ગુજરાતમાં ચોમાસાની સિસ્ટમ ફરી સક્રિય થતાં આગામી ચાર દિવસ રાજ્યના અનેક વિસ્તારોમાં વરસાદનું જોર વધવાની આગાહી કરવામાં આવી છે. ખાસ કરીને દક્ષિણ ગુજરાત અને સૌરાષ્ટ્રના વિસ્તારોમાં ભારે વરસાદની શક્યતા છે. હવામાન વિભાગે 13 અને 14 સપ્ટેમ્બરે કેટલાક જિલ્લાઓમાં અતિભારે વરસાદની ચેતવણી આપી છે.
હવામાન વિભાગના જણાવ્યા અનુસાર એક તરફ ઉત્તર-પશ્ચિમ બંગાળની ખાડી, ઉત્તર ઓડિશા અને આંધ્ર પ્રદેશ નજીક લો-પ્રેશર વિસ્તાર સર્જાયું છે, તો બીજી તરફ ઉત્તર રાજસ્થાનથી આ સાઇક્લોનિક સર્ક્યુલેશન સુધી એક ટ્રફ પણ સર્જાયો છે. આ તમામ હવામાન પ્રણાલીઓની અસર ગુજરાતના વરસાદ પર જોવા મળી શકે છે.
આજે શનિવારે 12 સપ્ટેમ્બરે આણંદ, વડોદરા, છોટા ઉદેપુર, નર્મદા, ભરૂચ, સુરત, તાપી, ડાંગ, નવસારી, વલસાડ, દમણ તથા દાદરા અને નગર હવેલીમાં કેટલીક જગ્યાએ ગાજવીજ સાથે ભારે વરસાદની આગાહી છે. આ ઉપરાંત મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, પંચમહાલ, દાહોદ, મહીસાગર સહિતના જિલ્લાઓમાં હળવાથી મધ્યમ વરસાદ પડી શકે છે. સૌરાષ્ટ્રમાં ભાવનગર, બોટાદ, અમરેલી અને સુરેન્દ્રનગરમાં પણ મધ્યમ વરસાદની શક્યતા છે. આ દરમિયાન પવનની ઝડપ 30થી 40 કિલોમીટર પ્રતિ કલાક સુધી રહેવાની શક્યતા છે.
રવિવાર 13 સપ્ટેમ્બરે વરસાદનું જોર વધુ વધવાની સંભાવના છે. સુરત, તાપી, ડાંગ, નવસારી, વલસાડ, દમણ તથા દાદરા અને નગર હવેલીમાં કેટલીક જગ્યાએ અતિભારે વરસાદ પડી શકે છે. અમદાવાદ, દાહોદ, આણંદ, પંચમહાલ, વડોદરા, છોટા ઉદેપુર, નર્મદા અને ભરૂચમાં ભારે વરસાદની આગાહી છે. સૌરાષ્ટ્રના રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં પણ ભારે વરસાદની શક્યતા છે.
સોમવાર 14 સપ્ટેમ્બરે ડાંગ, નવસારી, વલસાડ, દમણ, દાદરા અને નગર હવેલી ઉપરાંત સૌરાષ્ટ્રના અમરેલી અને ભાવનગરમાં અતિભારે વરસાદની આગાહી કરવામાં આવી છે. ભરૂચ, સુરત, તાપી, રાજકોટ, જામનગર, પોરબંદર, જૂનાગઢ, મોરબી, દ્વારકા, ગીર સોમનાથ, બોટાદ અને દીવમાં છૂટાછવાયા સ્થળોએ ભારે વરસાદ પડી શકે છે. રાજ્યના અન્ય વિસ્તારોમાં હળવાથી મધ્યમ વરસાદની શક્યતા રહેશે અને પવન 30થી 40 કિલોમીટર પ્રતિ કલાકની ઝડપે ફૂંકાઈ શકે છે.
મંગળવાર 15 સપ્ટેમ્બરે પણ વરસાદી માહોલ યથાવત રહેવાની શક્યતા છે. વલસાડ, દમણ, દાદરા અને નગર હવેલી ઉપરાંત જામનગર, પોરબંદર, જૂનાગઢ, દ્વારકા, ગીર સોમનાથ અને દીવમાં ભારે વરસાદની આગાહી છે. બનાસકાંઠા, વાવ-થરાદ, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહીસાગર સહિત વડોદરા, છોટા ઉદેપુર, નર્મદા, ભરૂચ, સુરત, તાપી, ડાંગ, નવસારી અને વલસાડમાં કેટલીક જગ્યાએ હળવો વરસાદ પડી શકે છે.
