Video 🚨 કોલંબિયામાં 7.4નો વિનાશક ભૂકંપ, 111નાં મોત; અનેક વિસ્તારોમાં ભારે તબાહી

દક્ષિણ અમેરિકાના દેશ કોલંબિયામાં સોમવારે આવેલા 7.4ની તીવ્રતાના શક્તિશાળી ભૂકંપે ભારે તબાહી મચાવી છે. ભૂકંપનું કેન્દ્ર ચૉકો પ્રાંતના San José del Palmar નજીક હોવાનું જણાવાયું છે. ભૂકંપના જોરદાર આંચકા કોલંબિયાની રાજધાની બોગોટા સહિત અનેક શહેરોમાં અનુભવાયા હતા.

ભૂકંપ બાદ લોકોમાં ભારે ગભરાટ ફેલાયો હતો અને અનેક લોકો સુરક્ષિત સ્થળોએ પહોંચવા માટે ઘરો તથા ઇમારતોમાંથી બહાર દોડી આવ્યા હતા. કેટલીક ઇમારતો ધરાશાયી થઈ છે, જ્યારે સેંકડો મકાનો અને અન્ય ઈન્ફ્રાસ્ટ્રક્ચરને નુકસાન થયું છે.

તાજા અહેવાલ મુજબ મૃત્યુઆંક 111 પર પહોંચી ગયો છે અને 87 લોકો ઈજાગ્રસ્ત થયા છે. અનેક લોકો કાટમાળ નીચે ફસાયા હોવાની આશંકા વચ્ચે પોલીસ, ફાયર બ્રિગેડ, બચાવકર્મીઓ અને સ્થાનિક લોકો દ્વારા સર્ચ અને રેસ્ક્યૂ ઓપરેશન હાથ ધરવામાં આવ્યું છે.

ભૂકંપના કારણે 1,575 જેટલા ઘરોને નુકસાન થયું હોવાનું અધિકારીઓએ જણાવ્યું છે. આ ઉપરાંત છ એરપોર્ટના ઈન્ફ્રાસ્ટ્રક્ચરને પણ નુકસાન થતાં ત્યાં ફ્લાઇટ કામગીરી અટકાવવામાં આવી હતી. સરકાર દ્વારા રાહત અને બચાવ કામગીરી ઝડપી બનાવવા રાષ્ટ્રીય આપત્તિ જાહેર કરવામાં આવી છે.

ભૂકંપ બાદ આફ્ટરશોક્સ પણ નોંધાયા છે. અધિકારીઓ અને બચાવ ટીમો અસરગ્રસ્ત વિસ્તારોમાં સતત કામગીરી કરી રહી છે અને નુકસાન તથા જાનહાનિનો આંકડો હજુ બદલાઈ શકે છે.

કોલંબિયાના આ ભૂકંપને 21મી સદીમાં દેશને અસર કરનારા સૌથી શક્તિશાળી ભૂકંપોમાંનો એક ગણાવવામાં આવી રહ્યો છે.