ઊંઘમાં જ ધુમાડાએ ગૂંગળાવી નાખ્યા અને બચવાનો મોકો પણ ન મળ્યો! પશ્ચિમ બંગાળની રાજધાની કોલકાતામાં મંગળવારે મોડી રાત્રે લગભગ 2 વાગ્યે મિર્ઝા ગાલિબ સ્ટ્રીટ-ફ્રી સ્કૂલ સ્ટ્રીટ વિસ્તારમાં આવેલી હોટલમાં આગ લાગતા એક બાળક સહિત ઓછામાં ઓછા 9 લોકોના મોત થયા હતા, જ્યારે 6 લોકો ઘાયલ થયા હતા.
આગ લાગી ત્યારે હોટલના મોટાભાગના મહેમાનો ઊંઘમાં હતા. આગ સાથે ફેલાયેલા ગાઢ ધુમાડાના કારણે અનેક લોકો રૂમમાં જ ફસાઈ ગયા હતા અને ગૂંગળામણથી સ્થિતિ ગંભીર બની હતી. ફાયર બ્રિગેડ અને પોલીસની ટીમોએ તાત્કાલિક રેસ્ક્યૂ ઓપરેશન શરૂ કરીને હોટલમાંથી અનેક લોકોને બહાર કાઢ્યા હતા. કેટલાક લોકોને બારીઓ તોડી બહાર લાવવામાં આવ્યા હતા. અહેવાલો અનુસાર લગભગ 28થી વધુ લોકોને સુરક્ષિત બહાર કાઢવામાં આવ્યા હતા.
મૃતકોમાં મહિલાઓ, પુરુષો અને એક બાળકનો સમાવેશ થયા હોવા સાથેજ કેટલાક મૃતકો બાંગ્લાદેશી નાગરિક હોવાનું અહેવાલોમાં જાણવા મળી રહ્યું છે. તેઓ સારવાર માટે કોલકાતા આવ્યા હોવાનું જાણવા મળે છે. જોકે, તમામ મૃતકોની નાગરિકતા અંગે સત્તાવાર રીતે સંપૂર્ણ વિગતો હજુ જાહેર થવાની બાકી છે.
આગ કયા કારણોસર લાગી તે અંગે તપાસ ચાલી રહી છે. પ્રાથમિક રીતે શોર્ટ સર્કિટની શક્યતા વ્યક્ત કરવામાં આવી છે, પરંતુ સત્તાવાર કારણ તપાસ પૂર્ણ થયા બાદ જ સ્પષ્ટ થશે. આ ઘટના બાદ શહેરમાં હોટલોના ફાયર સેફ્ટી ધોરણો અંગે ફરી ગંભીર સવાલો ઊભા થયા છે.
