વાપીના કરવડ ગામની સીમમાં આજે સવારે એક મોટી ઔદ્યોગિક દુર્ઘટના સર્જાતા સ્થાનિક તંત્રમાં દોડધામ મચી ગઈ છે. કરવડ ગામમાં વર્ષોથી ધમધમતા ભંગારના મોટા ગોડાઉનો પૈકીના એક ગોડાઉનમાં અગમ્ય કારણોસર આકસ્મિક આગ ફાટી નીકળી હતી. શરૂઆતમાં સામાન્ય લાગતી આ આગે મિનિટોની અંદર જ રૌદ્ર સ્વરૂપ ધારણ કરી લીધું હતું, કારણ કે ગોડાઉનમાં પ્લાસ્ટિકના ભંગાર સાથે ઉદ્યોગોમાંથી નીકળતું જોખમી કેમિકલ વેસ્ટ મટીરીયલ ગેરકાયદેસર રીતે સંગ્રહિત કરવામાં આવ્યું હતું.
આગે લીધો વિકરાળ રૂપ, 4 ગોડાઉન બન્યા ભસ્મીભૂત
આગ એટલી ઝડપથી ફેલાઈ કે તેની ઝપેટમાં આસપાસ આવેલા અન્ય ચાર ગોડાઉનો પણ આવી ગયા હતા. પ્રત્યક્ષદર્શીઓના જણાવ્યા અનુસાર, ગોડાઉનની અંદર રાખવામાં આવેલા કેમિકલના ડ્રમોમાં એક પછી એક જોરદાર બ્લાસ્ટ થતા રહ્યા હતા, જેના કારણે આગ વધુ ભયાનક બની ગઈ હતી. કરવડ ગામ અને આસપાસના વિસ્તારોમાં કાળા ધુમાડાના ગોટેગોટા આકાશમાં છવાઈ ગયા હતા, જે ઘણા કિલોમીટર દૂરથી પણ સ્પષ્ટ દેખાતા હતા. ઝેરી ધુમાડાને કારણે નજીકના રહેણાંક અને વાડી વિસ્તારોના લોકોને શ્વાસ લેવામાં મુશ્કેલી પડતા તેઓ સુરક્ષિત સ્થળોએ ખસી ગયા હતા.
GIDC ફાયર બ્રિગેડનું મેગા રેસ્ક્યૂ ઓપરેશન
ઘટનાની જાણ થતાં જ વાપી GIDC ફાયર સ્ટેશનની ટીમો તાત્કાલિક ઘટનાસ્થળે પહોંચી ગઈ હતી. શરૂઆતમાં 4 વોટર બ્રાઉઝર સહિત અનેક ફાયર ફાઇટરોને આગ બુઝાવવા માટે મોકલવામાં આવ્યા હતા. કેમિકલની આગ હોવાથી ફાયર બ્રિગેડ દ્વારા પાણી ઉપરાંત ખાસ પ્રકારના કેમિકલ ફોમ (Foam)નો ઉપયોગ કરવામાં આવી રહ્યો છે, જેથી ઓક્સિજનનો સપ્લાય બંધ કરીને આગને કાબૂમાં લઈ શકાય.
પોલીસનો કાફલો પણ તૈનાત
ઘટનાની ગંભીરતાને ધ્યાનમાં રાખીને વલસાડ જિલ્લા પોલીસનો કાફલો પણ સ્થળ પર પહોંચી ગયો હતો. પોલીસ દ્વારા કાયદો અને વ્યવસ્થા જાળવવા તેમજ ટ્રાફિક નિયંત્રણ માટે જરૂરી વ્યવસ્થા ગોઠવવામાં આવી છે.
પ્રાથમિક માહિતી મુજબ આ આગની ઘટનામાં અત્યાર સુધી કોઈ જાનહાનિના સમાચાર નથી. જોકે, કરોડો રૂપિયાનો ભંગાર અને કેમિકલનો જથ્થો આગમાં બળીને ખાખ થઈ ગયો હોવાનું જાણવા મળી રહ્યું છે.
