કલ્પના કરો કે હજારો ફૂટની ઊંચાઈએ ઉડતું વિમાન અચાનક નીચે ધસી રહ્યું હોય અને એ જ સમયે કોકપિટમાં તમારો જ કો-પાઈલોટ તમારા પર ચાકુથી હુમલો કરી દે. ફ્લાયદુબઈની દુબઈથી તેલ અવિવ જતી ફ્લાઇટ FZ1073માં 30 સપ્ટેમ્બર 2026ના રોજ એવી જ ભયાનક ઘટના બની હતી. આ કટોકટી વચ્ચે ગુજરાતી મૂળના ભારતીય કેપ્ટન સ્મિત મછારે ગંભીર રીતે ઘાયલ હોવા છતાં કોકપિટનો દરવાજો ખોલીને મુસાફરો અને ક્રૂને હસ્તક્ષેપ કરવાની તક આપી, જેના પગલે મોટી હવાઈ દુર્ઘટના ટળી અને વિમાનને સુરક્ષિત રીતે સાઉદી અરેબિયાના તબૂક પહોંચાડવામાં આવ્યું હતું.
ફ્લાઇટ દુબઈથી તેલ અવિવ તરફ જઈ રહી હતી ત્યારે કોકપિટમાં કેપ્ટન સ્મિત મછાર અને કો-પાયલટ વચ્ચે હિંસક અથડામણ થઈ હતી. ઇઝરાયલી અધિકારીઓના જણાવ્યા પ્રમાણે, કો-પાઈલોટે કેપ્ટન પર ચાકુથી હુમલો કર્યો અને વિમાનનું નિયંત્રણ મેળવવાનો પ્રયાસ કર્યો હતો. આ દરમિયાન વિમાનની ઊંચાઈમાં અચાનક મોટો ઘટાડો થયો હતો. ફ્લાઇટ-ટ્રેકિંગ ડેટા મુજબ વિમાન લગભગ 14,000 ફૂટ જેટલું 30 સેકન્ડથી ઓછા સમયમાં નીચે આવ્યું હતું.
ગંભીર રીતે ઘાયલ હોવા છતાં કેપ્ટન મછારે કોકપિટનો દરવાજો ખોલી દીધો. ત્યારબાદ કેટલાક મુસાફરો અને ફ્લાઇટમાં હાજર ઓફ-ડ્યુટી પાયલટોએ કોકપિટમાં પ્રવેશ કરીને હુમલાખોરને કાબૂમાં લીધો. બાદમાં બેકઅપ ક્રૂએ વિમાનનું નિયંત્રણ સંભાળ્યું અને ફ્લાઇટનું તબૂક એરપોર્ટ પર ઇમરજન્સી લેન્ડિંગ કરાવવામાં આવ્યું હતું. વિમાનમાં 174 મુસાફરો હતા અને તમામ સુરક્ષિત રહ્યા હતા.
કોણ છે કેપ્ટન સ્મિત મછાર?
કેપ્ટન સ્મિત મછાર ગુજરાતી મૂળના ભારતીય પાઈલોટ છે અને મુંબઈ સાથે તેમનો સંબંધ હોવાનું અહેવાલોમાં જણાવાયું છે. તેમણે જૂન 2022માં ફ્લાયદુબઈમાં ડાયરેક્ટ-એન્ટ્રી કેપ્ટન તરીકે જોડાયા હતા. તે પહેલાં તેઓ લગભગ 11 વર્ષ સુધી સ્પાઇસજેટ સાથે જોડાયેલા રહ્યા હતા. રોઇટર્સ અનુસાર, તેમના પાસે આશરે 9,750 કલાકનું Boeing 737 ફ્લાઇંગ અનુભવ છે.
આ ઘટના બાદ ઇઝરાયલના વડાપ્રધાન બેન્જામિન નેતન્યાહૂ અને ભારતના વડાપ્રધાન નરેન્દ્ર મોદીએ કેપ્ટન મછારની બહાદુરીની પ્રશંસા કરી છે. ભારતીય પાયલટ હાલમાં સાઉદી અરેબિયાના તબૂકમાં સારવાર લઈ રહ્યા છે અને તેમની સ્થિતિ સ્થિર હોવાનું જણાવાયું છે. ઘટનાની સંપૂર્ણ તપાસ ચાલુ છે અને કો-પાયલટના હુમલા પાછળનો હેતુ હજુ સ્પષ્ટ થયો નથી.
