વધતી મોંઘવારી વચ્ચે પેટ્રોલ અને ડીઝલના ભાવમાં રાહત મળી છે. નાયરા એનર્જીએ પેટ્રોલ અને ડીઝલના ભાવમાં ઘટાડો કરવાની જાહેરાત કરી છે. કંપનીએ બુધવાર (1 જુલાઈ, 2026)થી દેશભરના 7000 પેટ્રોલ પંપ પર નવા દર અમલમાં મૂક્યા છે. નાયરા એનર્જીએ પેટ્રોલના ભાવમાં પ્રતિ લિટર પાંચ રૂપિયા અને ડીઝલના ભાવમાં ત્રણ રૂપિયાનો ઘટાડો કર્યો છે. જોકે અન્ય સરકારી ઓઇલ કંપનીઓ જેમ કે IOC, HPCL અને BPCLએ હાલ ફ્યુઅલના ભાવમાં કોઈ ફેરફાર કર્યો નથી.

રાજ્યો પ્રમાણે પેટ્રોલ-ડીઝલ પર લાગતા વેટ (VAT) અને અન્ય સ્થાનિક કર અલગ-અલગ હોવાથી દરેક રાજ્યમાં ગ્રાહકોને મળતી રાહતનું પ્રમાણ પણ અલગ હોઈ શકે છે.

સૌથી મોટી ખાનગી ફ્યુઅલ રિટેલર
નાયરા એનર્જી ભારતની સૌથી મોટી ખાનગી ફ્યુઅલ રિટેલ કંપની છે. છેલ્લાં બે વર્ષથી વધુ સમય પછી કોઈ પણ ઓઇલ કંપનીએ પ્રથમ વખત રિટેલ ફ્યુઅલના ભાવમાં ઘટાડો કર્યો છે. કંપનીના જણાવ્યાનુસાર પશ્ચિમ એશિયામાં તણાવ ઘટતા આંતરરાષ્ટ્રીય બજારમાં ક્રૂડ ઓઇલના ભાવમાં ઘટાડો થયો છે, જેને કારણે ગ્રાહકોને રાહત આપવાનો નિર્ણય લેવામાં આવ્યો છે. આ ઉપરાંત વિશ્વના મહત્વપૂર્ણ સમુદ્રી વેપાર માર્ગોમાંના એક સ્ટ્રેટ ઓફ હોર્મુઝ ફરી ખૂલતાં ક્રૂડ ઓઇલ અને લિક્વિફાઇડ નેચરલ ગેસ (LNG)નો પુરવઠો સામાન્ય બન્યો છે. પરિણામે પુરવઠામાં અવરોધની આશંકા ઘટી અને વૈશ્વિક બજારમાં ઓઇલના ભાવ પર દબાણ ઓછું થયું, જેનો લાભ હવે ગ્રાહકોને મળી રહ્યો છે.

કોમર્શિયલ ગેસ સિલિન્ડરમાં પણ રાહત
જુલાઈની શરૂઆત એલપીજી ગ્રાહકો માટે પણ રાહતના સમાચાર લઈને આવી છે. ઓઇલ માર્કેટિંગ કંપનીઓએ 19 કિલોગ્રામના કોમર્શિયલ એલપીજી સિલિન્ડરની કિંમતમાં રૂ. 183.50 સુધીનો ઘટાડો કર્યો છે. આ નિર્ણયથી હોટેલ, રેસ્ટોરાં, ઢાબા અને અન્ય વ્યાવસાયિક સંસ્થાઓને મોટો લાભ મળશે. જોકે 14.2 કિલોગ્રામના ઘરેલુ એલપીજી સિલિન્ડરના ભાવમાં કોઈ ફેરફાર કરવામાં આવ્યો નથી અને તેના દર અગાઉની જેમ યથાવત્ રાખવામાં આવ્યા છે.

સગીરા પર બળાત્કાર કેસમાં આસારામને સુપ્રીમ કોર્ટ તરફથી મોટો ઝટકો લાગ્યો છે. કોર્ટે કહ્યું કે, આસારામને તાત્કાલિક જામીન આપી શકાય નહીં. તે પહેલા રાજસ્થાન સરકારનો પક્ષ સાંભળશે. સુપ્રીમ કોર્ટે રાજસ્થાન સરકારને નોટિસ જાહેર કરી છે.

