ઉત્તરાખંડમાં વરસાદે જનજીવન સંપૂર્ણપણે ખોરવી નાખ્યું છે. ભૂસ્ખલનને કારણે રાષ્ટ્રીય ધોરીમાર્ગો બંધ થવા સાથે જ ચારધામ યાત્રા બે દિવસ માટે અસ્થાયી રૂપે રોકી દેવામાં આવી છે.
રાજધાની દેહરાદૂન, માલદેવતામાં છેલ્લા 24 કલાકમાં સૌથી વધુ 233 મીમી વરસાદ નોંધાયો છે, જ્યારે દેહરાદૂન, મસૂરી, જોલી ગ્રાન્ટ અને ઉખીમઠ સહિતના અનેક વિસ્તારોમાં મુશળધાર વરસાદ પડ્યો છે. સતત વરસાદને કારણે, ચારધામ યાત્રા બે દિવસ માટે અસ્થાયી રૂપે રોકી દેવામાં આવી છે. ભૂસ્ખલનને કારણે કેદારનાથ, બદ્રીનાથ અને યમુનોત્રી હાઇવે અનેક સ્થળોએ બંધ કરવામાં આવ્યા છે. નદીઓ અને નાળાઓ ઉભરાઈ રહ્યા છે, કાટમાળ અને પથ્થરોના કારણે ઘણી જગ્યાએ રસ્તાઓ બંધ થઈ ગયા છે, જેના કારણે બચાવ કાર્ય જરૂરી બન્યું છે અને આજે ચાર જિલ્લાઓમાં શાળાઓ બંધ કરવામાં આવી છે.
ચારધામ યાત્રા બે દિવસ માટે અસ્થાયી રૂપે સ્થગિત કરવામાં આવી છે. ગઢવાલ વિભાગના કમિશનરે જણાવ્યું હતું કે અનેક સ્થળોએ ભૂસ્ખલનથી ચારધામ યાત્રા માર્ગ અવરોધિત થયો છે અને ભારે વરસાદની ચેતવણી આપવામાં આવી છે, તેથી યાત્રાળુઓની સલામતી માટે ચારધામ યાત્રા આજે અને આવતીકાલ માટે મુલતવી રાખવામાં આવી છે. હવામાન અનુકૂળ આવે ત્યારે યાત્રા ફરી શરૂ થશે. ઉત્તરાખંડમાં ચોમાસું ફરી એકવાર સક્રિય થયું છે. હવામાન કેન્દ્રે રાજ્યના મોટાભાગના જિલ્લાઓમાં હળવાથી મધ્યમ વરસાદ અને ગાજવીજ સાથે વરસાદની આગાહી કરી છે. કેટલાક જિલ્લાઓ માટે ભારેથી અતિ ભારે વરસાદની ચેતવણી પણ જારી કરવામાં આવી છે. વહીવટીતંત્રને સતર્ક રહેવાની સૂચના આપવામાં આવી છે.
દેહરાદૂન ખાતે નંદા કી ચોકી નજીક બનેલો નવો પુલ પહેલા ચોમાસાના વરસાદને પણ સહન કરી શક્યો નહીં. આ પુલ આશરે ₹16 કરોડના ખર્ચે બનાવવામાં આવ્યો હતો. વરસાદ દરમિયાન પુલનો મોટો ભાગ ધસી પડતાં વાહનવ્યવહાર સંપૂર્ણપણે ઠપ્પ થઈ ગયો હતો. તાજેતરમાં પૂર્ણ થયેલા આ પુલના એપ્રોચ રોડને થયેલા નુકસાનથી બાંધકામની ગુણવત્તા પર ગંભીર પ્રશ્નો ઉભા થયા છે. સલામતીના કારણોસર પુલ પર ટ્રાફિક બંધ કરવામાં આવ્યો છે. દરમિયાન, રેન્જર્સ ગ્રાઉન્ડ પાસે પાણી ભરાઈ જવાથી વાહનોને પસાર થવામાં મુશ્કેલી પડી રહી છે.
