Zepto પરથી માત્ર એકાદ-બે જરૂરી વસ્તુઓ મંગાવવાની ટેવ ધરાવતા ગ્રાહકો માટે હવે બિલ થોડું વધી શકે છે. કંપનીએ ફ્રી ડિલિવરી મેળવવા માટેની ન્યૂનતમ ઓર્ડર વેલ્યુ ₹149થી વધારીને ₹199 કરી છે. એટલે કે હવે નાની ખરીદી પર ડિલિવરી ચાર્જ ટાળવા ગ્રાહકોએ વધુ વસ્તુઓ કાર્ટમાં ઉમેરવી પડી શકે છે. માર્ચ 2026ના અહેવાલો અનુસાર, Zepto અગાઉ ₹149ની મર્યાદા પર આવી ગયું હતું અને ત્યારબાદ ₹199ના થ્રેશોલ્ડ તરફ વધ્યું હતું.
આ બદલાવથી Zeptoની ફ્રી ડિલિવરી મર્યાદા Blinkit જેવી સેવાઓની ₹199 આસપાસની મર્યાદા સાથે આવી ગઈ છે. ખાસ કરીને પીક અવર્સ અથવા વધુ માંગના સમયગાળામાં Zepto કેટલીક જગ્યાએ ફ્રી ડિલિવરી માટેની મર્યાદા ₹299 સુધી વધારી શકે છે. કંપનીએ આ મોડલને રિયલ-ટાઈમ ડિમાન્ડ સાથે જોડવાનું શરૂ કર્યું છે, જેનો હેતુ ડિલિવરી ખર્ચ અને ઓર્ડર દીઠ આવક વચ્ચે વધુ સારું સંતુલન બનાવવાનો છે.
ક્વિક-કોમર્સ ક્ષેત્રમાં હવે ગ્રાહકોની સંખ્યા સાથે ઓર્ડરનો કદ અને નફાકારકતા પણ મહત્વના બની રહ્યા છે. Datum Intelligenceના Q4 FY26 ડેટા મુજબ Blinkitના સરેરાશ દૈનિક ઓર્ડર લગભગ 30.4 લાખ અને Zeptoના 23.3 લાખ હતા, જ્યારે Instamartના આશરે 12.5 લાખ ઓર્ડર નોંધાયા હતા.
બીજી તરફ, Zeptoનું IPO પણ ચર્ચામાં છે. કંપનીએ હાલ લિસ્ટિંગની યોજના મુલતવી રાખી છે અને 2-3 ક્વાર્ટર બાદ અપડેટેડ નાણાકીય આંકડા સાથે ફરીથી પ્રક્રિયા શરૂ કરવાની તૈયારી દર્શાવી છે. રોકાણકારોના અંદાજ મુજબ કંપનીનું IPO વેલ્યુએશન આશરે $2.5-3 અબજ સુધી આવી ગયું હતું, જે અગાઉના લગભગ $7 અબજના વેલ્યુએશન કરતાં ઘણું ઓછું છે.
આ સમગ્ર ફેરફાર દર્શાવે છે કે ક્વિક-કોમર્સ કંપનીઓ હવે માત્ર ઝડપથી ઓર્ડર વધારવા કરતાં દરેક ઓર્ડરમાં ખર્ચ અને આવકનું ગણિત વધુ કડક રીતે જોઈ રહી છે.
