સમુદ્રમાં ફરી એકવાર કોમર્શિયલ જહાજને નિશાન બનાવવામાં આવ્યું છે. બ્લેક સીમાં MV ROYAD MAMMADOV જહાજ પર થયેલા હુમલામાં બે વિદેશી ક્રૂ મેમ્બરના મોત થયા છે, જ્યારે ત્રણ ભારતીય ક્રૂ મેમ્બરનો આબાદ બચાવ થયો છે. ત્રણેય ભારતીયોને સારવાર માટે રોમાનિયાની હોસ્પિટલમાં લઈ જવામાં આવ્યા છે.
MV ROYAD MAMMADOV જહાજ પર હુમલો
રોમાનિયામાં આવેલા ભારતીય દૂતાવાસે જણાવ્યું કે બ્લેક સીમાં MV ROYAD MAMMADOV પર હુમલો થયા બાદ કેટલાક ક્રૂ મેમ્બર ઈજાગ્રસ્ત થયા હતા. તેમને સારવાર માટે રોમાનિયા લઈ જવાયા હતા. દૂતાવાસે પુષ્ટિ કરી છે કે ત્રણેય ભારતીય નાગરિક સુરક્ષિત છે. એક ભારતીય ક્રૂ મેમ્બર ઈજાગ્રસ્ત છે અને તેની સારવાર ચાલી રહી છે.
ભારતીય રાજદૂતે ભારતીય ક્રૂ મેમ્બરો સાથે વાત કરી
રોમાનિયામાં ભારતના રાજદૂત મનોજ મોહપાત્રાએ કોન્સ્ટાન્ટા કાઉન્ટી હોસ્પિટલમાં સારવાર લઈ રહેલા ત્રણેય ભારતીય નાગરિકો સાથે વાતચીત કરી હતી. હોસ્પિટલના મુખ્ય તબીબે જણાવ્યું કે ત્રણેયની સ્થિતિ સારી છે અને તેમને જરૂરી સારવાર આપવામાં આવી રહી છે.
ભારતીય દૂતાવાસે જણાવ્યું કે તે હોસ્પિટલ અને સંબંધિત અધિકારીઓના સતત સંપર્કમાં છે તથા ભારતીય ક્રૂ મેમ્બરોને શક્ય તમામ મદદ પૂરી પાડવામાં આવી રહી છે.
કોમર્શિયલ શિપિંગની સુરક્ષા પર ફરી સવાલ
આ ઘટના એવા સમયે બની છે જ્યારે બ્લેક સી, રેડ સી અને પર્સિયન ગલ્ફ જેવા મહત્વપૂર્ણ દરિયાઈ માર્ગો પર કોમર્શિયલ જહાજોની સુરક્ષાને લઈને ચિંતા વધી રહી છે.
વિદેશ મંત્રી એસ. જયશંકરે પણ સંયુક્ત રાષ્ટ્ર મહાસભામાં કોમર્શિયલ જહાજો અને નાવિકો પર થતા હુમલાને સંપૂર્ણપણે અસ્વીકાર્ય ગણાવ્યા હતા.
UNમાં જયશંકરે ઉઠાવ્યો હતો મુદ્દો
એસ. જયશંકરે 81મી યુનાઇટેડ નેશન્સ જનરલ એસેમ્બલીમાં પોતાના સંબોધન દરમિયાન કોમર્શિયલ શિપિંગ અને નાવિકો પર થતા હુમલાઓ અંગે ચિંતા વ્યક્ત કરી હતી. તેમણે કહ્યું હતું કે ગલ્ફ અને રેડ સીથી લઈને બ્લેક સી સુધી કોમર્શિયલ જહાજો અને નાવિકો પર હુમલા થયા છે, જેમાં ભારતીય નાવિકોએ પણ જીવ ગુમાવ્યા છે.
જયશંકરે ભારપૂર્વક જણાવ્યું હતું કે શિપિંગ અને નાવિકોની સુરક્ષા સાથે કોઈપણ પ્રકારનું સમાધાન ન થવું જોઈએ અને આંતરરાષ્ટ્રીય કાયદાનું સંપૂર્ણ પાલન જરૂરી છે.
આ પહેલા પણ ઓમાનના દરિયાકાંઠા નજીક ભારતીય જહાજ MT El Gaia પર હુમલો થયો હતો. જહાજમાં સવાર 14 ક્રૂ મેમ્બરોમાંથી 13ને બચાવી લેવામાં આવ્યા હતા, જ્યારે એક ક્રૂ મેમ્બર લાપતા થયો હતો. ભારતે આ હુમલાની આકરી નિંદા કરી હતી.
