બારડોલીમાં 4.61 ઇંચ, કપરાડામાં 4.33 ઇંચ, નાનાપોંઢામાં 4.25 ઇંચ, સૂત્રાપાડામાં 4.25 ઇંચ, કડીમાં 4.17 ઇંચ, હાલોલમાં 4.06 ઇંચ, વંથલીમાં 3.98 ઇંચ, ધરમપુરમાં 3.98 ઇંચ, જોટાણામાં 3.9 ઇંચ, ધંધુકામાં 3.78 ઇંચ, કામરેજમાં 3.7 ઇંચ, પારડીમાં 3.7 ઇંચ, વાલિયામાં 3.5 ઇંચ, ઉમરપાડામાં 3.43 ઇંચ, પલસાણામાં 3.43 ઇંચ, કાલોલમાં 3.11 ઇંચ, વાપીમાં 3.11 ઇંચ, હાંસોટમાં 2.95 ઇંચ, નવસારીમાં 2.91 ઇંચ, જલાલપોરમાં 2.87 ઇંચ, સોનગઢમાં 2.87 ઇંચ,જેતપુરમાં 2.8 ઇંચ, અંકલેશ્વરમાં 2.72 ઇંચ, ઉપલેટામાં 2.64 ઇંચ, વિરપુરમાં 2.6 ઇંચ, ખાનપુરમાં 2.56 ઇંચ, નડીયાદમાં 2.52 ઇંચ વરસાદ વરસ્યો હતો.

આજે ક્યાં છે વરસાદની આગાહી
હવામાન વિભાગ દ્વારા આજે રાજ્યમાં સાર્વત્રિક વરસાદની આગાહી કરવામાં આવી છે. ભાવનગર, સુરત, તાપી, નવસારી, ડાંગ, દમણ, વલસાડ, દાદરા અને નગર હવેલીમાં અત્યંત ભારે વરસાદનું રેડ એલર્ટ આપવામાં આવ્યું છે. જ્યારે જૂનાગઢ, અમરેલી, ગીર-સોમનાથ, દીવ, ભરૂચ, વડોદરા, નર્મદા, છોટા ઉદેપુર, દાહોદમાં ભારેથી અતિભારે વરસાદનું ઓરેન્જ એલર્ટ આપ્યું છે. ઉપરાંત પોરબંદ, રાજકોટ, બોટાદ, આણંદ, પંચમહાલ, મહીસાગરમાં યલો એલર્ટ જાહેર કરવામાં આવ્યું છે.

રાજ્યમાં ચોમાસું જામ્યુ છે, હવામાન વિભાગ દ્વારા સમગ્ર ગુજરાતમાં આગામી ત્રણ કલાક માટે હળવાથી લઈને અતિભારે વરસાદની ભારે આગાહી વ્યક્ત કરવામાં આવી છે. આ મોસમી ફેરફાર પવનની તીવ્ર ગતિ અને વાતાવરણમાં સર્જાયેલા ભારે દબાણના કારણે સર્જાયો છે. આજે સવારથી જ દક્ષિણ ગુજરાત અને સૌરાષ્ટ્રના વિવિધ જિલ્લાઓ તેમજ કેન્દ્રશાસિત પ્રદેશોમાં કુદરતી આફત જેવી સ્થિતિનું નિર્માણ થયું છે.

હવામાન વિભાગના અહેવાલ અનુસાર, દરિયાકાંઠાના વિસ્તારોમાં પ્રચંડ વેગે પવન ફૂંકાવા સાથે ગાજવીજ અને તીવ્ર વરસાદી સિસ્ટમ સક્રિય થવાને લીધે વ્યાપક નુકસાનની આશંકા સેવાઈ રહી છે, જેને પગલે વહીવટી તંત્રને સાબદું કરી દેવામાં આવ્યું છે.

