અમદાવાદ એરપોર્ટ પર કસ્ટમ્સ વિભાગે ગુપ્ત માહિતીના આધારે મોટી સફળતા મેળવી છે. દુબઈથી આવેલી એક ફ્લાઈટમાં સોનાની દાણચોરી માટે અપનાવવામાં આવેલી નવી રીતનો ભંડાફોડ કરતાં અધિકારીઓએ અંદાજે ₹4 કરોડથી વધુ કિંમતનું સોનું જપ્ત કર્યું છે.
12 જૂનના રોજ કરવામાં આવેલી તપાસ દરમિયાન ફ્લાઈટના આગળના ભાગમાં આવેલા લેવેટરી (ટોઇલેટ)ના સ્પીકર બોક્સની અંદર કાળા પ્લાસ્ટિક ટેપથી લપેટેલા બે શંકાસ્પદ પાઉચ મળી આવ્યા હતા. તપાસ કરતાં તેમાંથી 24 સોનાના બિસ્કિટ મળી આવ્યા, જે 999 શુદ્ધતાવાળા હોવાનું જાણવા મળ્યું હતું.
આ સોનાની કુલ કિંમત ₹4 કરોડથી વધુ હોવાનું માનવામાં આવે છે. જોકે, આટલી મોટી કિંમતના સોના પર કોઈ વ્યક્તિએ માલિકીનો દાવો કર્યો ન હોવાથી કસ્ટમ્સ વિભાગે સમગ્ર જથ્થો કબ્જે કરી લીધો છે. હાલ અધિકારીઓ સોનાના વાસ્તવિક માલિક અને દાણચોરીના સમગ્ર રેકેટ સુધી પહોંચવા માટે વધુ તપાસ ચલાવી રહ્યા છે.
