અમેરિકી નેવીનું MH-60S સી હોક હેલિકોપ્ટર અરબી સમુદ્રમાં ઇમરજન્સી લેન્ડિંગ દરમિયાન દુર્ઘટનાગ્રસ્ત થયું છે. આ અકસ્માતમાં હેલિકોપ્ટરમાં સવાર ચાર ક્રૂ સભ્યોમાંથી ત્રણને સુરક્ષિત રીતે બહાર કાઢવામાં આવ્યા છે, જ્યારે એક ક્રૂ સભ્ય હજુ પણ લાપતા છે. અમેરિકી સેનાએ બુધવારે આ ઘટનાની સત્તાવાર પુષ્ટિ કરી હતી.
અમેરિકી નૌકાદળની 5મી ફ્લીટના જણાવ્યા અનુસાર, આ દુર્ઘટના કોઈ દુશ્મન દેશના હુમલાના કારણે થઈ નથી. દુર્ઘટનાગ્રસ્ત હેલિકોપ્ટર USS George H.W. Bush એરક્રાફ્ટ કેરિયર પર તૈનાત હતું. સ્થાનિક સમય અનુસાર 1 જુલાઈના રોજ સવારે અંદાજે 3:30 વાગ્યે આ અકસ્માત સર્જાયો હતો. હેલિકોપ્ટરમાં કુલ ચાર ક્રૂ સભ્યો હતા, જેમાંથી ત્રણને ઈજાઓ સાથે સુરક્ષિત રીતે બચાવી લેવામાં આવ્યા છે, જ્યારે એક સભ્યની શોધખોળ હજુ પણ ચાલુ છે.
લાપતા ક્રૂ સભ્યની શોધખોળ યથાવત
અમેરિકી નેવીએ લાપતા ક્રૂ સભ્યની ઓળખ જાહેર કરી નથી. નેવીના જણાવ્યા મુજબ અરબ સાગરમાં સર્ચ એન્ડ રેસ્ક્યૂ ઓપરેશન યુદ્ધના ધોરણે ચાલી રહ્યું છે. વિશેષ બચાવ ટીમો અને નૌકાદળના જહાજોને શોધખોળ માટે તૈનાત કરવામાં આવ્યા છે. સાથે જ અકસ્માતના કારણોની પણ વિગતવાર તપાસ શરૂ કરવામાં આવી છે.
MH-60S સી હોક હેલિકોપ્ટરની ખાસિયતો
MH-60S સી હોક એક આધુનિક ટ્વીન-એન્જિન સૈન્ય હેલિકોપ્ટર છે, જેનો ઉપયોગ સર્ચ એન્ડ રેસ્ક્યૂ, વિશેષ સૈન્ય અભિયાન, એન્ટી-સબમરીન ઓપરેશન અને માલસામાનના પરિવહન માટે થાય છે.
અમેરિકી સેનાએ UH-60 બ્લેક હોક હેલિકોપ્ટરને વર્ષ 1979માં પોતાના કાફલામાં સામેલ કર્યું હતું. ત્યારબાદ અમેરિકી નેવીને 1983માં SH-60B સી હોક અને 1988માં SH-60F વર્ઝન મળ્યા હતા. MH-60Sનું પ્રથમ ઓપરેશનલ સ્ક્વાડ્રન ‘હેલિકોપ્ટર કોમ્બેટ સપોર્ટ સ્ક્વાડ્રન-5’ હતું, જેનું મુખ્ય મથક ગુઆમમાં આવેલું છે.
સુપરસોનિક વિમાનો અંગે અમેરિકાની મોટી તૈયારી
આ દરમિયાન અમેરિકા પાંચ દાયકાથી વધુ સમયથી લાગુ રહેલા સુપરસોનિક વિમાનોના સંચાલન પરના પ્રતિબંધમાં રાહત આપવાની દિશામાં પણ આગળ વધી રહ્યું છે. અમેરિકાના પરિવહન વિભાગે નવા નિયમોનો પ્રસ્તાવ તૈયાર કર્યો છે, જેમાં સુપરસોનિક વિમાનો માટે અવાજ આધારિત નવા ધોરણો નક્કી કરવામાં આવ્યા છે.
આ પહેલ અમેરિકી અંતરિક્ષ એજન્સી NASAના પ્રાયોગિક X-59 સુપરસોનિક વિમાનના સફળ પરીક્ષણ બાદ કરવામાં આવી છે. જો નવા નિયમોને મંજૂરી મળશે, તો ભવિષ્યમાં વધુ ઝડપી અને આધુનિક સુપરસોનિક વિમાનોના સંચાલનનો માર્ગ મોકળો બનશે.
