ભાજપ સાંસદ અને અભિનેત્રી કંગના રનૌત પોતાના ‘ગટર જનરેશન’ નિવેદનને લઈને ફરી એકવાર ચર્ચાના કેન્દ્રમાં આવી છે. સોશિયલ મીડિયા પર ભારે ટીકા બાદ કંગનાએ એક વીડિયો જાહેર કરીને પોતાના નિવેદન અંગે સ્પષ્ટતા કરી છે. તેમણે જણાવ્યું કે તેમનો ઉદ્દેશ સમગ્ર યુવા પેઢી પર ટિપ્પણી કરવાનો નહોતો, પરંતુ વિરોધ પ્રદર્શનો દરમિયાન નેતાઓ વિરુદ્ધ અભદ્ર અને અશ્લીલ ભાષાનો ઉપયોગ કરનારા કેટલાક લોકોની ટીકા કરવાનો હતો.
ઇન્સ્ટાગ્રામ પર શેર કરાયેલા વીડિયોમાં કંગનાએ કહ્યું કે સમાજમાં અભિવ્યક્તિની સ્વતંત્રતા સાથે શિસ્ત અને મર્યાદાનું પાલન પણ એટલું જ જરૂરી છે. તેમણે પ્રશ્ન કર્યો કે, “શું તમે તમારી દીકરીને આવી ભાષા અને વર્તન શીખવશો?” તેમના મતે કોઈપણ વ્યક્તિને અપમાનજનક ભાષાનો ઉપયોગ કરવાની છૂટ ન હોવી જોઈએ અને આવી બાબતોને સામાન્ય ગણવી યોગ્ય નથી.
આ સમગ્ર વિવાદ દિલ્હીમાં વિદ્યાર્થીઓના વિરોધ પ્રદર્શન બાદ સોશિયલ મીડિયા પર વાયરલ થયેલા કેટલાક વીડિયો અને પોસ્ટ્સને પગલે શરૂ થયો હતો. તે સમયે કંગનાએ કેટલાક પ્રદર્શનકારીઓની ભાષા અને વર્તન પર કડક ટિપ્પણી કરી હતી, જેને લઈને સોશિયલ મીડિયા પર વ્યાપક વિરોધ જોવા મળ્યો હતો. અનેક લોકોએ તેમના નિવેદનને સમગ્ર જનરેશન અને ખાસ કરીને યુવતીઓ સામેની ટિપ્પણી ગણાવી હતી.
વિવાદ વધતા કંગનાએ ભારપૂર્વક જણાવ્યું કે તેઓ માત્ર અભદ્ર ભાષા અને અસંસ્કારી વર્તનની ટીકા કરી રહ્યા હતા, કોઈ એક આખી પેઢીને નિશાન બનાવી રહ્યા નહોતા. તેમણે લોકોને અપીલ કરી કે આધુનિકતા કે અભિવ્યક્તિની સ્વતંત્રતાના નામે અપમાનજનક ભાષા અને વર્તનને સ્વીકારવું યોગ્ય નથી. કંગનાના આ નિવેદન બાદ પણ સોશિયલ મીડિયા પર તેમના સમર્થન અને વિરોધ બંને પ્રકારની પ્રતિક્રિયાઓ જોવા મળી રહી છે.