ગુજરાતમાં ફરી ચોમાસાની સિસ્ટમ સક્રિય, આજથી ચાર દિવસ વરસાદની આગાહી
ચીનના રાષ્ટ્રપતિ શી જિનપિંગ BRICS સમિટમાં ભાગ લેવા માટે 7 વર્ષ બાદ ભારત આવ્યા
ચીનના રાષ્ટ્રપતિ શી જિનપિંગ આજે સાત વર્ષ બાદ ભારતની મુલાકાતે નવી દિલ્હી આવી પહોંચ્યા છે. તેઓ 18મા બ્રિક્સ સમિટમાં ભાગ લેવા માટે આવ્યા છે. શિખર સંમેલન ઉપરાંત, શી જિનપિંગ વડા પ્રધાન નરેન્દ્ર મોદી સાથે દ્વિપક્ષીય વાટાઘાટો પણ કરશે. વડા પ્રધાન મોદીના આમંત્રણ પર શી જિનપિંગ ભારત આવ્યા છે. અગાઉ, તેઓ 2019 માં ચેન્નાઈ નજીક મામલ્લાપુરમમાં આયોજિત અનૌપચારિક સમિટ માટે ભારત આવ્યા હતા.
ચીની રાષ્ટ્રપતિ સાથે એક ઉચ્ચ સ્તરીય પ્રતિનિધિમંડળ પણ ભારત આવ્યું છે. તેમાં ચીનની કમ્યુનિસ્ટ પાર્ટીની પોલિટબ્યુરો સ્ટેન્ડિંગ કમિટીના સભ્ય અને સેન્ટ્રલ કમિટીના જનરલ ઓફિસના ડિરેક્ટર કાઈ જી અને વિદેશ પ્રધાન અને પોલિટબ્યુરો સભ્ય વાંગ યીનો સમાવેશ થાય છે.
BRICS સમિટમાં અમેરિકા પર રશિયા અને ઈરાન ભડક્યા, ભારત માટે શું રહેશે પડકારો?
રશિયા અને ઈરાને શુક્રવારે BRICS શિખર સંમેલન દરમિયાન અમેરિકા અને અન્ય પશ્ચિમી દેશો દ્વારા લાદવામાં આવેલા પ્રતિબંધો તથા આક્રમક કાર્યવાહીની આકરી ટીકા કરી હતી. બંને દેશોએ BRICSને એવી વ્યૂહરચના તૈયાર કરવાની અપીલ કરી હતી, જેનાથી સમૂહ આવા પડકારો અને દબાણોનો વધુ અસરકારક રીતે સામનો કરી શકે.
આ સ્થિતિમાં ભારત સામે સૌથી મોટો પડકાર એ રહેશે કે BRICSની બેઠક પશ્ચિમ વિરોધી મંચમાં પરિવર્તિત ન થાય.
ઈરાનના રાષ્ટ્રપતિએ શું કહ્યું?
BRICS બિઝનેસ ફોરમમાં ઈરાનના રાષ્ટ્રપતિ મસૂદ પેઝેશ્કિયાનએ કહ્યું કે છેલ્લા કેટલાક વર્ષોમાં ઈરાન પર અનેક પ્રકારના પ્રતિબંધો લાદવામાં આવ્યા છે. પરંતુ તાજેતરના મહિનાઓમાં અમેરિકા અને ઈઝરાયેલની સૈન્ય કાર્યવાહીથી ઈરાન પરનું દબાણ વધુ ગંભીર બન્યું છે.
તેમણે કહ્યું કે આ કાર્યવાહીને કારણે માત્ર ભૌતિક નુકસાન જ નથી થયું, પરંતુ એ પણ સ્પષ્ટ થયું છે કે આર્થિક સુરક્ષાને રાષ્ટ્રીય અને પ્રાદેશિક સુરક્ષાથી અલગ કરી શકાય નહીં.
પેઝેશ્કિયાને વધુમાં કહ્યું કે જ્યારે કોઈ દેશના વેપાર, ઊર્જા માળખા અથવા નાણાકીય વ્યવસ્થા પર રાજકીય કે સૈન્ય દબાણ આવે છે, ત્યારે તેની અસર દેશની સરહદોની બહાર પણ જોવા મળે છે અને તેનાથી પ્રાદેશિક તથા વૈશ્વિક સ્થિરતા પ્રભાવિત થઈ શકે છે.
રશિયાના રાષ્ટ્રપતિ પુતિને શું કહ્યું?
રશિયાના રાષ્ટ્રપતિ વ્લાદિમીર પુતિને એવા દેશોના નેતાઓની ટીકા કરી હતી, જેઓ પોતાનું જૂનું વર્ચસ્વ ફરીથી સ્થાપિત કરવા માટે તમામ પ્રકારના ઉપાયો અપનાવી રહ્યા છે.
