ભારતીય રિઝર્વ બેંક (RBI)એ નિયમોનું પાલન કરવામાં ખામી બદલ કેનેરા બેંક સામે કાર્યવાહી કરતાં ₹41.8 લાખનો દંડ ફટકાર્યો છે. બેંકની 31 માર્ચ, 2025 સુધીની નાણાકીય સ્થિતિના આધારે કરવામાં આવેલી સુપરવાઇઝરી ઇવેલ્યૂશન (ISE 2025) દરમિયાન કેટલીક ગંભીર અનિયમિતતાઓ સામે આવી હતી.
RBIના જણાવ્યા મુજબ, કેનેરા બેંકે કેટલાક ગ્રાહકોના KYC (નો યોર કસ્ટમર) રેકોર્ડ નિર્ધારિત સમયમર્યાદામાં સેન્ટ્રલ KYC રેકોર્ડ્સ રજિસ્ટ્રી (CKYCR)માં અપલોડ કર્યા નહોતા. આ ઉપરાંત બેંકે કેટલાક ખાતાઓને ‘ઇનઓપરેટિવ’ તરીકે વર્ગીકૃત કર્યા હતા, જ્યારે તે ખાતાઓમાં ખાતાધારકો દ્વારા છેલ્લા એક વર્ષ દરમિયાન ટ્રાન્ઝેક્શન કરવામાં આવ્યા હતા.
રિઝર્વ બેંકે આ ખામીઓને બેંકિંગ નિયમો અને માર્ગદર્શિકાના ઉલ્લંઘન તરીકે ગણાવી કાર્યવાહી કરી છે. RBIએ સ્પષ્ટ કર્યું છે કે આ દંડનો સંબંધ નિયમનકારી પાલનમાં થયેલી ખામી સાથે છે અને તેનો ગ્રાહકોના ખાતા અથવા વ્યવહારો પર કોઈ સીધો પ્રભાવ પડશે નહીં.
બેંકિંગ ક્ષેત્રમાં પારદર્શિતા અને ગ્રાહકોની સુરક્ષા સુનિશ્ચિત કરવા માટે RBI સમયાંતરે બેંકોની કામગીરીની સમીક્ષા કરે છે અને નિયમોના ઉલ્લંઘનના કિસ્સામાં જરૂરી પગલાં લે છે.