સુપ્રીમ કોર્ટે કહ્યું કે, “અમે હાલમાં આસારામને જામીન આપી શકતા નથી. પહેલા રાજસ્થાન સરકારનો પક્ષ સાંભળવો જોઈએ. આસારામ એક પ્રભાવશાળી પદ ધરાવે છે; જામીન અરજીની સુનાવણી કરતી વખતે આપણે આનો પણ વિચાર કરવો પડશે.”

સુપ્રીમ કોર્ટે આસારામની વિનંતી ફગાવી
આસારામની અરજી પર સુનાવણી કરતા ન્યાયાધીશ એમએમ સુંદરેશ અને શીલ નાગુની સુપ્રીમ કોર્ટની બેન્ચે તેમની સજા સ્થગિત કરવાનો ઇનકાર કર્યો. બેન્ચે નિર્દેશ આપ્યો કે, અરજદારની તબીબી સેવાઓ જેલમાં ચાલુ રાખવામાં આવે. કોર્ટે કહ્યું કે, જો ગંભીર સ્વાસ્થ્ય સ્થિતિ હોય તો જ જામીન પર વિચાર કરવામાં આવશે.

સ્વાસ્થ્ય કારણોનો ઉલ્લેખ કરીને જામીન માગ્યા
જસ્ટિસ સુંદરેશએ કહ્યું કે, “અમે સજા સ્થગિત કરવાનો વિચાર કરી રહ્યા નથી.” “જો કોઈ ગંભીર કટોકટી હોય, જેમ કે જીવને ખતરો હોય તો જ…શું અમે તેના પર વિચાર કરીશું.” તેમણે રાજ્યને આનો ઉકેલ લાવવા કહ્યું. રાજ્યના વકીલે બેન્ચને જણાવ્યું હતું કે તેમને 2 જૂને હોસ્પિટલમાં લઈ જવામાં આવ્યા હતા અને તેમની તબિયત સારી છે.

આસારામનું પ્રતિનિધિત્વ કરતા દામા શેષાદ્રિ નાયડુએ જણાવ્યું હતું કે, તેઓ 80 વર્ષથી વધુ ઉંમરના છે અને અનેક બીમારીઓથી પીડાય છે. નાયડુએ દાવો કર્યો હતો કે, અરજદાર “સોશિયલ મીડિયા ટ્રાયલ”નો ભોગ બન્યા છે. પીડિતાના વકીલે આ દલીલને નકારી કાઢી હતી, અને નિર્દેશ કર્યો હતો કે, આ કેસમાં સગીર પીડિતાઓ પણ સામેલ છે.

આસારામે રાજસ્થાન હાઈકોર્ટના આદેશને પડકાર્યો
આસારામે 2013ના બળાત્કાર કેસમાં તેમને દોષિત ઠેરવવા અને આજીવન કેદની સજા ફટકારવાના રાજસ્થાન હાઈકોર્ટના આદેશને પડકાર્યો છે. તેમની તબિયત ખરાબ હોવાનો ઉલ્લેખ કરીને, આસારામે વચગાળાની જામીનની પણ માંગ કરી છે.

હાઈકોર્ટે આજીવન કેદની સજાને આપ્યું સમર્થન
મે મહિનામાં રાજસ્થાન હાઈકોર્ટે આસારામને ગેંગરેપ અને પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સીસ (POCSO) એક્ટની કેટલીક જોગવાઈઓમાંથી મુક્ત કર્યા હતા, જ્યારે તેમના સહ-આરોપીઓને નિર્દોષ જાહેર કર્યા હતા. જો કે, બળાત્કાર કેસમાં તેમના ગુનાના નોંધપાત્ર પુરાવાઓને ટાંકીને, નીચલી અદાલત દ્વારા આપવામાં આવેલી આજીવન કેદની સજાને સમર્થન આપ્યું હતું.

