નેપાળના બાજુરા જિલ્લામાં ચોમાસાની વચ્ચે કુદરતનો એવો ખોફનાક નજારો જોવા મળ્યો કે થોડી ક્ષણો માટે બધાના શ્વાસ અધ્ધર થઈ ગયા હતા. પહાડ પરથી અચાનક એક વિશાળ ખડક ધડાકાભેર નીચે આવી અને રસ્તા બસ સાથે અથડાઈ હતી.ખડકની ટક્કર એટલી જોરદાર હતી કે બસ સંપૂર્ણપણે ક્ષતિગ્રસ્ત થઈ ગઈ હતી જેનો વીડિયો પણ સામે આવ્યો છે.
આ ઘટના બાજુરા જિલ્લાના જગન્નાથ ગ્રામ્ય નગરપાલિકા-5ના ભુકાહા ખોલા વિસ્તારમાં બની હતી. ચોમાસાને કારણે પહાડી વિસ્તારમાં અચાનક ભૂસ્ખલન થયું હતું. આ દરમિયાન પહાડ પરથી ભારે ભરખમ ખડક તૂટીને સીધી રસ્તા પર આવી અને ત્યાં ઊભેલી મિડ-વેસ્ટર્ન ટ્રાન્સપોર્ટની બસને પોતાની ઝપેટમાં લઈ લીધી હતી.
સદનસીબે અકસ્માત થયો ત્યારે બસમાં એકપણ મુસાફર કે ડ્રાઇવર હાજર નહોતા અને મોટી જાનહાનિ ટળી હતી.
ચટ્ટાન બસ પર પડતાં વાહનને ભારે નુકસાન થયું હતું. ઘટનાના પગલે રસ્તા પર વાહનવ્યવહાર પણ થોડા સમય માટે ખોરવાયો હતો. સ્થાનિક સ્તરે ચોમાસા દરમિયાન પહાડી વિસ્તારોમાં ભૂસ્ખલન અને ચટ્ટાન ધસી પડવાની ઘટનાઓને લઈને સાવચેતી રાખવાની અપીલ કરવામાં આવી છે.