પુતિને આરોપ લગાવ્યો કે કેટલાક દેશો સીધા સૈન્ય બળનો ઉપયોગ કરવા સુધી પહોંચી ગયા છે. તેમાં ઔદ્યોગિક અને લોજિસ્ટિક્સ માળખાને નુકસાન પહોંચાડવું, આંતરરાષ્ટ્રીય પરિવહન કોરિડોરને અટકાવવાનો પ્રયાસ કરવો અને દરિયાઈ જહાજો પર કબજો કરવાનો પ્રયાસ સામેલ છે.
તેમણે અન્ય દેશોના રાષ્ટ્રીય હિતોની રક્ષા કરનારાઓ સામે ગેરકાયદેસર પ્રતિબંધો અને વધુ પ્રતિબંધોની ધમકી આપવાની પણ ટીકા કરી.
ભારત સામે મોટો પડકાર
રશિયા અને ઈરાનના નિવેદનોથી ભારત સામેના પડકારોની ઝલક મળી છે. ભારતે પોતાની ફ્લેક્સિબલ મલ્ટી-અલાઈનમેન્ટ નીતિ જાળવી રાખીને વિવિધ દેશો સાથેના સંબંધોમાં સંતુલન સાધવું પડશે.
અમેરિકન રાષ્ટ્રપતિ ડોનાલ્ડ ટ્રમ્પનું વહીવટીતંત્ર BRICSની ચર્ચાઓ પર નજર રાખી રહ્યું છે. ખાસ કરીને રશિયા અને ઈરાન પશ્ચિમી પ્રતિબંધોથી નારાજ છે, જ્યારે ચીન ડી-ડૉલરાઈઝેશન અને સરહદ પારની પેમેન્ટ સિસ્ટમ જેવા વિકલ્પોને આગળ વધારવામાં રસ ધરાવે છે. આ વ્યવસ્થાઓ પશ્ચિમના નિયંત્રણ હેઠળની SWIFT સિસ્ટમને પડકાર આપી શકે છે.
રશિયા અને ઈરાનની શું માંગ?
પુતિને વેપાર, ઈન્ફ્રાસ્ટ્રક્ચર અને ટેક્નોલોજી પ્રોજેક્ટ્સ માટે નવા ઈન્વેસ્ટમેન્ટ પ્લેટફોર્મની માંગ કરી હતી. તેમણે ટ્રાન્સ-આર્કટિક ટ્રાન્સપોર્ટ કોરિડોર અને નોર્થ-સાઉથ ઈન્ટરનેશનલ કોરિડોર જેવા વૈશ્વિક પરિવહન માર્ગોને સાથે મળીને વિકસાવવાની તૈયારી દર્શાવી.
પેઝેશ્કિયાને કહ્યું કે ખાદ્ય અને ઊર્જા સુરક્ષા આર્થિક સુરક્ષાના બે મુખ્ય આધાર છે. તેમણે ઈરાનને તેના વિશાળ ઊર્જા ભંડાર અને વ્યૂહાત્મક ભૌગોલિક સ્થિતિને કારણે BRICSની ખાદ્ય, ઊર્જા અને પરિવહન સપ્લાય ચેઇનમાં મહત્વપૂર્ણ ભાગીદાર ગણાવ્યો.
ઈરાને સ્થાનિક કરન્સીમાં વેપાર વધારવા, શરૂઆતમાં 10 અબજ ડૉલરના રિ-ઈન્શ્યોરન્સ પૂલની રચના કરવા અને ન્યૂ ડેવલપમેન્ટ બેંક મારફતે ઈન્ફ્રાસ્ટ્રક્ચર માટે ફંડિંગ કરવાની પણ ભલામણ કરી.
પુતિને પણ ન્યૂ ડેવલપમેન્ટ બેંકને સમર્થન આપતાં તેનો ઉપયોગ નવા ઈન્વેસ્ટમેન્ટ પ્લેટફોર્મ માટે કરવાની વાત કરી.
મોદીની પુતિનને અનોખી ભેટ કેમ ચર્ચામાં? ‘તિરુક્કુરલ’ વિશે જાણો આ મહત્વની વાતો
રશિયાના રાષ્ટ્રપતિ વ્લાદિમીર પુતિન સાથેની મુલાકાતમાં વડાપ્રધાન નરેન્દ્ર મોદીએ આપેલી એક ખાસ ભેટે સૌનું ધ્યાન ખેંચ્યું છે. આ ભેટ કોઈ સામાન્ય પુસ્તક નહીં, પરંતુ પ્રાચીન તામિલ સાહિત્યની અમૂલ્ય કૃતિ ‘તિરુક્કુરલ’ની રશિયન આવૃત્તિ છે. બ્રિક્સ સમિટ પહેલાં નવી દિલ્હીમાં મળેલા બંને નેતાઓ વચ્ચેની આ ભેટને ભારતની સાહિત્યિક અને સાંસ્કૃતિક ધરોહરને વૈશ્વિક સ્તરે રજૂ કરવાના પ્રયાસ તરીકે પણ જોવામાં આવી રહી છે.
શું છે તિરુક્કુરલ?
