લખનઉમાં અચાનક બદલાયેલા હવામાનના કારણે દિલ્હીથી આવતી ઇન્ડિગોની ફ્લાઇટ 6E-6476ને ભોપાલમાં ઇમરજન્સી લેન્ડિંગ કરાવવું પડ્યું. આ ફ્લાઇટમાં ઉત્તર પ્રદેશના બંને ડેપ્યુટી મુખ્યમંત્રી કેશવ પ્રસાદ મૌર્ય અને બ્રજેશ પાઠક સવાર હતા, જે સુરક્ષિત રીતે ભોપાલ પહોંચ્યા. લખનઉ એરપોર્ટ પર ત્રણ વખત લેન્ડિંગનો પ્રયાસ નિષ્ફળ જતા અંતે વિમાનને ડાયવર્ટ કરવામાં આવ્યું.
સોમવારે સવારે લખનઉમાં વાવાઝોડા સાથે લગભગ દોઢ કલાક ભારે વરસાદ પડ્યો, જેના કારણે શહેરના અનેક વિસ્તારોમાં પાણી ભરાઈ ગયું અને નાળા છલકાઈ ગયા. સવારે 8:20 વાગ્યે અચાનક વાદળો છવાઈ જતા અંધકારમય માહોલ સર્જાયો હતો અને થોડા જ મિનિટોમાં જોરદાર પવન સાથે વરસાદ શરૂ થયો.
હવામાન વિભાગે આગામી કલાકોમાં વધુ ભારે વરસાદ અને કરા પડવાની શક્યતા વ્યક્ત કરી છે, તેમજ આગામી ત્રણ દિવસ સુધી તોફાની હવામાન યથાવત રહેવાની ચેતવણી આપી છે. હાલ વરસાદ પછી વાતાવરણમાં ઠંડક અનુભવાઈ રહી છે, જ્યારે લખનઉમાં આજનું તાપમાન 23 થી 33 ડિગ્રી સેલ્સિયસ વચ્ચે રહેવાની શક્યતા છે.
