મધ્ય પ્રદેશની સરકારી સિસ્ટમની લાલિયાવાડીનો એક એવો કિસ્સો સામે આવ્યો છે, જેને સાંભળીને તમે આશ્ચર્યચકિત થઈ જશો! જો તમે વિચારતા હોવ કે ડિજિટલ ઈન્ડિયાના યુગમાં સરકારી પોર્ટલ પર દસ્તાવેજોની ચકાસણી કડક રીતે થતી હશે, તો આ ઘટના તમારી આંખો ખોલી દેશે. રાજ્યના નર્સિંગ નોંધણી પરિષદ (MPNRC) ના ઓનલાઈન પોર્ટલે કોઈ પણ પ્રકારની ખરાઈ કે તપાસ વગર સીધું એક ગધેડાના નામે નર્સિંગ રજિસ્ટ્રેશન સર્ટિફિકેટ જારી કરી દીધું છે. ‘ડોંકી’ નામે બનેલા આ ડિજિટલ પ્રમાણપત્રમાં પિતાનું નામ ‘ડોંકી ફાધર’ અને જાતિના કોલમમાં ‘પ્રાણી’ લખેલું હોવા છતાં, સિસ્ટમે મિનિટોમાં જ ગધેડાને બી.એસસી. નર્સિંગ ગ્રેજ્યુએટ જાહેર કરી દીધો!
આ આખી ઘટના મધ્ય પ્રદેશ નર્સ રજિસ્ટ્રેશન કાઉન્સિલની ઓનલાઈન પોર્ટલ સિસ્ટમની પોલ ખોલવા માટે કરવામાં આવેલા એક રિયલ ટેસ્ટનું પરિણામ છે. NSUI ના રાજ્ય ઉપપ્રમુખ રવિ પરમારે પોર્ટલની પારદર્શિતા અને દસ્તાવેજ ચકાસણી પ્રક્રિયા પારખવા માટે એક બોગસ અરજી સબમિટ કરી હતી. તેમણે અરજી ફોર્મમાં અરજદારનું નામ ‘ડંકી’, પિતાનું નામ ‘ડંકી ફાધર’ અને માતાનું નામ ‘ડંકી મધર’ દર્શાવ્યું હતું. આ સાથે જ ફોટાના સ્થાન પર ગધેડાનો જ ફોટો અપલોડ કર્યો હતો અને શૈક્ષણિક લાયકાતના નામે તદ્દન અસંબંધિત કાગળો બીડ્યા હતા.
આશ્ચર્યની વાત એ છે કે, ૧૦મા અને ૧૨મા ધોરણના મનસ્વી રોલ નંબર તથા ભોપાલ નર્સિંગ કોલેજનું નામ ભરવા છતાં ઓનલાઈન પોર્ટલે અરજી રિજેક્ટ ન કરી. માત્ર ₹૨,૦૫૦ ની ઓનલાઈન ફી ચૂકવતાની સાથે જ સિસ્ટમે સપ્ટેમ્બર ૨૦૩૧ સુધી માન્ય એવું સત્તાવાર ડિજિટલ રજિસ્ટ્રેશન સર્ટિફિકેટ જારી કરી દીધું હતું. આ ડિજિટલ સર્ટિફિકેટ અનુસાર ગધેડાને વિધિવત રીતે નોંધાયેલ ‘નર્સ-મિડવાઇફ’ તરીકે માન્યતા આપી દેવામાં આવી હતી.
આ ઘટના સામે આવ્યા બાદ સમગ્ર રાજ્યમાં આરોગ્ય તંત્ર અને ઓનલાઈન ચકાસણી પ્રક્રિયા સામે ગંભીર પ્રશ્નાર્થ ચિહ્નો ઊભા થયા છે. જો કોઈ પણ જાતની ડિજિટલ કે ભૌતિક ખરાઈ વિના ગધેડાના નામે નર્સિંગ ડિગ્રી મળી શકતી હોય, તો બોગસ ઉમેદવારો દર્દીઓના જીવન સાથે કેટલો મોટો ખેલ ખેલી રહ્યા હશે તે કલ્પના બહાર છે. મામલો ગંભીર બનતા કાઉન્સિલે સમગ્ર વિષયની તપાસ કરી એફઆઈઆર (FIR) નોંધવાની ખાતરી આપી છે, જ્યારે બીજી તરફ આ કૌભાંડમાં સામેલ જવાબદારો સામે કડક વહીવટી કાર્યવાહી અને તપાસ રિપોર્ટ જાહેર કરવાની માંગ ઉઠી રહી છે.