તિરુક્કુરલ, જેને ‘કુરલ’ તરીકે પણ ઓળખવામાં આવે છે, તામિલ ભાષાનો અત્યંત પ્રસિદ્ધ શાસ્ત્રીય ગ્રંથ છે. પરંપરાગત રીતે તેની રચના કવિ-દાર્શનિક તિરુવલ્લુવર સાથે જોડાયેલી છે. ગ્રંથમાં કુલ 1,330 કુરલ એટલે કે સંક્ષિપ્ત દ્વિપદીઓ છે, જે 133 અધ્યાયોમાં વહેંચાયેલી છે.
તિરુક્કુરલની ખાસિયત એ છે કે તે કોઈ એક જ વિષય પૂરતું સીમિત નથી. તેમાં સદાચાર, સત્ય, આત્મસંયમ, દયા, શિક્ષણ, દાન અને પરિવારજીવનથી લઈને શાસન, ન્યાય, નેતૃત્વ, સંપત્તિ, મિત્રતા, કૃષિ અને માનવીય સંબંધો સુધીના અનેક વિષયો પર વિચાર રજૂ કરવામાં આવ્યા છે.
ત્રણ ભાગમાં વહેંચાયેલો ગ્રંથ
તિરુક્કુરલના ત્રણ મુખ્ય વિભાગ છે—અરમ, પોરુલ અને ઇનબમ. અરમમાં નૈતિકતા અને સદાચાર, પોરુલમાં સમાજ, શાસન અને વ્યવહારિક જીવન, જ્યારે ઇનબમમાં પ્રેમ અને સંબંધો અંગેના વિચારો રજૂ થાય છે.
કેટલું જૂનું છે?
તિરુક્કુરલને સામાન્ય રીતે 2,000 વર્ષથી વધુ જૂની પ્રાચીન કૃતિ તરીકે વર્ણવવામાં આવે છે. જોકે તેની ચોક્કસ રચનાકાળ અંગે શૈક્ષણિક સ્તરે વિવિધ મતો છે.
પુતિનને રશિયન આવૃત્તિ કેમ?
Central Institute of Classical Tamil (CICT) ના સત્તાવાર પ્રકાશન કેટલોગમાં 2026ની રશિયન આવૃત્તિ નોંધાયેલી છે અને તેના અનુવાદક તરીકે Naira Mkrtchyanનું નામ આપવામાં આવ્યું છે. આ અનુવાદથી રશિયન ભાષાના વાચકો પણ તિરુવલ્લુવરના વિચારોને પોતાની ભાષામાં સમજી શકે છે.
તિરુક્કુરલની આ ભેટે ફરી એકવાર સાબિત કર્યું છે કે ભારતની સાંસ્કૃતિક શક્તિ માત્ર સ્મારકો અને પરંપરાઓમાં જ નહીં, પરંતુ સદીઓ જૂના સાહિત્ય અને માનવજીવનને સ્પર્શતા વિચારોમાં પણ વસે છે.
પુતિનના ભારત પ્રવાસ વચ્ચે Su-57 પર ચર્ચા તેજ, 5મી પેઢીના ફાઇટર જેટ અંગે મોટું અપડેટ
ભારત અને રશિયા વચ્ચેની જૂની અને વ્યૂહાત્મક રક્ષા ભાગીદારીમાં હવે વધુ એક મોટો અધ્યાય ઉમેરાઈ શકે છે. રશિયાના રાષ્ટ્રપતિ વ્લાદિમીર પુતિનના ભારત પ્રવાસ દરમિયાન 5મી પેઢીના Su-57 ફાઇટર જેટને લઈને ચર્ચાએ જોર પકડ્યું છે. ભારત પોતાની એર પાવરને આધુનિક બનાવવા માટે 5મી પેઢીના ફાઇટર જેટની ક્ષમતાઓ તરફ જોઈ રહ્યું છે, ત્યારે રશિયા ફરી એકવાર Su-57 સાથે ટેક્નોલોજી સહકાર અને સંભવિત સ્થાનિક ઉત્પાદનનો પ્રસ્તાવ આગળ ધપાવી રહ્યું છે.
અહેવાલો અનુસાર, આજે વડાપ્રધાન નરેન્દ્ર મોદી અને પુતિન વચ્ચેની દ્વિપક્ષીય બેઠક દરમિયાન Su-57 અંગે ચર્ચા થવાની સંભાવના હતી અને આ મુદ્દો બંને દેશોના રક્ષા સહકારના મહત્વના વિષયોમાં સામેલ રહ્યો છે.
