શું તમે ક્યારેય વિચાર્યું છે કે વિદેશી નાસ્તાના પેકેટમાંથી લાખો રૂપિયાનું ડ્રગ્સ નીકળી શકે? દાણચોરોની આવી જ એક હાઈટેક અને ચોંકાવનારી ચાલાકી અમદાવાદના સરદાર વલ્લભભાઈ પટેલ ઈન્ટરનેશનલ (SVPI) એરપોર્ટ પર નિષ્ફળ બનાવવામાં આવી છે. કસ્ટમ્સની એર ઈન્ટેલિજન્સ યુનિટ (AIU) એ બેંગકોકથી આવતા સુરતના એક મુસાફર પાસેથી ‘ડિહાઈડ્રેટેડ ગુઆવા’ (સૂકા જામફળ) ના પેકેટમાં છુપાવેલો 973.23 ગ્રામ ઉચ્ચ ગુણવત્તાવાળો હાઈડ્રોપોનિક ગાંજો ઝડપી પાડ્યો છે.
પ્રાપ્ત માહિતી અનુસાર, મંગળવારે થાઈ એરવેઝની ફ્લાઈટ દ્વારા બેંગકોકથી અમદાવાદ પહોંચેલા આ શખ્સની એડવાન્સ પેસેન્જર ઇન્ફોર્મેશન સિસ્ટમ (APIS) અને પેસેન્જર પ્રોફાઈલિંગના આધારે અટકાયત કરવામાં આવી હતી. જ્યારે કસ્ટમ્સ અધિકારીઓએ તેના કેબિન બેગેજની ઝીણવટભરી તલાશી લીધી, ત્યારે તેમાંથી એક કાગળની થેલી મળી આવી હતી. આ થેલીમાં બે મોટા પ્લાસ્ટિકના પેકેટ હતા, જેની અંદર ‘ડિહાઈડ્રેટેડ ગુઆવા’ એવું પ્રિન્ટ કરેલા 30 નાના પેકેટ્સ અત્યંત ચાલાકીથી સંતાડવામાં આવ્યા હતા.
અધિકારીઓને શંકા જતા પેકેટ ખોલીને તપાસ કરવામાં આવી, તો અંદર જામફળના બદલે લીલા રંગનો શંકાસ્પદ વનસ્પતિજન્ય પદાર્થ મળી આવ્યો હતો. નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ (NDPS) ફિલ્ડ ટેસ્ટિંગ કિટ દ્વારા કરાયેલા પ્રાથમિક પરીક્ષણમાં આ પદાર્થ પ્રતિબંધિત ‘ગાંજો’ (હાઈડ્રોપોનિક મેરિજુઆના) હોવાની પુષ્ટિ થઈ હતી. જપ્ત કરાયેલા આ ડ્રગ્સનું કુલ વજન 973.23 ગ્રામ છે, જેની આંતરરાષ્ટ્રીય બજાર કિંમત અંદાજે 97.32 લાખ રૂપિયા આંકવામાં આવી છે.
હાલમાં કસ્ટમ વિભાગે સમગ્ર મુદ્દામાલ જપ્ત કરીને મુસાફરની NDPS એક્ટ, 1985 ની કલમો હેઠળ ધરપકડ કરી છે. આ કન્સાઈનમેન્ટ બેંગકોકથી કોણે મોકલ્યું હતું અને ગુજરાતમાં કોને ડિલિવર કરવાનું હતું? શું આની પાછળ કોઈ મોટી આંતરરાષ્ટ્રીય ડ્રગ સિન્ડિકેટ સક્રિય છે? તે દિશામાં કસ્ટમ્સ વિભાગે સઘન તપાસ હાથ ધરી છે.
તાજેતરના સમયમાં થાઈલેન્ડથી આવતી ફ્લાઈટ્સમાં ડ્રગ્સની દાણચોરીના કિસ્સાઓ વધ્યા છે. દાણચોરો ફૂડ પેકેટ્સ અને ટ્રોલી બેગના ગુપ્ત ખાનાંઓનો ઉપયોગ કરી રહ્યા છે, પરંતુ અમદાવાદ એરપોર્ટ પર કસ્ટમ્સની ચાંપતી નજર અને સતર્કતાને કારણે ડ્રગ્સ માફિયાઓના આ મનસૂબા સતત નિષ્ફળ થઈ રહ્યા છે.