હવામાન વિભાગ અનુસાર, આગામી ત્રણ કલાકમાં દક્ષિણ ગુજરાતના નવસારી અને વલસાડ જિલ્લાઓમાં આકાશમાં વીજળીના ભયાનક કડાકા-ભડાકા સાથે તોફાની વરસાદ ત્રાટકશે. આ દરમિયાન પવનની ગતિ સામાન્ય કરતાં ઘણી વધારે એટલે કે 62 થી 87 કિલોમીટર પ્રતિ કલાકની પ્રચંડ ઝડપે ફૂંકાવાની શક્યતા છે, જે વાવાઝોડાનું સ્વરૂપ ધારણ કરી શકે છે. આ ઉપરાંત કેન્દ્રશાસિત પ્રદેશ દાદરાનગર હવેલી અને દમણમાં પણ મુશળધારથી અતિભારે વરસાદની સંભાવના વ્યક્ત કરવામાં આવી છે.

બીજી તરફ, સૌરાષ્ટ્ર અને તેની આસપાસના વિસ્તારોમાં પણ મેઘરાજા રૌદ્ર સ્વરૂપ ધારણ કરશે. અમરેલી, ભાવનગર અને ગીર સોમનાથમાં ભારે પવન સાથે વરસાદી માહોલ જામશે. જ્યારે જુનાગઢ, સુરત, તાપી અને ડાંગ જિલ્લામાં મધ્યમથી હળવો વરસાદ પડવાની સંભાવના છે. કેન્દ્રશાસિત પ્રદેશ દીવમાં પણ ગાજવીજ સાથે મધ્યમ વરસાદની આગાહી છે, જ્યાં પવનની ગતિ 41 થી 61 કિલોમીટર પ્રતિ કલાકની રહેવાનો અંદાજ છે. ખરાબ હવામાનને જોતા નાગરિકોને બિનજરૂરી બહાર ન નીકળવા અને માછીમારોને દરિયો ન ખેડવાની કડક સૂચના આપવામાં આવી છે.

રાજ્યના સૌથી વનાચ્છાદિત અને આદિવાસી વિસ્તાર એવા ડાંગ જિલ્લામાં મેઘરાજા ધમાકેદાર બેટિંગ કરી રહ્યા છે. સતત વરસી રહેલા વરસાદને કારણે સમગ્ર જિલ્લામાં જનજીવન પ્રભાવિત બન્યું છે. ભારે વરસાદને પગલે અનેક માર્ગો બંધ થઈ ગયા છે, જ્યારે વહીવટી તંત્ર સંપૂર્ણ સતર્ક બનીને પરિસ્થિતિ પર સતત નજર રાખી રહ્યું છે.

જિલ્લા ડિઝાસ્ટર કંટ્રોલ રૂમ દ્વારા જાહેર કરાયેલી માહિતી મુજબ, આજે તા. 3 જુલાઈ, 2026ના રોજ સવારે 6 વાગ્યાથી બપોરે 12 વાગ્યા સુધીના માત્ર 6 કલાકમાં જિલ્લામાં સરેરાશ 165 મિ.મી. વરસાદ નોંધાયો છે. આ સાથે ચાલુ ચોમાસાની કુલ વરસાદની સરેરાશ 340.33 મિ.મી. સુધી પહોંચી ગઈ છે.

ડાંગ જિલ્લામા સાર્વત્રિક વરસાદ વરસી રહ્યો છે. આજે 8 કલાકમાં આહવા તાલુકામાં 7.47 ઈંચ, વઘઈ તાલુકામાં સૌથી વધુ 12.94 ઈંચ, સાપુતારામાં 7.71 ઇંચ અને સુબીર તાલુકામાં 6.37 ઈંચ વરસાદ નોંધયો છે. આ વરસાદને પગલે આજે બપોરે ૧૨ વાગ્યા સુધીમાં જિલ્લાના 28 જેટલા માર્ગો વરસાદી પાણી ભરાતા બંધ કરાયા છે. વરસાદ પડવા સાથે ડાંગમાં વનરાજી મહોરી ઉઠી છે, ત્યારે સહેલાણીઓ નદી, નાળા, કોતરો, જળધોધ, ખીણ પ્રદેશ, ડુંગરો, વૃક્ષો, વન્યજીવો વિગેરે સાથે સેલ્ફી લેતા કે ફોટોગ્રાફી કરતા સાવચેત રહે એ જરૂરી છે.