Su-57ને રશિયાની 5મી પેઢીની મલ્ટીરોલ સ્ટેલ્થ ફાઇટર તરીકે વિકસાવવામાં આવ્યું છે. તેમાં ઓછું રડાર સિગ્નેચર, આધુનિક સેન્સર, ઊંચી મેન્યુવેરેબિલિટી અને આંતરિક હથિયાર વહન કરવાની ક્ષમતા જેવી વિશેષતાઓ છે. રશિયા ભારતને આ વિમાન સાથે ટેક્નોલોજી ટ્રાન્સફર અને સ્થાનિક ઉત્પાદનની સંભાવનાઓ પણ બતાવી રહ્યું છે.
આ સમગ્ર ચર્ચામાં Product 177 એન્જિન પણ મહત્વનું બની શકે છે. રશિયાની સરકારી સંસ્થાના જણાવ્યા અનુસાર, આ એન્જિને 22 ડિસેમ્બર 2025ના રોજ Su-57 ટ્રાયલ વિમાન સાથે પ્રથમ ઉડાન ભરી હતી. જોકે એન્જિન હજી વિકાસ અને પરીક્ષણના તબક્કામાં હોવાથી તેની વિશ્વસનીયતા, લાઇફસાઇકલ ખર્ચ અને ટેક્નોલોજી ટ્રાન્સફરની વાસ્તવિક શરતો ભારત માટે મહત્વપૂર્ણ રહેશે.
બીજી તરફ, ભારત રશિયા પાસેથી વધુ પાંચ S-400 સ્ક્વોડ્રનની ખરીદી અંગે પણ પ્રક્રિયામાં છે.
સુરતમાં આજથી સતત 3 દિવસ બેંકો કેમ બંધ?
સુરતમાં આજે બેંકનું કામકાજ લઈને પહોંચેલા ગ્રાહકોને શાખાના દરવાજે જ હડતાળનો સામનો કરવો પડ્યો હતો. યુનાઇટેડ ફોરમ ઓફ બેંક યુનિયન્સ (UFBU)ના દેશવ્યાપી આહ્વાનને પગલે 11 સપ્ટેમ્બર, શુક્રવારે જાહેર ક્ષેત્રની બેંકોમાં કામગીરી ઠપ રહી હતી. 12 સપ્ટેમ્બરનો બીજો શનિવાર અને 13 સપ્ટેમ્બરનો રવિવાર હોવાથી શાખાકીય બેંકિંગ સેવાઓ સતત ત્રણ દિવસ પ્રભાવિત થઈ રહી છે.
બેંક કર્મચારી સંગઠનોની મુખ્ય માંગ લાંબા સમયથી પડતર રહેલી 5-ડે બેન્કિંગ સિસ્ટમ લાગુ કરવાની છે. યુનિયનોનો દાવો છે કે તમામ શનિવારની રજા અંગે થયેલી સમજૂતી છતાં તેનો અંતિમ અમલ હજુ થયો નથી. આ સાથે પરફોર્મન્સ લિન્ક્ડ ઇન્સેન્ટિવ (PLI) અંગે પણ કર્મચારી સંગઠનોએ વાંધો ઉઠાવ્યો છે. જોકે તાજેતરની સત્તાવાર માહિતી મુજબ PLIની કેટલીક જોગવાઈઓ હાલ અમલથી દૂર રાખવામાં આવી છે અને આ મુદ્દે દ્વિપક્ષીય ચર્ચાની માંગ કરવામાં આવી રહી છે.
ગુજરાતમાં આશરે 75 હજાર કર્મચારી અને અધિકારીઓ હડતાળમાં જોડાયા છે. રાજ્યની હજારો સરકારી બેંક શાખાઓ બંધ રહેતાં રોકડ જમા-ઉપાડ, ચેક ક્લિયરિંગ અને શાખા આધારિત અન્ય સેવાઓને અસર થઈ શકે છે. સુરતમાં પણ ગ્રાહકો અને વેપારીઓને ખાસ કરીને રોકડ આધારિત વ્યવહારોમાં મુશ્કેલીનો સામનો કરવો પડી રહ્યો છે.
હડતાળને કારણે વેપાર-ધંધા સાથે જોડાયેલા અનેક લોકોના મહત્વના બેંકિંગ કામ અટવાયા છે. કર્મચારી સંગઠનો હવે સરકાર સાથે ચર્ચા દ્વારા 5-ડે બેન્કિંગની માંગનો ઉકેલ આવે તેવી અપેક્ષા રાખી રહ્યા છે.
તાપી બચાવવા સુરતીઓએ શોધ્યો અનોખો ઉપાય, ભાદરવી અમાસે બ્રિજ પર થયો આ પ્રયાસ
સુરતની જીવાદોરી સમાન તાપી નદીમાં શ્રદ્ધાના નામે પ્રદૂષણ ન ભળે તે માટે આજે ભાદરવી અમાસના દિવસે અનોખું અભિયાન જોવા મળ્યું હતું. રક્ષાબંધન બાદ રાખડીઓને નદીમાં પધરાવવાની વર્ષો જૂની પરંપરાને કારણે પ્લાસ્ટિક, કૃત્રિમ દોરા, કેમિકલ્સ અને અન્ય અવિઘટનશીલ સામગ્રી પાણીમાં જતી હોવાની ચિંતા વચ્ચે ‘મહારાજા કેમ્પસ ટીમ’ના સ્વયંસેવકો આજે મેદાને ઉતર્યા હતા. ‘જલેષુ જીવનમ્’ના સંદેશ સાથે રાખડીઓને નદીમાં પધરાવવાને બદલે એકત્ર કરી યોગ્ય નિકાલ તરફ મહત્વનું પગલું ભરાયું હતું.
