લોકસભા ચૂંટણીના છઠ્ઠા તબક્કામાં રાષ્ટ્રીય રાજધાની દિલ્હી અને હરિયાણાની બેઠકો ઉપરાંત ઉત્તર પ્રદેશની ૧૪, પશ્ચિમ બંગાળમાં જંગલ મહલ પ્રદેશ અને બિહારની ૮-૮, ઓડિશાની છ, ઝારખંડની ચાર અને જમ્મુ-કાશ્મીરની એક બેઠક પર મતદાન થશે. છઠ્ઠા તબક્કામાં ૫.૮૪ કરોડ પુરુષો અને ૫.૨૯  કરોડ મહિલાઓ સહિત કુલ ૧૧.૧૩ કરોડ મતદારો તેમના મતાધિકારનો ઉપયોગ કરે તેવી શક્યતા છે. ચૂંટણી પંચે કુલ ૧.૧૪ લાખ મતદાન મથકો પર ૧૧.૪ લાખ પોલિંગ અધિકારીઓ નિયુક્ત કર્યા છે.

ચૂંટણી પંચે ૧ વાગ્યા સુધીના મતદાનના આંકડા જાહેર કરી દીધા છે. ભારે ગરમી વચ્ચે પણ મતદારોનો ઉત્સાહ ઊંચો જોવા મળી રહ્યો છે. અત્યાર સુધીમાં સૌથી વધુ મતદાન પ.બંગાળમાં ૫૪.૮૦% નોંધાયું છે. જ્યારે ઓડિશામાં સૌથી ઓછું ૩૫.૬૯% નોંધાયું છે. સરેરાશ મતદાનની વાત કરીએ તો ૧ વાગ્યા સુધીમાં ૩૯.૧૩% મતદાન નોંધાઈ ચૂક્યું છે.

દિલ્હીના મંત્રી કૈલાશ ગેહલોતે પોતાનો મત આપ્યો અને કહ્યુ- ‘૪૦૦ પાર ક્યાંય દેખવા નથી મળી રહ્યુ. દરેક તબક્કાના મતદાન સાથે ભાજપની બેઠકો ઘટી રહી છે કારણ કે સમગ્ર ચૂંટણી પ્રચારમાં મોંઘવારી અને બેરોજગારીના મુદ્દા પર કોઈ ચર્ચા થઈ નથી. મને વિશ્વાસ છે કે લોકો પરિવર્તન માટે મત આપી રહ્યા છે.

લોકસભા ચૂંટણીમાં સવારે ૧૧ કલાક સુધીમાં સરેરાશ ૨૫.૭૬ ટકા મતદાન થયુ છે. સૌથી વધુ પશ્ચિમ બંગાળમાં ૩૬.૮૮ ટકા મતદાન નોંધાયુ છે. દિલ્હીમાં ૨૧.૬૯ ટકા, ઉત્તર પ્રદેશમાં ૨૭.૦૬ ટકા, ઓડિશામાં ૨૧.૩૦ ટકા, ઝારખંડમાં ૨૭.૮૦ ટકા, જમ્મુ-કાશ્મીરમાં ૨૩.૧૧ ટકા, હરિયાણામાં ૨૨.૦૯ ટકા મતદાન નોંધાયુ છે.

કોંગ્રેસ મહાસચિવ પ્રિયંકા ગાંધીએ દેશવાસીઓને વોટ કરવાની અપીલ કરી છે. તેમણે કહ્યું કે. મારી વહાલી બહેનો, મારા ભાઈઓ, તમારો વોટ દેશનું ભવિષ્ય નક્કી કરે છે. તમારો દરેક મત દેશમાં થઈ રહેલા અન્યાયની વિરુદ્ધમાં આપવો જોઈએ. ખેડૂત હોય, યુવા હોય કે કુસ્તીબાજ હોય ​​- જેમની સાથે અન્યાય થયો છે તેમને ન્યાય અપાવવા માટે મત આપો. તમારો એક મત અન્યાયનો અંત અને ન્યાય સ્થાપિત કરશે.

