દિલ્હીના ઈન્દ્રલોક વિસ્તારમાં રોડ પર શુક્રવારે નમાઝ પઢનારા નમાઝીઓને લાત મારનારા સબ ઈન્સ્પેક્ટરને સસ્પેન્ડ કરી દેવાયા છે. આ બનાવનો વીડિયો સોશિયલ મીડિયામાં વાયરલ થયો છે. વાયરલ થયેલા વીડિયોમાં જોઈ શકાય છે કે, દિલ્હીમાં રોડ પર નમાઝ અદા કરી રહેલા નમાઝીઓને પોલીસકર્મી લાત મારી રહ્યો છે.
આ મામલે વિવાદ વધી જતાં પોલીસે તપાસના આદેશ આપ્યા હતા અને ત્યાર બાદ આરોપી સબ- ઈન્સ્પેક્ટરને સસ્પેન્ડ કરવામાં આવ્યા છે. બીજી તરફ, મુસ્લિમ સમાજના લોકોએ હોબાળો મચાવ્યો હતો અને પોલીસ સ્ટેશનનો ઘેરાવ કર્યો હતો. સબ-ઇન્સ્પેક્ટરની ગેરવર્તણૂક પછી ઘણા લોકો ત્યાં ભેગા થાય છે અને તેની સાથે દલીલ કરે છે. ઘણા લોકોએ પોલીસકર્મીનો વીડિયો બનાવ્યો હતો. વીડિયોમાં એક વ્યક્તિનો અવાજ સંભળાઈ રહ્યો છે કે – ‘આ પોલીસકર્મી નમાઝ કરી રહેલા લોકોને લાત મારી રહ્યો છે.
આ પહેલા ડીસીપી મીણાએ પ્રદર્શનકારીઓ સાથે પણ મુલાકાત કરી હતી અને તેમણે આરોપીઓ વિરૂદ્ધ કડક કાર્યવાહીનો ભરોસો વ્યક્ત કર્યો હતો. ત્યારે, દિલ્હી કોંગ્રેસે આ શરમજનક ગણાવતા કહ્યું કે, દિલ્હી પોલીસના જવાનો નમાઝ અદા કરી રહેલા વ્યક્તિઓને હટાવી રહ્યા છે અને લાત મારી રહ્યા છે. તેનાથી વધુ શરમજનક વાત બીજી શું હોય શકે છે.
પોલીસકર્મીની અભદ્રતા પર લોકોએ હંગામો મચાવ્યો જે બાદ સાથે રહેલા જવાનો ત્યાંથી નાસી છૂટયા હતા. આ ઘટનાથી ગુસ્સે ભરાયેલા લોકો ઈન્દ્રલોક પોલીસ સ્ટેશન પહોંચ્યા અને હંગામો મચાવ્યો. મામલાની ગંભીરતા જોઈને પોલીસ અધિકારીઓ તાત્કાલિક પોલીસ સ્ટેશન પહોંચ્યા અને લોકોને શાંત પાડવા લાગ્યા. તેમજ આરોપી પોલીસકર્મીને તાત્કાલિક સસ્પેન્ડ કરી દેવામાં આવ્યો હતો.
આ પણ વાંચો :-