વઘઈ તાલુકામાં સૌથી વધુ 250 મિ.મી. વરસાદ
છ કલાક દરમિયાન આહવા તાલુકામાં 155 મિ.મી., વઘઈ તાલુકામાં સૌથી વધુ 250 મિ.મી. અને સુબીર તાલુકામાં 90 મિ.મી. વરસાદ નોંધાયો છે. સતત વરસતા વરસાદને કારણે જિલ્લાના અનેક વિસ્તારોમાં પાણી ભરાઈ જતાં સામાન્ય જનજીવન પ્રભાવિત બન્યું છે.

ભારે વરસાદથી જિલ્લાના 28 રસ્તા બંધ
ધોધમાર વરસાદના કારણે બપોરે 12 વાગ્યાની સ્થિતિએ જિલ્લા પંચાયત હસ્તકના કુલ 28 માર્ગો અવરોધાયા છે. ક્યાંક કોઝવે ઉપરથી પાણી વહી રહ્યું છે તો ક્યાંક સ્લેબ ડ્રેઈન ઓવરટોપિંગ થતાં વાહન વ્યવહાર સંપૂર્ણપણે બંધ કરાયો છે.

આહવા, વઘઈ અને સુબીર તાલુકાના અનેક આંતરિક માર્ગો હાલ વાહનવ્યવહાર માટે બંધ રાખવામાં આવ્યા છે. જિલ્લા વહીવટી તંત્રે લોકોને બંધ માર્ગોનો ઉપયોગ ન કરવા તેમજ માત્ર વૈકલ્પિક માર્ગોનો ઉપયોગ કરવાની અપીલ કરી છે.

ભૂસ્ખલન અને માર્ગ નુકસાન બાદ તંત્ર સતત કામગીરીમાં
સતત વરસાદને કારણે ડાંગ જિલ્લાના અનેક વિસ્તારોમાં વૃક્ષો ધરાશાયી થવા, ઝાડીઓ પડવા, ભૂસ્ખલનની ઘટનાઓ તેમજ માર્ગોને નુકસાન પહોંચ્યું છે. રાજ્ય માર્ગ અને મકાન વિભાગના કાર્યપાલક ઇજનેર કેતન કુંકણાના માર્ગદર્શન હેઠળ વિભાગની ટીમો રસ્તાઓ પૂર્વવત કરવા માટે સતત કામગીરી કરી રહી છે.

કલેક્ટર પરિસ્થિતિ પર નજર રાખી રહ્યા છે
ડાંગ જિલ્લા કલેક્ટર એન.ડી. પરમાર સમગ્ર પરિસ્થિતિની સતત સમીક્ષા કરી રહ્યા છે. તમામ લાઇન વિભાગોના અધિકારીઓ અને કર્મચારીઓને કાર્યસ્થળ ન છોડવા સૂચના આપવામાં આવી છે જેથી કોઈપણ ઇમરજન્સી પરિસ્થિતિમાં તાત્કાલિક કામગીરી કરી શકાય.

પ્રવાસીઓ અને સ્થાનિકો માટે ખાસ અપીલ
ચોમાસામાં ડાંગ જિલ્લાના કુદરતી સૌંદર્યને માણવા મોટી સંખ્યામાં પ્રવાસીઓ ઉમટી પડે છે. જોકે જિલ્લા તંત્રે નદી, નાળા, ધોધ, ખીણ અને જોખમી સ્થળોએ સેલ્ફી કે ફોટોગ્રાફી ન કરવા, વરસાદી પાણી ભરાયેલા રસ્તા કે પુલ પરથી પસાર ન થવા તેમજ કાયદો-વ્યવસ્થા જાળવતા કર્મચારીઓ સાથે સહકાર આપવા ખાસ અપીલ કરી છે.

