અમેરિકા પહોંચીને નવા જીવનની શરૂઆત કરવાના સપના સાથે ગુજરાતથી નીકળેલા ત્રણ યુવક-યુવતીનો માટે વિદેશ જવાનો સફર ઈથોપિયામાં ભયાનક વળાંક લાવ્યો છે. ગેરકાયદેસર માર્ગે અમેરિકા જવાના પ્રયાસ દરમિયાન મહેસાણા અને ગાંધીનગર સાથે સંકળાયેલા ત્રણ કૌટુંબિક સગાઓનું ઈથોપિયાની રાજધાની એડિસ અબાબામાં અપહરણ થયું હોવાના અહેવાલ સામે આવ્યા છે. પરિવારજનો પાસેથી અગાઉ લાખો રૂપિયા પડાવવામાં આવ્યા હોવા છતાં ત્રણેયનો સંપર્ક તૂટી જતાં સમગ્ર મામલો પોલીસ સુધી પહોંચ્યો છે.
અપહરણમાં મહેસાણાના વડસ્મા ગામના 23 વર્ષીય ઋત્વિક શૈલેષભાઈ જનસરી, મૂળ મહેસાણાના અને હાલ અમદાવાદમાં રહેતી 30 વર્ષીય મમતા ચિરાગભાઈ ચાવડા તથા ગાંધીનગરની ગોપી નામની યુવતી સામેલ છે. ત્રણેય 20 સપ્ટેમ્બરે ગુજરાતથી નીકળ્યા હતા. તેઓ જયપુર પહોંચ્યા બાદ એતિહાદ એરલાઇન્સની ફ્લાઇટ મારફતે અબુધાબી અને ત્યાંથી એ જ દિવસે એડિસ અબાબા પહોંચ્યા હતા. તેમના માટે એક મહિનાના ઈ-વિઝાની વ્યવસ્થા કરવામાં આવી હતી અને એડિસ અબાબાની સ્વાઝીલેન્ડ સ્ટ્રીટ વિસ્તારમાં આવેલા GSF ગેસ્ટ હાઉસમાં રોકાણનું આયોજન હતું.
ત્રણેયને અમેરિકા મોકલવાનું કામ મહેસાણાના ડાંગરવા ગામના એજન્ટ અલ્પેશ પટેલ મારફતે થયું હોવાનું સામે આવ્યું છે. મીડિયા અહેવાલો અનુસાર પરિવારજનો પાસેથી કટકે-કટકે આશરે ₹70 લાખ લેવાયા હતા અને તેમને પહેલા કેનેડા પહોંચાડવામાં આવ્યા હોવાની વાત કરવામાં આવી હતી. ત્યારબાદ તેઓ કેનેડાથી અમેરિકા જવા નીકળ્યા હોવાનું જણાવાયા બાદ પરિવાર સાથેનો સંપર્ક તૂટી ગયો હતો. એ દરમિયાન ‘ખાન’ નામના વ્યક્તિ દ્વારા ત્રણેયને છોડાવવા માટે વધુ ₹1 કરોડની ખંડણી માંગવામાં આવી હોવાની વિગતો સામે આવી છે.
આ મામલે સૌથી મહત્વની કડી તેમની સાથે ગયેલા કલોલના એક યુવકની છે. તેના પરિવાર દ્વારા ₹70 લાખ ચૂકવાયા બાદ તેને છોડવામાં આવ્યો હતો અને તે ગુજરાત પરત ફર્યો હોવાનું જણાવાયું છે. તેની વાપસી બાદ અન્ય ત્રણ લોકોના અપહરણ અંગે પરિવારોને ગંભીર શંકા ઊભી થઈ અને ફરિયાદ નોંધાવવાની કાર્યવાહી થઈ છે.
હાલ એજન્ટ અલ્પેશ પટેલ અંગે પણ કોઈ સ્પષ્ટ માહિતી નથી. અહેવાલો પ્રમાણે તેણે આ વ્યવસ્થા વડોદરાના અન્ય એજન્ટને સોંપી હતી. વધુ ચોંકાવનારી બાબત એ છે કે આ જ નેટવર્ક મારફતે અગાઉ યમન ગયેલા આશરે અગીયાર લોકો પણ હજુ લાપતા હોવાનું જણાવાઈ રહ્યું છે. સમગ્ર મામલે અપહરણ, માનવ તસ્કરી અને ગેરકાયદેસર વિદેશ મોકલવાના નેટવર્ક અંગે તપાસ ચાલી રહી છે.
