બિલાડીના ચાર પંજામાં સામાન્ય રીતે જેટલી આંગળીઓ હોય છે, તેના કરતાં અનેક ગણી વધારે આંગળીઓ ધરાવતી એક બિલાડીએ દુનિયાનું ધ્યાન ખેંચ્યું છે. અમેરિકાના વિસ્કોન્સિનમાં રહેતી Erebus Anomaly નામની Maine Coon બિલાડીના કુલ 29 toes છે. તેની આ અનોખી શારીરિક વિશેષતાને કારણે તેને Guinness World Recordsમાં દુનિયામાં સૌથી વધુ આંગળીઓ ધરાવતી બિલાડી તરીકે સ્થાન મળ્યું છે.
Erebusના ચાર પંજામાં આંગળીઓની સંખ્યા પણ આશ્ચર્યજનક છે. તેના એક પંજામાં 8 આંગળીઓ, જ્યારે બાકીના ત્રણ પંજામાં 7-7 આંગળીઓ છે. એટલે કુલ સંખ્યા 29 થાય છે. આ રીતે તેણે બિલાડીઓમાં સૌથી વધુ toes ધરાવવાનો અગાઉનો 28 આંગળીઓનો રેકોર્ડ તોડી નાખ્યો.
Erebusની આ ખાસિયતને પાછળથી ઓળખ મળી હતી. નાની ઉંમરમાં તેને ગંભીર ન્યુમોનિયા થયો હતો અને સારવાર દરમિયાન તેને ઓક્સિજન સપોર્ટની જરૂર પડી હતી. બાદમાં તેની તબિયત સુધર્યા પછી કરવામાં આવેલા એક્સ-રે દરમિયાન તેના પંજાની અસામાન્ય રચના સ્પષ્ટ થઈ હતી. ત્યાર બાદ જ તેની વધારાની આંગળીઓ અંગે માલિકોને વધુ જાણકારી મળી.
આ સ્થિતિને તબીબી ભાષામાં Polydactyly કહેવામાં આવે છે. આ એક જન્મજાત આનુવંશિક સ્થિતિ છે, જેમાં પ્રાણીના પંજામાં સામાન્ય કરતાં વધુ આંગળીઓ વિકસે છે. Maine Coon જેવી કેટલીક બિલાડીની જાતિઓમાં આ લક્ષણ જોવા મળી શકે છે.
Erebusએ વર્ષોથી ચાલતા 28 toesના રેકોર્ડને પાછળ છોડીને પોતાની અલગ ઓળખ બનાવી છે. Guinness World Recordsના સત્તાવાર રેકોર્ડ મુજબ 13 મે 2026ના રોજ Erebus Anomalyએ આ સિદ્ધિ મેળવી હતી.
આજે Erebus માત્ર એક અનોખી બિલાડી નથી, પરંતુ તેની 29 આંગળીઓ તેને વિશ્વ રેકોર્ડ ધારક પણ બનાવે છે. તેની કહાનીમાં એક તરફ કુદરતની અજબ રચના જોવા મળે છે, તો બીજી તરફ ગંભીર બીમારીમાંથી સાજી થઈને રેકોર્ડ સુધી પહોંચવાની સફર પણ લોકોને આકર્ષે છે.
