દુબઈથી ઈઝરાયલ જતી એક પેસેન્જર ફ્લાઈટે અચાનક હાઈજેકના સંકેત આપતા મધ્ય પૂર્વના આકાશમાં થોડા સમય માટે ભારે ચકચાર મચી ગઈ હતી. પાયલટ તરફથી ઈમરજન્સી સિગ્નલ મળ્યા બાદ વિમાનને તેના નિર્ધારિત રૂટ પરથી વાળીને સાઉદી અરેબિયા તરફ લઈ જવામાં આવ્યું હતું. સ્થિતિને ગંભીરતાથી લેતા ઈઝરાયલે સુરક્ષા વ્યવસ્થા સક્રિય કરી અને ફાઈટર જેટ્સને પણ તૈયાર રાખ્યા હતા.
અહેવાલો અનુસાર, ફ્લાયદુબઈની દુબઈથી તેલ અવીવ જતી ફ્લાઈટ આજે એટલે કે 30 સપ્ટેમ્બર, 2026ના રોજ પોતાના માર્ગ પર હતી. સાઉદી અરેબિયાની એરસ્પેસમાં પહોંચ્યા બાદ વિમાનમાંથી એવો ઈમરજન્સી કોડ મોકલાયો હતો, જેનો ઉપયોગ સંભવિત હાઈજેક અથવા વિમાનમાં અનધિકૃત હસ્તક્ષેપની સ્થિતિ દર્શાવવા માટે થાય છે. આ સંકેત મળતા સુરક્ષા એજન્સીઓમાં તાત્કાલિક ચિંતા ફેલાઈ હતી.
આ દરમિયાન વિમાને પોતાનો માર્ગ બદલી સાઉદી અરેબિયાના તબુક એરપોર્ટ તરફ વળાંક લીધો હતો. ઈઝરાયલી હવાઈદળે પણ સંભવિત કટોકટીની સ્થિતિને ધ્યાનમાં રાખીને ફાઈટર જેટ્સને સ્ક્રેમ્બલ કર્યા હતા. ઈઝરાયલના વડાપ્રધાન બેન્જામિન નેતન્યાહુએ પણ સુરક્ષા અધિકારીઓ સાથે બેઠક કરીને સ્થિતિની સમીક્ષા કરી હતી.
ફ્લાઈટ અંતે સાઉદી અરેબિયાના તબુક એરપોર્ટ પર સુરક્ષિત રીતે ઉતરી ગઈ હતી. ત્યારબાદ ઈઝરાયલી સુરક્ષા સૂત્રોએ જણાવ્યું કે આ ઘટના હાઈજેક નહોતી. પ્રાથમિક માહિતી મુજબ વિમાનમાં રહેલા બંને પાયલટ વચ્ચે થયેલા વિવાદ અથવા અથડામણને કારણે ઈમરજન્સી સિગ્નલ અને ‘અનલો ફુલ ઇન્ટરફિયરન્સ’ પ્રકારનો સંકેત મોકલાયો હોવાની શક્યતા છે. ઘટનાની વધુ તપાસ હાથ ધરવામાં આવી રહી છે.
આ ઘટનાએ મધ્ય પૂર્વની હાલની તંગ સુરક્ષા પરિસ્થિતિ વચ્ચે હવાઈ મુસાફરી અંગે એક વખત ફરી ચિંતા ઊભી કરી છે.
