વડોદરાના દાંડિયાબજાર વિસ્તારમાં આવેલી એક હોટેલમાં 29 વર્ષીય યુવકનું રહસ્યમય સંજોગોમાં મોત થતાં અનેક સવાલો ઊભા થયા છે. યુવક એક અન્ય વ્યક્તિ સાથે હોટેલમાં રોકાયો હતો અને પ્રાથમિક તપાસમાં બંને વચ્ચે ગે ડેટિંગ એપ તથા વોટ્સએપ મારફતે સંપર્ક થયો હોવાનું સામે આવ્યું છે.
મળતી માહિતી મુજબ, પાણીગેટ વિસ્તારમાં રહેતો 29 વર્ષીય ગુલામ મુસ્તફા ખુરશીદ અહેમદ નૈયર ભાયલીના એક યુવક સાથે દાંડિયાબજારની હોટેલ વિન્ટેજ ઈનમાં ગયો હતો. બંનેને શરૂઆતમાં રૂમ નંબર 304 આપવામાં આવ્યો હતો. જોકે, મોડી રાત્રે વીજ પુરવઠામાં ખામી સર્જાતા તેમને રૂમ નંબર 302માં ખસેડવામાં આવ્યા હતા.
ત્યારબાદ રૂમના શૌચાલયમાં યુવક પડી ગયો હોવાની માહિતી સામે આવી હતી. ઘટનામાં ગુલામ મુસ્તફાનું મોત નીપજ્યું હતું. મૃતકના સાથીએ જ હોટેલ સ્ટાફ અને પોલીસને જાણ કરી હતી. યુવકે કોઈ નશીલા પદાર્થનું સેવન કર્યું હતું કે નહીં તે અંગે પણ તપાસ કરવામાં આવી રહી છે.
ઘટનાની જાણ થતાં ACP અશોક રાઠવા સહિત રાવપુરા પોલીસનો કાફલો સ્થળ પર પહોંચ્યો હતો. પોલીસે મૃતદેહને પોસ્ટમોર્ટમ માટે સયાજી હોસ્પિટલમાં મોકલી આપ્યો છે. મૃતક સાથે રહેલા યુવકને કસ્ટડીમાં લઈને પૂછપરછ કરવામાં આવી રહી છે.
હાલ પોલીસે અકસ્માતે મોતનો ગુનો નોંધીને તપાસ શરૂ કરી છે. મોતનું ચોક્કસ કારણ પોસ્ટમોર્ટમ રિપોર્ટ બાદ સ્પષ્ટ થશે. ઘટનાની જાણ થતાં રાવપુરા પોલીસે તપાસ શરૂ કરી હતી.
