કહેવાય છે કે જ્યારે ગુજરાતીઓ દિલ ખોલે છે, ત્યારે મદદનો વરસાદ થાય છે! આ વાત માત્ર એક કહેવત નથી, પરંતુ ગુજરાતના લોકપ્રિય કન્ટેન્ટ ક્રિએટર ‘ગુજ્જુ લવગુરુ’ ઉર્ફે ચંદન રાઠોડના કિસ્સામાં સો ટકા સાચી સાબિત થઈ છે. ભાભર નજીક થયેલા એક ગોઝારા માર્ગ અકસ્માતમાં ચંદન રાઠોડે પોતાનો જીવ ગુમાવતા તેનો પરિવાર નોંધારો બન્યો હતો. પરંતુ, આ કપરા સમયમાં આખું ગુજરાત તેમની વહારે આવ્યું છે. સોશિયલ મીડિયાના માધ્યમથી શરૂ થયેલી એક નાનકડી ઝુંબેશ જોતજોતામાં રૂ. 3.50 કરોડના માતબર ભંડોળમાં ફેરવાઈ ગઈ છે. આ આંકડો સાબિત કરે છે કે માનવતા હજુ જીવંત છે.
અકસ્માતમાં ચંદનનું નિધન થતાં પત્ની, બે માસૂમ બાળકો, વૃદ્ધ માતા-પિતા અને ત્રણ બહેનો નિરાધાર બન્યા હતા. પરિવારની અત્યંત દયનીય સ્થિતિ જોઈને કેટલાક લોકસેવકો અને સોશિયલ મીડિયા ઇન્ફ્લુએન્સર્સે રૂ. 2 કરોડ આર્થિક સહાય એકત્ર કરવાનો લક્ષ્યાંક રાખ્યો હતો. જોકે, દેશ-વિદેશમાં વસતા ઉદાર દાતાઓએ ઓનલાઈન રૂ. 2.96 કરોડ અને રોકડા રૂ. 53 લાખ મળીને કુલ રૂ. 3.50 કરોડથી વધુનું દાન આપી દીધું.
એકત્ર થયેલી આ જંગી રકમ પરિવારના દરેક સભ્યનું ભવિષ્ય સુરક્ષિત કરવા માટે પારદર્શક રીતે વહેંચવામાં આવી રહી છે. આયોજન મુજબ, ચંદનની પત્ની અને બંને બાળકોના ભવિષ્યને સુરક્ષિત કરવા તેમના નામે રૂ. 41-41 લાખની ફિક્સ ડિપોઝીટ (FD) કરવામાં આવશે. આ ઉપરાંત, બાળકોના નામે રૂ. 53 લાખની કિંમતની જમીન પણ ખરીદવામાં આવશે. ચંદનના નાના ભાઈ પરેશને વ્યવસાય કે ભવિષ્ય માટે રૂ. 1 કરોડ આપવાનો નિર્ણય લેવાયો છે.
સૌથી હૃદયસ્પર્શી નિર્ણય બહેનો માટે લેવાયો છે. ભાઈની ખોટ ભલે ન પુરાય, પરંતુ રક્ષાબંધન કે મામેરા જેવા પ્રસંગોએ તેમને આર્થિક તકલીફ ન પડે તે માટે ચંદનની ત્રણેય બહેનોને રૂ. 11-11 લાખની સહાય અપાશે. ચંદનના પિતાની સંમતિથી લેવાયેલો આ સમાનતાલક્ષી નિર્ણય સમાજ માટે એક ઉત્તમ ઉદાહરણ પૂરું પાડે છે.
આ અભિયાનને મળેલા જંગી પ્રતિસાદ વચ્ચે કેટલાક ગઠિયાઓએ નકલી QR કોડ અને ફેક UPI આઈડી બનાવીને લોકો સાથે છેતરપિંડી શરૂ કરી હતી. આ ગેરરીતિને તાત્કાલિક ડામવા અને લક્ષ્યાંક કરતા વધુ રકમ એકઠી થઈ ગઈ હોવાથી, હવે સત્તાવાર રીતે દાન સ્વીકારવાનું બંધ કરવામાં આવ્યું છે. આયોજકોએ તમામ લિંક્સ બંધ કરીને દાતાઓને અપીલ કરી છે કે, હવે ચંદન રાઠોડના નામે દાન ન આપવું. તેના બદલે, આ જ ઉદારતા સમાજના અન્ય કોઈ ગરીબ અને જરૂરિયાતમંદ પરિવાર કે અકસ્માત પીડિતો માટે દાખવવામાં આવે તો જ માનવતા સાચા અર્થમાં સાર્થક થશે.