કોઈપણ ઇમરજન્સીમાં અહીં કરો સંપર્ક
જિલ્લામાં કોઈપણ અનિચ્છનીય ઘટના બને તો નાગરિકો જિલ્લા કંટ્રોલ રૂમ 02631-220347, વૈકલ્પિક નંબર 6355820252 અથવા ટોલ ફ્રી નંબર 1077 પર સંપર્ક કરી શકે છે. ભારે વરસાદને ધ્યાનમાં રાખીને જિલ્લા તંત્રે તમામ નાગરિકોને સાવચેતી રાખવા, બિનજરૂરી મુસાફરી ટાળવા અને માત્ર અધિકૃત સૂચનાઓનું પાલન કરવાની અપીલ કરી છે.

ગુજરાતમાં ચોમાસાએ હવે સંપૂર્ણ જોર પકડ્યું છે. રાજ્યના અનેક જિલ્લાઓમાં છેલ્લા કેટલાક દિવસોથી સતત ધોધમાર વરસાદ વરસી રહ્યો છે, જેના કારણે અનેક વિસ્તારોમાં જળબંબાકાર જેવી સ્થિતિ સર્જાઈ છે. ક્યાંક રસ્તાઓ પાણીમાં ગરકાવ થયા છે તો ક્યાંક ખેડૂતો માટે આ વરસાદ આશીર્વાદરૂપ બન્યો છે.

નવસારી જિલ્લામાં છેલ્લા ત્રણ દિવસથી અવિરત વરસાદ વરસી રહ્યો છે. શહેર તેમજ ગ્રામ્ય વિસ્તારોમાં સારો વરસાદ નોંધાતા ડાંગર અને શેરડીની વાવણીને વેગ મળ્યો છે. ખેડૂતોમાં ખુશીનો માહોલ જોવા મળી રહ્યો છે, પરંતુ સતત વરસાદને કારણે અનેક નીચાણવાળા વિસ્તારોમાં પાણી ભરાઈ ગયા છે. સુરક્ષાના ભાગરૂપે જિલ્લામાં 10 માર્ગો બંધ કરવામાં આવ્યા છે.

નવસારી શહેરના ધાનેરા પોઇન્ટ, સ્ટેશન રોડ, તીઘરા, લુંસીકુલ ટાવર, ફુવારા અને કાળિયાવાડી સહિતના વિસ્તારોમાં વહેલી સવારથી જ ભારે વરસાદ વરસ્યો હતો. આદિવાસી વિસ્તારોમાં સવારે માત્ર બે કલાકમાં બે ઇંચથી વધુ વરસાદ નોંધાયો હતો. બીલીમોરામાં ભારે વરસાદને કારણે દૃશ્યતા ઘટી જતાં વાહનચાલકોને મુશ્કેલી પડી હતી, જ્યારે વાંસદા તાલુકામાં પણ સારો વરસાદ નોંધાયો હતો.

ગીર સોમનાથમાં ખેતરો બન્યા બેટ
ગીર સોમનાથ જિલ્લામાં પણ મેઘરાજાએ ધમાકેદાર બેટિંગ કરી છે. સુત્રાપાડા, પ્રશ્ર્નાવડા અને ધામલેજ સહિતના વિસ્તારોમાં ભારે વરસાદને કારણે ખેતરો પાણીમાં ગરકાવ થઈ ગયા છે. ગામોના નીચાણવાળા વિસ્તારોમાં ગોઠણસમા પાણી ભરાતા લોકોની અવરજવર પ્રભાવિત થઈ છે. જિલ્લામાં છેલ્લા 24 કલાકમાં 12થી 13 ઇંચ સુધી વરસાદ નોંધાયો છે.