નગર પ્રાથમિક શિક્ષણ સમિતિ સંચાલિત ઉત્રાણની શાળાઓના વાલીઓ અને શિક્ષકોની બનેલી મહારાજા કેમ્પસ ટીમ દ્વારા ઉત્રાણથી કાપોદ્રા તરફ જતા બ્રિજ તેમજ સુદામા ચોકથી ચીકુવાડી તરફ જતા બ્રિજ પર આશરે 150 જેટલા સ્વયંસેવકો તહેનાત રહ્યા હતા. સ્વયંસેવકોએ નાગરિકોને રાખડીઓ નદીમાં ફેંકવા બદલે પોતાની પાસે જમા કરાવવા અપીલ કરી હતી.
અભિયાન દરમિયાન નાગરિકો તરફથી પણ સારો પ્રતિસાદ મળ્યો હતો. અનેક લોકોએ રાખડીઓ શ્રદ્ધાપૂર્વક સ્વયંસેવકોને સોંપી હતી. આયોજકોનું માનવું છે કે રાખડીઓ સાથે પ્લાસ્ટિક અને અન્ય સામગ્રી નદીમાં જવાથી જળચર સૃષ્ટિ પર પ્રતિકૂળ અસર થઈ શકે છે. આથી નદીની સ્વચ્છતા જાળવવા સામૂહિક જવાબદારી સાથે આ પહેલ કરવામાં આવી હતી.
અભિયાન સાથે જોડાયેલા વાલી નીલમકુમાર દલસાણીયાના જણાવ્યા મુજબ, તાપી નદીનું ધાર્મિક અને સામાજિક મહત્વ વિશેષ છે. નદી પ્રત્યેની આસ્થા જળવાઈ રહે અને પર્યાવરણને નુકસાન પણ ન થાય તે હેતુથી બ્રિજ પર રાખડીઓ એકત્ર કરવાનો નિર્ણય લેવાયો હતો.
ટીમના જણાવ્યા મુજબ એકત્રિત થયેલી રાખડીઓનો નદી કે ખુલ્લી જગ્યામાં નિકાલ કરવાને બદલે વૈદિક પદ્ધતિથી માટીમાં વિસર્જન કરી પર્યાવરણને અનુકૂળ રીતે નિકાલ કરવામાં આવશે. પ્રથમ પ્રયાસને મળેલા પ્રતિસાદ બાદ આગામી વર્ષોમાં આ અભિયાનને વધુ મોટા પાયે અને સુવ્યવસ્થિત રીતે ચલાવવાનો નિર્ધાર પણ વ્યક્ત કરવામાં આવ્યો છે.
કોંગોની શાળામાં 29 બાળકો ભડથું થઈ ગયા
ડેમોક્રેટિક રિપબ્લિક ઑફ કોંગોના બુકાવુ શહેરમાં ગુરુવારે બનેલી એક ભયાનક આગની ઘટનાએ અનેક પરિવારોને શોકમાં ગરકાવ કરી દીધા છે. શાળામાં આગ ફાટી નીકળ્યા બાદ બચવા માટે દોડેલા વિદ્યાર્થીઓમાં અફરાતફરી અને નાસભાગ મચી હતી, જેમાં પ્રાથમિક અહેવાલો મુજબ ઓછામાં ઓછા 29 બાળકોનાં મોત થયા છે. આ ઘટનામાં અનેક વિદ્યાર્થીઓ ગૂંગળામણ અને ગંભીર ઇજાઓને કારણે હોસ્પિટલમાં સારવાર હેઠળ છે.
આગ 10 સપ્ટેમ્બર 2026ની સવારે બુકાવુના ચિમ્પુંડા વિસ્તારમાં લાગી હતી. સ્થાનિક અહેવાલો મુજબ આગ ઉજામા પ્રાથમિક શાળા અને ફુરાહા શાળા સુધી ફેલાઈ હતી. નજીકના લાકડાના ઘરોમાં પણ આગ પ્રસરી જતાં મોટા પ્રમાણમાં સંપત્તિનો નાશ થયો હતો. આશરે 300 લાકડાના મકાનો આગની ચપેટમાં આવ્યા હતા.
