ફરી એકવાર ધરતી ધણધણી છે. સવારના સમયમાં જ શક્તિશાળી ભૂકંપથી લોકોમાં ભયનો માહોલ સર્જાયો હતો. ભૂકંપને કારણે લોકો પોતાના ઘરની બહાર દોડી ગયા હતા.
ઇન્ડોનેશિયાના સુલાવેસી ટાપુ પર આજે વહેલી સવારે 6.7ની તીવ્રતાનો શક્તિશાળી ભૂકંપ આવ્યો હતો. ઇન્ડોનેશિયાની ભૂ-ભૌતિક એજન્સી (BMKG) અને વિવિધ મીડિયા અહેવાલો અનુસાર, ભૂકંપનું કેન્દ્ર મધ્ય સુલાવેસીના પાલુ શહેરથી આશરે 42 કિલોમીટર દક્ષિણપૂર્વમાં અને લગભગ 10 કિલોમીટરની ઊંડાઈએ હતું. નેશનલ સેન્ટર ફોર સિસ્મોલોજી (NCS) દ્વારા જાહેર કરાયેલી માહિતી અનુસાર, ભૂકંપ ભારતીય સમય મુજબ સવારે 8:57 વાગ્યાની આસપાસ આવ્યો હતો. NCSએ ભૂકંપનું કેન્દ્ર 1.073 ડિગ્રી દક્ષિણ અક્ષાંશ તથા 120.263 ડિગ્રી પૂર્વ રેખાંશ પર હોવાનું જણાવ્યું હતું.
ભૂકંપના જોરદાર આંચકાઓ પાલુ, સિગી, ડોંગગાલા અને તોજો-ઉના-ઉના સહિતના વિસ્તારોમાં અનુભવાયા હતા. સ્થાનિક મીડિયા અહેવાલો અનુસાર, ધ્રુજારી અનુભવાતા જ લોકો ગભરાઈને પોતાના ઘરો અને ઇમારતોમાંથી બહાર નીકળી ખુલ્લા સ્થળોએ પહોંચ્યા હતા. અધિકારીઓ હાલમાં અસરગ્રસ્ત વિસ્તારોમાં સ્થિતિનું મૂલ્યાંકન કરી રહ્યા છે. જોકે આ અહેવાલ લખાય ત્યાં સુધી કોઈ જાનહાનિ, ઇજા અથવા મોટા પ્રમાણમાં મિલકતી નુકસાનના તાત્કાલિક અહેવાલ પ્રાપ્ત થયા નથી. તેમ છતાં, આફ્ટરશોક્સની સંભાવનાને ધ્યાનમાં રાખીને સ્થાનિક તંત્ર સતર્ક છે.
દક્ષિણપૂર્વ એશિયામાં બીજો મોટો ભૂકંપ
ઉલ્લેખનીય છે કે દક્ષિણપૂર્વ એશિયામાં આ મહિનામાં નોંધાયેલો આ બીજો મોટો ભૂકંપ છે. અગાઉ 8 જૂને ફિલિપાઇન્સમાં પણ શક્તિશાળી ભૂકંપ નોંધાયો હતો, જેના કારણે સમગ્ર વિસ્તારમાં ચિંતા વધી હતી. આ દરમિયાન, ઇન્ડોનેશિયાના સુમાત્રા ટાપુ નજીક પણ તાજેતરમાં રિક્ટર સ્કેલ પર 6.1ની તીવ્રતાનો ભૂકંપ આવ્યો હતો.
સુમાત્રા અને સુલાવેસી સહિતનો વિસ્તાર પ્રશાંત મહાસાગરના પ્રખ્યાત “રિંગ ઓફ ફાયર” વિસ્તારમાં આવેલો છે, જ્યાં અનેક ટેક્ટોનિક પ્લેટો મળતી હોવાથી ભૂકંપ અને જ્વાળામુખી પ્રવૃત્તિ વારંવાર જોવા મળે છે. એક્સપર્ટનું માનવું છે કે આવા શક્તિશાળી ભૂકંપ બાદ કેટલાક દિવસો સુધી આફ્ટરશોક્સ આવી શકે છે. તેથી સ્થાનિક રહેવાસીઓને સાવચેત રહેવા અને સત્તાવાર સૂચનાઓનું પાલન કરવા અપીલ કરવામાં આવી છે.