જામનગરમાં વરસાદી પાણીના પ્રવાહમાં બે બાળકો તણાયા
જામનગર જિલ્લાના જામજોધપુરમાં ભારે વરસાદને કારણે ખરાવાડ વિસ્તારમાં શેરીઓ નદીમાં ફેરવાઈ ગઈ હતી. વરસાદી પાણીના જોરદાર પ્રવાહમાં બે બાળકો તણાઈ ગયા હતા, જોકે સ્થાનિક લોકોની સતર્કતાના કારણે બંનેનો સમયસર બચાવ કરવામાં આવ્યો હતો. સમગ્ર ઘટના CCTVમાં કેદ થઈ હતી.

વલસાડમાં બે કલાકમાં 6 ઇંચ વરસાદ
વલસાડ જિલ્લામાં માત્ર બે કલાકમાં જ 6 ઇંચ વરસાદ ખાબકતા સમગ્ર શહેર પાણીમાં ગરકાવ થઈ ગયું હતું. તિથલ રોડ, ભાગડાવાડા, એમજી રોડ અને રેલવે ગરનાળાઓમાં પાણી ભરાતા વાહનવ્યવહારને ભારે અસર પહોંચી હતી. જિલ્લાના તમામ તાલુકાઓમાં સારો વરસાદ નોંધાયો છે.

ડાંગમાં વરસાદી માહોલ, નદીઓમાં નવા નીર
ડાંગ જિલ્લામાં વહેલી સવારથી ઝરમર વરસાદ વરસતા વાતાવરણમાં ઠંડક પ્રસરી ગઈ હતી. સાપુતારા સહિતના વિસ્તારોમાં કુદરતી સૌંદર્ય ખીલી ઊઠ્યું છે. બીજી તરફ અરવલ્લી જિલ્લાના ઉપરવાસમાં વરસાદને કારણે શામળાજીની ગોદરી નદી અને અન્ય નદીઓમાં નવા નીરની આવક શરૂ થઈ છે, જેના કારણે ખેડૂતોમાં ખુશીનો માહોલ છે.

ભરૂચમાં પણ ધોધમાર વરસાદ
ભરૂચ જિલ્લામાં વહેલી સવારથી જ ભારે વરસાદ શરૂ થયો હતો. નીચાણવાળા વિસ્તારોમાં પાણી ભરાઈ જતાં લોકો મુશ્કેલીમાં મુકાયા હતા. જિલ્લાના નવ તાલુકાઓમાં વરસાદ નોંધાયો છે, જેમાં હાંસોટ તાલુકામાં સૌથી વધુ 2.5 ઇંચ વરસાદ નોંધાયો હતો. જંબુસર, વાગરા, આમોદ, ઝઘડિયા અને નેત્રંગ સહિતના વિસ્તારોમાં પણ સારો વરસાદ વરસ્યો હતો.

આગામી દિવસોમાં પણ ભારે વરસાદની આગાહી
હવામાન વિભાગે આગામી દિવસોમાં પણ રાજ્યના અનેક જિલ્લાઓમાં ભારે વરસાદની આગાહી કરી છે. પરિસ્થિતિને ધ્યાનમાં રાખીને વલસાડ જિલ્લાના ધરમપુર અને કપરાડા સહિતના વિસ્તારોમાં શાળાઓમાં રજા જાહેર કરવામાં આવી છે. જિલ્લા તંત્રે લોકોને સાવચેત રહેવા અને જરૂરિયાત વિના બહાર ન નીકળવાની અપીલ કરી છે.

રાજ્યભરમાં વરસી રહેલા આ વરસાદથી એક તરફ શહેરી વિસ્તારોમાં જનજીવન પ્રભાવિત બન્યું છે, તો બીજી તરફ ખેડૂતો માટે આ વરસાદ આશીર્વાદરૂપ સાબિત થઈ રહ્યો છે. ડાંગર, શેરડી સહિતના પાકોની વાવણીને વેગ મળતાં ગુજરાતમાં ચોમાસું હવે પુરજોશમાં આગળ વધી રહ્યું છે.