સોમવારે યુકેનમાં રશિયન મિસાઈલો અને ડ્રોન દ્વારા વિનાશ મચાવ્યો હતો. જેમાં ૧૨ લોકો માર્યા ગયા અને 40 ઘાયલ થયા. રાષ્ટ્રપતિ વોલોડીમીર ઝેલેન્સકીએ આ હુમલાઓને ભયાનક ગણાવ્યા હતા. રશિયાએ ચાર વર્ષ પહેલા યુકેન પર આક્રમણ શરૂ કર્યું હતું. યુએનના ડેટા અનુસાર, આ યુદ્ધમાં 16,000 થી વધુ યુક્રેનિયન નાગરિકો માર્યા ગયા છે. રશિયા યુકેનના માળખાકીય સુવિધાઓનો નાશ કરવાનું અને લોકોનું મનોબળ ઘટાડવાનું ચાલુ રાખે છે.

રશિયન મિસાઇલોએ ડિનિપ્રો શહેરમાં માળખાગત સુવિધાઓને નિશાન બનાવી હતી. આ હુમલામાં છ લોકો માર્યા ગયા અને ૨૯ ઘાયલ થયા. ઝાપોરિઝિઝયા શહેરમાં રશિયન ડ્રોન એક પેસેન્જર બસ સાથે અથડાયા. જેમાં એક બાળક સહિત ત્રણ લોકો માર્યા ગયા અને છ અન્ય ઘાયલ થયા. સુમી પ્રદેશમાં ડ્રોન હુમલામાં એક વૃદ્ધ મહિલા અને એક પુરુષનું મૌત થયું, ખાર્કિવના મેયરે અહેવાલ આપ્યો કે ત્યાં દિવસના સમયે થયેલા હુમલામાં એક વ્યક્તિનું મોત થયું છે અને પાંચ અન્ય ઘાયલ થયા છે. છ અન્ય યુક્રેનિયન પ્રદેશોમાં પણ જીવલેણ હુમલા થયા છે.

આ રશિયન ડુમલાઓએ આઠ ચુકેનિયન પ્રદેશોમાં વીજ પુરવઠો ખોરવી નાખ્યો છે. તીવ્ર ગરમીને કારણે લોકોને એર કંડિશનરનો ઉપયોગ કરવાની ફરજ પડી છે, જેના કારણે વીજળીની માંગમાં નોંધપાત્ર વધારો થયો છે. રાષ્ટ્રપતિ ઝેલેન્સકીએ ફરી એકવાર યુરોપને અપીલ કરી છે. તેમણે કહ્યું કે યુરોપે રશિયન બેલિસ્ટિક મિસાઇલોને રોકવા માટે તેના સંરક્ષણ અને મિસાઈલ સિસ્ટમને મજબૂત બનાવવી જોઈએ. તેમણે ભાર મૂક્યો કે લોકોને આ ભયાનક હુમલાઓથી બચાવવા માટે એન્ટિ-બેલિસ્ટિક ક્ષમતાઓની તાત્કાલિક જરૂર છે.

છેલ્લા કેટલાક મહિનામાં યુદ્ધમાં પરિસ્થિતિ બદલાઈ ગઈ છે. યુકેને રશિયન તેલ સ્થાપનો પર ડ્રોન હુમલાઓ તીવ્ર બનાવ્યા છે. આ હુમલાઓને કારણે રશિયા અને તેના કબજા હેઠળના પ્રદેશોમાં ઇંધણની તીવ્ર અછત સર્જાઈ છે. રશિયન રાષ્ટ્રપતિ વ્લાદિમીર પુતિને પહેલીવાર સ્વીકાર્યું કે યુકેનના હુમલાઓએ રશિયામાં ઇંધણ સંકટ પેદા કર્યું છે. પેટ્રોલ સ્ટેશનો પર લાંબી કતારો લાગી રહી છે અને લોકોનો ગુસ્સો પ્રબળ છે. આ છતાં, પુતિને સ્પષ્ટપણે હાર માનવાનો ઇનકાર કર્યો છે. તેમણે કહ્યું કે રશિયા આખરે આ યુદ્ધ જીતશે. કેમલિનના પ્રવકતા દિમિત્રી પેસ્કોવે એમ પણ કહ્યું કે રશિયાનો ઉદ્દેશ્ય બદલાયો નથી અને તેની સેના આગળ વધતી રહેશે.