સાત તબક્કાની લોકસભા ચૂંટણી ૨૦૨૪ના છઠ્ઠા તબક્કામાં, આઠ રાજ્યો અને કેન્દ્રશાસિત પ્રદેશોની કુલ ૫૮ બેઠકો માટે આજે ૨૫ મેના રોજ મતદાન થઈ રહ્યું છે. છઠ્ઠા તબક્કામાં ૮૮૯ ઉમેદવારો ચૂંટણી મેદાનમાં છે. આ તબક્કામાં બિહારની ૮, હરિયાણાની ૧૦, ઝારખંડની ૪, દિલ્હીની ૭, ઓડિશાની ૬, ઉત્તર પ્રદેશની ૧૪, પરિશ્ચમ બંગાળની ૮ અને જમ્મુ-કાશ્મીરની ૧ બેઠક પર મતદાન થઈ રહ્યું છે. મતદાનનો સમય સવારે ૭ થી સાંજના ૬ વાગ્યા સુધીનો છે.

વડાપ્રધાન નરેન્દ્ર મોદીએ તમામ મતદારોને છઠ્ઠા તબક્કાના મતદાન દરમિયાન ઉત્સાહભેર મતદાન કરવાની અપીલ કરી છે. તેણે સોશિયલ મીડિયા પ્લેટફોર્મ X પર લખ્યું છે કે જે કોઈ પણ છઠ્ઠા તબક્કામાં મતદાન કરવા જઈ રહ્યું છે, હું તમને બધાને મોટી સંખ્યામાં બહાર આવવાની અપીલ કરું છું. દરેક મતની કિંમત હોય છે, તમારી કિંમત પણ સમજો. જ્યારે દેશની જનતા ચૂંટણી પ્રક્રિયામાં સક્રિય હોય ત્યારે જ લોકશાહી પ્રગતિ કરી શકે છે. હું ખાસ કરીને મહિલાઓ અને યુવાનોને મતદાન કરવાની અપીલ કરું છું.

કોંગ્રેસના દિગ્ગજ નેતા અને સ્ટાર પ્રચારક પ્રિયંકા ગાંધીએ મતદાન કર્યું હતું. તેમણે મતદાન કર્યા બાદ કહ્યું હતું કે અમે બંધારણ અને લોકશાહી માટે મતદાન કર્યું છે. રાહુલ ગાંધી દ્વારા આપ અને કેજરીવાલ દ્વારા કોંગ્રેસને વોટ આપવા અંગેના સવાલ પર તેમણે કહ્યું કે મને આ વાત પર ગર્વ છે.

મુખ્ય ચૂંટણી કમિશનર રાજીવ કુમારે પરિવાર સાથે મતદાન કર્યું હતું. તેમણે કહ્યું કે, જ્યારે મેં પહેલીવાર મતદાન કર્યુ ત્યારે હું મારા પિતા સાથે ગયો હતો અને આજે તેઓ ૯૫ વર્ષના છે, તેમણે મારી સાથે મતદાન કર્યુ હતું. તે મારા અને દરેક માટે ગર્વની વાત છે. મતદારોએ મતદાન અવશ્ય કરવું જોઈએ. આખા દેશમાં ખૂબ સારું મતદાન થઈ રહ્યું છે, તમે જમ્મુ-કાશ્મીરમાં જુઓ, ત્યાં કેટલું સારુ મતદાન થઈ રહ્યું છે.

પાંચ તબક્કામાં ૨૫ રાજ્યો અને કેન્દ્રશાસિત પ્રદેશોની ૫૪૩ લોકસભા બેઠકોમાંથી ૪૨૮ બેઠકો પર મતદાન યોજાયું છે. ૨૫ મેના રોજ છઠ્ઠા તબક્કાના મતદાન બાદ ૧ જૂને સાતમા અને છેલ્લા તબક્કામાં મતદાન થશે અને ૪ જૂને પરિણામ જાહેર થશે.

અત્યાર સુધી લોકસભાના પાંચ તબક્કા પૂર્ણ થયા છે. ચૂંટણીના પાંચ તબક્કામાં સરેરાશ ૬૫.૯૬ ટકા મતદાન થયું હતું. પાંચમા તબક્કામાં સૌથી ઓછું ૬૨.૨ ટકા મતદાન થયું હતું. ચોથા તબક્કામાં સૌથી વધુ ટકાવારી ૬૯.૧૬ ટકા હતી. તે જ સમયે, પ્રથમ તબક્કામાં ૬૬.૧૪ ટકા, બીજા તબક્કામાં ૬૬.૭૧ ટકા અને ત્રીજા તબક્કામાં ૬૫.૬૮ ટકા મતદાન થયું હતું. ૧ જૂનના રોજ છેલ્લા અને સાતમા તબક્કાનું મતદાન થશે.