ટાટા કન્સલ્ટન્સી સર્વિસીસ (TCS)ના નાસિક યુનિટમાં સામે આવેલા જાતીય સતામણી અને બળજબરીથી ધર્મ પરિવર્તનના કેસમાં હવે નવો વળાંક આવ્યો છે. આ કેસની મુખ્ય આરોપી નિદા ખાન હાલ ફરાર હોવાનું કહેવાય છે, જોકે તેના પરિવારનું કહેવું છે કે તે મુંબઈમાં છે અને ગર્ભવતી પણ છે. આ વચ્ચે નિદા ખાને નાસિક કોર્ટમાં આગોતરા જામીન માટે અરજી કરી છે અને પોતાની તબિયતનો આધાર લઈને ધરપકડથી બચવાનો પ્રયાસ કરી રહી છે. બીજી તરફ, સ્પેશિયલ ઇન્વેસ્ટિગેશન ટીમ (SIT) તેની શોધખોળમાં સતત દરોડા પાડી રહી છે અને તેના દાવાની તબીબી ચકાસણી પણ કરવામાં આવશે.
આ મામલે મહારાષ્ટ્રના મુખ્યમંત્રી દેવેન્દ્ર ફડણવીસે કડક પ્રતિક્રિયા આપી છે. તેમણે જણાવ્યું કે આ કેસ ખૂબ જ ગંભીર છે અને પ્રાથમિક તપાસમાં આ આખું નેટવર્ક એક સુનિયોજિત ‘મોડ્યુલ’ હેઠળ કાર્યરત હોવાનું જણાઈ રહ્યું છે. તેમણે TCS મેનેજમેન્ટના સહયોગની પ્રશંસા કરી અને ખાતરી આપી કે આરોપીઓને બચાવવામાં નહીં આવે. સાથે જ, કેસની સંવેદનશીલતા ધ્યાનમાં રાખીને કેન્દ્રીય એજન્સીઓને પણ જાણ કરવામાં આવી છે.
પોલીસે અત્યાર સુધીમાં કુલ 9 ફરિયાદો નોંધાવી છે અને 7 આરોપીઓની ધરપકડ કરી છે, જેમાં 6 પુરુષ અને 1 મહિલા HR હેડનો સમાવેશ થાય છે. તપાસમાં સામે આવ્યું છે કે 2022થી માર્ચ 2026 દરમિયાન મહિલા કર્મચારીઓ પર યૌન શોષણ, પીછો કરવો અને માનસિક ત્રાસ આપવાના ગંભીર આરોપો લાગ્યા છે. SITના અનુસાર 8 મહિલા કર્મચારીઓએ તેમના સિનિયરો વિરુદ્ધ ફરિયાદ કરી હતી, પરંતુ HR વિભાગે તેમની વાતોને અવગણ્યાની ફરિયાદ છે.
કેસમાં વધુ ગંભીર પાસું એ પણ સામે આવ્યું છે કે એક આરોપીએ લગ્નનો બહાનો આપી મહિલા કર્મચારી સાથે સંબંધ બાંધ્યો હતો, તેમજ અન્ય મહિલાઓ સાથે છેડછાડ અને અશ્લીલ ટિપ્પણીઓ કરવાના આરોપો પણ છે. એટલું જ નહીં, એક પુરુષ કર્મચારીને જબરદસ્તી નમાજ પઢાવવા અને તેના ધર્મનો અપમાન કરવાની ઘટના પણ તપાસમાં બહાર આવી છે. હાલ પોલીસ સમગ્ર મામલાની ઊંડાણપૂર્વક તપાસ કરી રહી છે અને ફરાર આરોપીઓને પકડવા માટે પ્રયાસો તેજ કર્યા છે.
આ મામલે TCSએ નિવેદન આપીને જણાવ્યું છે કે કંપનીમાં ઉત્પીડન સામે ઝીરો ટોલરન્સ નીતિ છે. ટાટા સન્સના ચેરમેન એન. ચંદ્રશેખરણે આ આરોપોને ગંભીર ગણાવ્યા છે અને COO આર્તિ સુબ્રમણ્યમના નેતૃત્વમાં આંતરિક તપાસ શરૂ કરવામાં આવી હોવાનું જણાવ્યું છે. કંપનીએ પોલીસ સાથે સંપૂર્ણ સહકાર આપવાની અને દોષિતોને કડક સજા અપાવવાની ખાતરી આપી છે.