IPLમાં પંજાબ કિંગ્સ તરફથી રમતા ક્રિકેટર શશાંક સિંહ અને તેમના નિવૃત્ત IPS અધિકારી પિતા શૈલેષ સિંહ વિરુદ્ધ ભોપાલમાં FIR દાખલ કરવામાં આવી છે. આરોપ છે કે તેઓએ તેમના ઘરના રસોઈયા સાથે મારપીટ કરી, અપશબ્દો બોલ્યા અને કામ કરાવવા દબાણ કર્યું. ફરિયાદના આધારે પોલીસે કેસ નોંધ્યો છે અને તપાસ શરૂ કરી છે.

આ કેસ ભોપાલના રાતિબડ પોલીસ સ્ટેશનમાં નોંધવામાં આવ્યો છે, જ્યાં પીડિત રસોઈયા વિપેન્દ્ર સિંહે ફરિયાદ નોંધાવી છે. પીડિતનો આરોપ છે કે શશાંક સિંહ, તેના પિતા શૈલેષ સિંહ અને તેમના ડ્રાઇવર મિશ્રાએ તેમના પર હુમલો કર્યો અને અપશબ્દોનો ઉપયોગ કર્યો. વિપેન્દ્ર સિંહનો દાવો છે કે તેમને નોકરીના બહાને ભોપાલ બોલાવવામાં આવ્યો હતો.

વિપેન્દ્ર સિંહે દાવો કર્યો હતો કે તેમને રેવાથી ભોપાલ બોલાવવામાં આવ્યો હતો. તેમને એક પરિચિત દ્વારા કહેવામાં આવ્યું હતું કે તેમને શૈલેષ સિંહના ઘરે રસોઈયા તરીકે નોકરી આપવામાં આવશે અને ભવિષ્યમાં તેમને સરકારી નોકરીમાં મદદ કરવામાં આવશે. તેમને દર મહિને 15,000 રૂપિયા પગાર, રહેવા અને ખાવાનુ આપવાનું વચન આપવામાં આવ્યું હતું.

પીડિતના જણાવ્યા મુજબ, કામ શરૂ કર્યાના કલાકોમાં જ તેને સતત કામનું દબાણ આપવામાં આવતું હતું. તેણે જણાવ્યું હતું કે ઘરમાં પહેલેથી જ કામ કરતા રસોઈયા સાથે પણ દુર્વ્યવહાર કરવામાં આવી રહ્યો હતો. જ્યારે તેણે નોકરી છોડવાનું કહ્યું તો તેને ધમકી આપવામાં આવી અને પૂછવામાં આવ્યું, “જો તમે કામ કરવા માંગતા નથી તો તમે અહીં કેમ આવ્યા?”

વિપેન્દ્ર સિંહે આરોપ લગાવ્યો કે તેનો મોબાઇલ ફોન છીનવી લેવામાં આવ્યો અને તેને કામ કરવા માટે દબાણ કરવામાં આવ્યું. ડરના કારણે તેણે પોતાને એક રૂમમાં બંધ કરી દીધો, પરંતુ તેમ છતાં, એવો આરોપ છે કે શૈલેષ સિંહ, શશાંક સિંહ અને ડ્રાઇવરે તેના પર હુમલો કર્યો. પીડિતાના શરીર અને ચહેરા પર પણ ઇજાઓ થઈ હતી.

પોલીસે આ કલમો હેઠળ કેસ નોંધ્યો છે.
પોલીસે શૈલેષ સિંહ, શશાંક સિંહ અને અન્ય એક વ્યક્તિ સામે ભારતીય દંડ સંહિતા (IPC) ની કલમ 296(b), 115(2), અને 3(5) હેઠળ કેસ નોંધ્યો છે. પોલીસનું કહેવું છે કે તમામ પાસાઓની તપાસ કરવામાં આવી રહી છે અને તપાસના આધારે આગળની કાર્યવાહી કરવામાં આવશે.