આગ અને ધુમાડાથી બચવા માટે વિદ્યાર્થીઓએ બહાર નીકળવાનો પ્રયાસ કરતાં ભારે નાસભાગ થઈ હતી. કેટલાક વિદ્યાર્થીઓ એકબીજા પર પડી ગયા હતા, જ્યારે અનેક લોકો ધુમાડાના કારણે બેભાન થયા હતા. સ્થાનિક આરોગ્યકર્મીઓના જણાવ્યા અનુસાર મોટી સંખ્યામાં વિદ્યાર્થીઓને ગંભીર હાલતમાં હોસ્પિટલ પહોંચાડવામાં આવ્યા હતા.
હોસ્પિટલોના સૂત્રોને ટાંકીને મૃત્યુઆંક 29 સુધી પહોંચ્યો છે અને આ આંકડો હજુ પ્રાથમિક છે. એટલે તપાસ અને હોસ્પિટલોમાંથી મળતા નવા આંકડાઓ સાથે મૃત્યુઆંક બદલાઈ શકે છે.
આગનું ચોક્કસ કારણ હજુ જાણી શકાયું નથી. સ્થાનિક સત્તાવાળાઓ અને રાહત ટીમો દ્વારા તપાસ તથા બચાવ કામગીરી ચાલી રહી છે. બુકાવુ હાલમાં AFC/M23ના નિયંત્રણ હેઠળ છે.
80s Retro Photo Trend પાછળ છુપાયેલું મોટું જોખમ, AIમાં ફોટો આપતા પહેલા સાવધાન
સોશિયલ મીડિયાનો 80ના દાયકાનો રેટ્રો AI ટ્રેન્ડ તમને થોડી સેકન્ડમાં જૂના જમાનાની સ્ટાઇલમાં પહોંચાડી શકે છે, પરંતુ આ મજાની તસવીર પાછળ તમારી પ્રાઇવસીનો સવાલ છુપાયેલો છે. હાલ Instagram સહિત સોશિયલ મીડિયા પર 80s લુકવાળી AI તસવીરોનો ટ્રેન્ડ ઝડપથી વાયરલ થઈ રહ્યો છે.
આ ટ્રેન્ડમાં યુઝર્સ પોતાની તસવીર AI ટૂલમાં અપલોડ કરીને જૂના ફિલ્મી લુક, વિન્ટેજ કપડાં, હેરસ્ટાઇલ, કોલેજ કેમ્પસ, જૂના કેમેરા અને રેટ્રો બેકગ્રાઉન્ડ સાથે નવી તસવીર બનાવી રહ્યા છે. ખાસ કરીને ChatGPT જેવા AI ટૂલ્સમાં ટેક્સ્ટ પ્રોમ્પ્ટ દ્વારા આ પ્રકારની તસવીરો તૈયાર થઈ રહી છે.
પરંતુ ફોટો અપલોડ કરતાં પહેલાં ડેટા પ્રાઇવસી સમજવી જરૂરી છે. હાઈ-રિઝોલ્યુશન તસવીરમાં ચહેરા સહિત વ્યક્તિગત માહિતી અને આસપાસના સંદર્ભો દેખાઈ શકે છે. કોઈપણ AI સેવા વાપરતા પહેલાં તેની પ્રાઇવસી પોલિસી, ડેટા સ્ટોરેજ અને ડિલીટ કરવાની નીતિ તપાસવી જોઈએ.
OpenAI મુજબ ChatGPTમાં “Improve the model for everyone” વિકલ્પ બંધ કરી શકાય છે. Temporary Chatનો ઉપયોગ કરવાથી વાતચીત મોડલ ટ્રેનિંગ માટે વપરાતી નથી અને તે 30 દિવસમાં સિસ્ટમમાંથી ડિલીટ થાય છે.
Google Geminiમાં પણ કેટલીક ચેટ્સ માનવીય સમીક્ષા માટે પસંદ થઈ શકે છે અને આવી સમીક્ષા કરાયેલી ચેટ્સ ત્રણ વર્ષ સુધી રાખવામાં આવી શકે છે. Google સંવેદનશીલ અથવા ગોપનીય માહિતી શેર ન કરવાની સલાહ આપે છે.
તેથી ટ્રેન્ડમાં જોડાવા પહેલાં અજાણી એપમાં વ્યક્તિગત અથવા પરિવારની તસવીરો અપલોડ કરવાને બદલે વિશ્વસનીય પ્લેટફોર્મની સેટિંગ્સ અને પ્રાઇવસી પોલિસી ચોક્કસ તપાસો.
સુરતની શ્યામ સંગીની ટેક્સટાઇલ માર્કેટમા લાગેલી આગનું રહસ્ય ખૂલ્યું !
