દાહોદમાં કુદરતનો અનોખો ચમત્કાર જોવા મળ્યો છે. અહીં બે માથાવાળા અત્યંત દુર્લભ સાપના બચ્ચાનું રેસ્ક્યૂ કરવામાં આવ્યું છે. દાવો કરવામાં આવી રહ્યો છે કે ગુજરાતમાં આ પ્રકારનો આ પહેલો અને ભારતમાં અત્યાર સુધીનો પાંચમો કેસ છે.
ગુજરાતના દાહોદ જિલ્લામાંથી એક ચોંકાવનારો અને દુર્લભ કિસ્સો સામે આવ્યો છે. ધાનપુર તાલુકાના અગસવાણી ગામના એક ખેતરમાં આશરે 6 ઈંચ લાંબું બે માથાવાળું સાપનું બચ્ચું મળી આવ્યું હતું. સ્થાનિક લોકોએ જાણ કરતાં દાહોદ પ્રકૃતિ મિત્ર મંડળની ટીમ ઘટનાસ્થળે પહોંચી હતી અને સાપને સુરક્ષિત રીતે રેસ્ક્યૂ કર્યો હતો.
શા માટે આ સાપ છે આટલો દુર્લભ?
રેસ્ક્યૂ કરાયેલા સાપને વુલ્ફ સ્નેક હોવાનું જણાવવામાં આવ્યું છે. ખાસ વાત એ છે કે તેના એક જ શરીર પર બે અલગ-અલગ માથા અને ચાર આંખો છે. કુદરતની આ અનોખી રચનાએ સ્થાનિક લોકો ઉપરાંત નિષ્ણાતોનું પણ ધ્યાન ખેંચ્યું છે.
પ્રકૃતિ મિત્ર મંડળના જણાવ્યા મુજબ વુલ્ફ સ્નેક બિનઝેરી સાપ છે. એટલે કે તે ઝેરી સાપની જેમ મનુષ્ય માટે જીવલેણ જોખમ ઊભું કરતો નથી. માત્ર 6 ઈંચ જેટલા આ નાના સાપને જોઈને લોકોમાં ભારે ઉત્સુકતા જોવા મળી હતી.
ગુજરાતમાં પ્રથમ વખત આવો કેસ
નિષ્ણાતોના જણાવ્યા અનુસાર, આ પ્રકારની સ્થિતિને વૈજ્ઞાનિક ભાષામાં બાઈસેફેલી (Bicephaly) કહેવામાં આવે છે. તેમાં એક જ શરીર પર બે માથાં વિકસે છે અને બંને માથાંની ચાર આંખો હોય છે.
માહિતી અનુસાર, આનુવંશિક અસામાન્યતાને કારણે લાખોમાંથી કોઈ એક જીવમાં આવી રચના જોવા મળે છે. આવા સાપમાં બંને માથાં સાથે અલગ-અલગ મગજ અને નર્વસ સિસ્ટમ વિકસેલી હોઈ શકે છે.
બે માથાવાળા સાપનું જીવન કેટલું હોય છે?
બે માથાવાળા જીવમાં બંને માથાં અલગ રીતે પ્રતિક્રિયા કરી શકે છે. જેના કારણે ખોરાક મેળવવા, દિશા નક્કી કરવા અને હલનચલનમાં મુશ્કેલી ઊભી થઈ શકે છે. આ કારણોસર આવા જીવોનું કુદરતી જીવન સામાન્ય રીતે પડકારજનક રહે છે.
રેસ્ક્યૂ કરાયેલા આ સાપની ઉંમર આશરે એક વર્ષ હોવાનું જણાવવામાં આવી રહ્યું છે. પ્રકૃતિ મિત્ર મંડળના જણાવ્યા મુજબ, દાહોદમાં આ પ્રકારનો કિસ્સો પ્રથમ વખત સામે આવ્યો છે.
ભારતમાં અત્યાર સુધી બે માથાવાળા 2 કોબ્રા અને 3 વુલ્ફ સ્નેક મળી આવ્યા હોવાનો દાવો કરવામાં આવ્યો છે. હાલ આ દુર્લભ સાપની યોગ્ય દેખરેખ અને સુરક્ષા માટે જરૂરી કાર્યવાહી કરવામાં આવી રહી છે.
