ભારતીય તબીબી ક્ષેત્રે એક ઐતિહાસિક સફળતા નોંધાઈ છે. દિલ્હીની AIIMS હોસ્પિટલના નિષ્ણાત ડોક્ટરોએ ગર્ભમાં જ બાળકની ગંભીર કરોડરજ્જુની ખામીનું સફળતાપૂર્વક ઓપરેશન કર્યું છે. આ પ્રકારની સર્જરી ભારતમાં પ્રથમ વખત કરવામાં આવી હોવાનું જણાવાયું છે.
આ સર્જરીમાં 25 અઠવાડિયાના ગર્ભસ્થ બાળકનું ઓપરેશન કરવામાં આવ્યું હતું. બાળક હજુ માતાના ગર્ભમાં જ હતું ત્યારે તેની કરોડરજ્જુમાં રહેલી ગંભીર ખામીને સુધારવા માટે ડોક્ટરોએ લગભગ છ કલાક સુધી જટિલ સર્જરી કરી હતી.
30થી વધુ નિષ્ણાતોની ટીમે સર્જરી કરી
આ જટિલ ઓપરેશનમાં 30થી વધુ ડોક્ટરો, નર્સો અને વિવિધ વિભાગના નિષ્ણાતો જોડાયા હતા. ન્યુરોસર્જન ડૉ. દીપક ગુપ્તાના નેતૃત્વમાં સર્જરી કરવામાં આવી હતી. આ સમગ્ર પ્રક્રિયા માટે પાંચ અઠવાડિયાથી વધુ સમય સુધી તૈયારી અને આયોજન કરવામાં આવ્યું હતું.
વિનામૂલ્યે કરવામાં આવ્યું ઓપરેશન
ખાસ વાત એ છે કે આ જટિલ સર્જરી પરિવાર પાસેથી કોઈ ખર્ચ લીધા વિના કરવામાં આવી હતી. કેન્દ્ર સરકારની ‘જનની શિશુ સુરક્ષા કાર્યક્રમ’ યોજના હેઠળ આ સારવાર વિનામૂલ્યે પૂરી પાડવામાં આવી હતી.
સર્જરી બાદ માતા અને ગર્ભસ્થ બાળક બંનેની સ્થિતિ સ્થિર હોવાનું જાણવા મળ્યું છે. જોકે, ગર્ભાવસ્થાના બાકીના સમયગાળા દરમિયાન માતા અને બાળકની તબીબી ટીમ દ્વારા સતત દેખરેખ રાખવામાં આવશે.
આ સફળતા ભારતીય તબીબી ક્ષેત્ર માટે મોટી સિદ્ધિ માનવામાં આવી રહી છે. હવે ભારતમાં પણ પસંદગીના કિસ્સાઓમાં જન્મ પહેલાં જ બાળકની ગંભીર ખામીઓની સારવાર કરવાની નવી શક્યતાઓ ઊભી થઈ છે.