સુરત-કડોદરા રોડ પર સારોલીના કુંભારીયા ત્રણ રસ્તા પાસે આવેલી શ્યામ સંગીની ટેક્સટાઇલ માર્કેટમાં 9 સપ્ટેમ્બરની મોડી રાત્રે લાગેલી ભીષણ આગને લઈને ચોંકાવનારો ખુલાસો થયો છે. શરૂઆતમાં આગ અકસ્માતે લાગી હોવાનું માનવામાં આવી રહ્યું હતું, પરંતુ CCTV ફૂટેજની તપાસમાં એક અજાણ્યો વ્યક્તિ માર્કેટના છઠ્ઠા માળે કાપડના પાર્સલમાં જ્વલનશીલ પ્રવાહી છાંટીને આગ લગાવતો હોવાનું સામે આવ્યું છે. પ્રાથમિક અંદાજ મુજબ આગ અને ત્યારબાદના ધુમાડા તથા પાણીના છંટકાવને કારણે ચાર મોટા વેપારીઓનો ₹24 કરોડથી વધુનો કાપડનો જથ્થો બરબાદ થયો છે. સમગ્ર મામલે સારોલી પોલીસે ગુનો નોંધી આરોપીની શોધખોળ શરૂ કરી છે.
CCTV તપાસમાં સામે આવ્યું છે કે 8 સપ્ટેમ્બરની રાત્રે 8:57 વાગ્યે ખભા પર બેગ અને મોઢા પર સફેદ રૂમાલ બાંધેલો એક અજાણ્યો વ્યક્તિ માર્કેટમાં પ્રવેશ્યો હતો. ત્યારબાદ મધરાતે 12:20 વાગ્યે તે છઠ્ઠા માળના પેસેજમાં પહોંચ્યો હતો. અહીં તેણે બેગમાંથી બોટલ જેવી વસ્તુ કાઢી પેસેજમાં પડેલા કાપડના પાર્સલ પર જ્વલનશીલ પ્રવાહી જેવી વસ્તુ છાંટી અને આગ લગાવી દીધી હતી. આગ ઝડપથી ફેલાતા માત્ર ચાર મિનિટ બાદ, એટલે કે 12:24 વાગ્યે, તે શખસ ત્યાંથી ફરાર થઈ ગયો હતો.
રાત્રે 12:41 વાગ્યે દુકાન નંબર 626ના માલિક રૂપેશ સિંઘે મેનેજર રાહુલકુમાર પાંડેને આગની જાણ કરી હતી. ત્યારબાદ પોલીસ કંટ્રોલ રૂમ 112 અને ફાયર વિભાગને જાણ કરવામાં આવી હતી. આગ છઠ્ઠા માળના પેસેજમાંથી દુકાન નંબર 601થી 617 સુધી ફેલાઈ હતી. ફાયર વિભાગે ભારે જહેમત બાદ 9 સપ્ટેમ્બરની સાંજે આગ પર સંપૂર્ણ કાબૂ મેળવ્યો હતો. આગ ઉપરાંત ધુમાડો અને પાણીના કારણે પણ મોટી માત્રામાં કાપડનો માલ ખરાબ થયો હતો.
પ્રાથમિક નુકસાનના અંદાજ મુજબ અનુરાગ વિજય જલાનને દુકાન નં. 606થી 609 અને 610થી 613માં આશરે ₹12 કરોડનું નુકસાન થયું છે. હનુમાનપ્રસાદ દ્વારકાપ્રસાદ ઝવરને દુકાન નં. 603, 604, 605 અને 614માં આશરે ₹6 કરોડનું નુકસાન થયું છે. હરીપ્રસાદ ભવરલાલ ઝવરને દુકાન નં. 601 અને 602માં આશરે ₹4 કરોડનું નુકસાન થયું છે, જ્યારે અભિષેક બ્રિજમોહન સોનીને દુકાન નં. 616 અને 617માં આશરે ₹2 કરોડનું નુકસાન થયું છે. આ ઉપરાંત બિલ્ડિંગના સ્ટ્રક્ચર, સીલિંગ, ઇલેક્ટ્રિક વાયરિંગ, લિફ્ટ અને દિવાલોને થયેલા નુકસાનનું મૂલ્યાંકન ચાલી રહ્યું છે.
ASI અજીતભાઇ ઠાકોરભાઇની ફરિયાદના આધારે સારોલી પોલીસ મથકે અજાણ્યા વ્યક્તિ વિરુદ્ધ BNSની કલમ 326(G) અને 54 હેઠળ ગુનો નોંધવામાં આવ્યો છે. પોલીસ હવે આરોપીની ઓળખ માટે CCTV, ટેકનિકલ સર્વેલન્સ, મોબાઇલ ટાવર ડમ્પ અને માર્કેટના સિક્યોરિટી રજિસ્ટરની એન્ટ્રીઓ તપાસી રહી છે. આગ પાછળ અંગત અદાવત, વેપારી વિવાદ કે અન્ય કોઈ કારણ છે કે કેમ તે દિશામાં પણ તપાસ ચાલી રહી છે.
