અમદાવાદના વ્યસ્ત રસ્તા પર અચાનક સામેથી ધસી આવેલી Porsche કાર અને એક ક્ષણનો ફર્ક… આ ઘટનામાં મોટો અકસ્માત થતાં બચ્યો હોવાનો દાવો કરાયો છે. લો ગાર્ડન વિસ્તારમાં કથિત રીતે બેફામ ઝડપે કાર ચલાવવાનો વીડિયો વાયરલ થતાં હવે નવરંગપુરા પોલીસે 24 વર્ષીય પાયલટની ધરપકડ કરી છે. ઘટના અંગે પોલીસ વધુ તપાસ કરી રહી છે.
મળતી માહિતી મુજબ, ગાંધીનગરના લિંબડિયા ગામનો રહેવાસી અરકાન તિર્મિઝી Porsche ચલાવી રહ્યો હતો. ફરિયાદી શ્રેયાંશના જણાવ્યા અનુસાર, તે HCG હોસ્પિટલ નજીક કામ પૂરું કરીને પોતાની કાર તરફ જઈ રહ્યો હતો ત્યારે Porsche ખૂબ જ ઝડપે તેની તરફ આવી હતી. કાર લગભગ 110 કિલોમીટર પ્રતિ કલાકની ઝડપે હતી. શ્રેયાંશની કારને ટક્કર થતાં બચી હતી અને સમગ્ર ઘટના તેની કારના ડેશકેમમાં કેદ થઈ ગઈ હતી.
આ વીડિયો સોશિયલ મીડિયા પર વાયરલ થયા બાદ નવરંગપુરા પોલીસે Porscheના રજિસ્ટ્રેશન નંબરના આધારે કારને ટ્રેસ કરી હતી. ત્યારબાદ કારના માલિકને પોલીસ સ્ટેશન બોલાવવામાં આવ્યો અને Porsche જપ્ત કરવામાં આવી હતી. પોલીસે બેદરકારીપૂર્વક અને અન્ય લોકોના જીવને જોખમમાં મૂકે તેવી રીતે ડ્રાઇવિંગ કરવાના આરોપસર કેસ નોંધ્યો હતો.
દરમિયાન, આ જ Porscheનો અન્ય એક વીડિયો પણ સામે આવ્યો છે, જેમાં કાર આશરે 300 કિલોમીટર પ્રતિ કલાકની ઝડપે દોડતી હોવાનો દાવો કરવામાં આવ્યો છે. આ વીડિયો ખરેખર આ જ કારનો છે કે નહીં અને તેની ઝડપ કેટલી હતી, તેની પણ પોલીસ તપાસ કરી રહી છે.
ફરિયાદ બાદ આરોપીએ ફરિયાદીનો સંપર્ક કરીને પોતે પાયલટ હોવાનું જણાવ્યું હતું અને ફરિયાદ પાછી ખેંચવા વિનંતી કરી હોવાનો પણ ફરિયાદમાં ઉલ્લેખ છે. સમગ્ર મામલે પોલીસ વીડિયો, ફરિયાદ અને અન્ય પુરાવાના આધારે તપાસ આગળ ધપાવી રહી છે.
