સીરિયાના પૂર્વ રાષ્ટ્રપતિ બશર અલ-અસદ , તેમના ભાઈ મહેર અલ-અસદ અને તેમના પિતરાઈ ભાઈ તથા પૂર્વ સુરક્ષા અધિકારી અતેફ નજીબને મોતની સજા ફટકારી છે. બશર અને મહેરને તેમની ગેરહાજરીમાં સજા સંભળાવવામાં આવી છે.
કોર્ટના જણાવ્યા અનુસાર બશર અલ-અસદને પૂર્વયોજિત હત્યા, ત્રાસ અને માનવતા વિરુદ્ધના ગુનાઓ સહિતના ગંભીર આરોપોમાં દોષિત ઠેરવવામાં આવ્યા છે. ન્યાયાધીશે સાક્ષીઓના નિવેદનોના આધારે જણાવ્યું કે બશર અલ-અસદ સૌથી ઉચ્ચ સ્તરના નિર્ણયકર્તા હતા અને રાજ્યની સંસ્થાઓનો ઉપયોગ કથિત ગુનાઓ માટે કરવામાં આવ્યો હતો. તેઓ ડિસેમ્બર 2024માં સત્તા પરથી હટ્યા બાદ રશિયામાં નિર્વાસિત જીવન જીવી રહ્યા છે.
મહેર અલ-અસદને પણ પૂર્વયોજિત હત્યા અને ત્રાસના આરોપોમાં ગેરહાજરીમાં મોતની સજા આપવામાં આવી છે. બીજી તરફ, અતેફ નજીબને માનવતા વિરુદ્ધના ગુનાઓ બદલ સજા સંભળાવવામાં આવી. નજીબ દક્ષિણ સીરિયાના દારા પ્રાંતમાં રાજકીય સુરક્ષા વિભાગના વડા રહી ચૂક્યા હતા અને 2011માં સરકાર વિરોધી પ્રદર્શનોના દમન સાથે તેમનું નામ જોડાયેલું છે.
આ કેસને સીરિયાની નવી સંક્રમણકાળીન સરકાર હેઠળ પૂર્વ અસદ સરકારના અધિકારીઓ સામે ચાલેલી કાર્યવાહીનો મહત્વપૂર્ણ પ્રથમ ચુકાદો માનવામાં આવી રહ્યો છે. 2011માં શરૂ થયેલા બળવા બાદ સીરિયા લગભગ 14 વર્ષ સુધી વિનાશક યુદ્ધમાંથી પસાર થયું હતું. હવે આ ચુકાદો પીડિતો માટે ન્યાયની પ્રક્રિયામાં મહત્વપૂર્ણ કાનૂની ઉદાહરણ બની શકે છે.
જોકે બશર અને મહેર રશિયામાં હોવાને કારણે સજાનો તાત્કાલિક અમલ કેવી રીતે થશે તે મોટો પ્રશ્ન છે. તેમ છતાં, આ ચુકાદાએ અસદ શાસન દરમિયાન થયેલા કથિત અત્યાચારોની જવાબદારી નક્કી કરવાની દિશામાં ઐતિહાસિક પગલું ભર્યું છે.
