મુંબઈ જેવા વ્યસ્ત શહેરમાં જ્યાં લોકોને પોતાના જીવતા મા-બાપ માટે પણ પૂરતો સમય નથી મળતો, ત્યાં એક દીકરીએ પિતા પ્રત્યેના લગાવમાં એવું પગલું ભર્યું જે જાણીને સૌ કોઈ ચોંકી ગયા છે. મુંબઈના મલાડ વિસ્તારમાં એક દીકરીએ પોતાના ૭૮ વર્ષીય પિતાના મૃતદેહને અંતિમ વિદાય આપવાને બદલે પૂરા ચાર વર્ષ સુધી ડીપ ફ્રીઝરમાં સાચવી રાખ્યો! પિતાના મૃતદેહને અમેરિકાની સ્પેશિયલ ક્રાયોનિક્સ (શબને લાંબા સમય સુધી સુરક્ષિત રાખતી) સંસ્થામાં મોકલીને ‘પુનર્જન્મ’ની આશા રાખતી આ દીકરીનું ભયાનક રહસ્ય ત્યારે ખૂલ્યું, જ્યારે ક્લિનિક વાળી ચાલના રિડેવલપમેન્ટ (પુનર્વિકાસ)ની પ્રક્રિયા શરૂ થઈ. આ હચમચાવી દેનારી ઘટનાએ સમગ્ર મહારાષ્ટ્રમાં ભારે ચર્ચા જગાવી છે.
પોલીસ સૂત્રો પાસેથી મળતી માહિતી મુજબ, ૭૮ વર્ષીય વૃદ્ધ છેલ્લા ઘણા સમયથી કેન્સરથી પીડિત હતા અને જૂન ૨૦૨૨માં હાર્ટ એટેક આવવાથી તેમનું અવસાન થયું હતું. પિતાના મૃત્યુ બાદ પરિવારે કાયદેસર રીતે તબીબ પાસેથી ડેથ સર્ટિફિકેટ પણ કઢાવ્યું હતું. જોકે, અંધેરી વેસ્ટમાં રહેતી અને અમેરિકા સાથે જોડાયેલી દીકરી પોતાના પિતા સાથે એટલી હદે ભાવનાત્મક રીતે જોડાયેલી હતી કે તે તેમનું મૃત્યુ સ્વીકારી શકી નહીં. અંતિમ સંસ્કાર કરવાને બદલે, તેણે પિતાના મૃતદેહને મલાડ ઈસ્ટ સ્થિત એક ચાલમાં ચાલતા ડે-કેર સેન્ટરના ફ્રીઝરમાં સાચવવાનો નિર્ણય લીધો.
આ દીકરીની યોજના માત્ર મૃતદેહને ફ્રીઝરમાં રાખવા પૂરતી સીમિત નહોતી. તે અમેરિકાની એક એવી ક્રાયોનિક્સ સંસ્થાના સતત સંપર્કમાં હતી, જે ભવિષ્યમાં તબીબી વિજ્ઞાનની પ્રગતિથી મૃતકોને ફરી જીવંત કરી શકાશે તેવી આશા સાથે શબને જાળવી રાખે છે. કાનૂની સલાહ, પેપરવર્ક અને અમેરિકા શબ મોકલવાના ભારે ખર્ચની વ્યવસ્થા કરવામાં તે રાત-દિવસ એક કરી રહી હતી. તાજેતરના અહેવાલો મુજબ, આ મૃતદેહને સાચવવા માટે પરિવાર ક્લિનિક મેનેજમેન્ટને દર મહિને આશરે ૧.૬૦ લાખ રૂપિયા જેટલો માતબર ખર્ચ ચૂકવી રહ્યો હતો.
આ રહસ્ય પરથી પડદો ત્યારે ઊંચકાયો જ્યારે ૨,૦૦૦ ચોરસ ફૂટથી વધુ વિસ્તારમાં ફેલાયેલી આ ચાલના રિડેવલપમેન્ટની તૈયારીઓ શરૂ થઈ અને મકાન માલિકે જગ્યા ખાલી કરવા જણાવ્યું. મકાન માલિકે ૨૦૨૨માં અબ્દુલ રહેમાન નામના વ્યક્તિને આ જગ્યા ભાડે આપી હતી, જેણે બાદમાં તે અન્ય મેનેજમેન્ટને સોંપી દીધી હતી. જગ્યા ખાલી કરાવવાની નોબત આવી અને સેન્ટર બંધ થયું, ત્યારે આ ચોંકાવનારો ખુલાસો થયો હતો.
કુરાર પોલીસની ટીમ જ્યારે ઘટનાસ્થળે પહોંચી ત્યારે ફ્રીઝરમાંથી વૃદ્ધનો મૃતદેહ મળી આવતા તેઓ પણ સ્તબ્ધ રહી ગયા હતા. પોલીસે મુંબઈની કૂપર હોસ્પિટલના નિષ્ણાત તબીબોની મદદથી તપાસ હાથ ધરી છે. પ્રાથમિક તપાસમાં વૃદ્ધનું મોત કુદરતી રીતે જ થયું હોવાનું અને કોઈ ગુનાહિત કાવતરું ન હોવાનું સામે આવ્યું છે. ભારતમાં શબને આટલા લાંબા સમય સુધી ખાનગી રીતે સાચવવા અંગે કોઈ સ્પષ્ટ કાયદો ન હોવાથી પોલીસ તમામ કાયદાકીય પાસાંઓ ચકાસી રહી છે. હવે આગળનો નિર્ણય પરિવારે લેવાનો છે કે તેઓ અંતિમ સંસ્કાર કરશે કે પછી કાયદાકીય પ્રક્રિયા પૂરી કરી શબને બીએમસી (BMC)ને સોંપશે.
