સંસદના ચોમાસુ સત્રમાં આજે બે મહત્વના બિલ પસાર કર્યા તેમાં નેશનલ કો-ઓપરેટિવ ડેવલપમેન્ટ કોર્પોરેશન (અમેન્ડમેન્ટ) બિલ, 2026 અને કેરળ (અલ્ટરેશન ઑફ નેમ) બિલ, 2026નો સમાવેશ થાય છે. કેરળનું નામ બદલીને ‘કેરલમ’ કરવાની જોગવાઈ ધરાવતું બિલ ચર્ચા વિના વોઇસ વોટથી પસાર થયું હતું. ત્યારબાદ લોકસભાની કાર્યવાહી દિવસભર માટે સ્થગિત કરવામાં આવી હતી.
કેરળ નામ બદલવાના બિલનો હેતુ બંધારણની પ્રથમ અનુસૂચિમાં રાજ્યનું નામ ‘Kerala’ માંથી ‘Keralam’ કરવાનો છે. કેરળ વિધાનસભાએ જૂન 2024માં રાજ્યનું નામ બદલવા માટે ઠરાવ પસાર કર્યો હતો. કેન્દ્ર સરકારે ફેબ્રુઆરી 2026માં આ પ્રસ્તાવને મંજૂરી આપી હતી. બંધારણીય પ્રક્રિયા હેઠળ હવે સંસદમાં બિલ પસાર થવાથી નામ બદલવાની પ્રક્રિયામાં મહત્વપૂર્ણ તબક્કો પૂર્ણ થયો છે.
આ બિલ કેન્દ્રીય ગૃહમંત્રી અમિત શાહ દ્વારા રજૂ થવાનું હતું, પરંતુ તેઓ ગૃહમાં હાજર રહ્યા નહોતા. તેમના સ્થાને ગૃહ રાજ્યમંત્રી નિત્યાનંદ રાયે બિલ આગળ ધપાવ્યું હતું. વિપક્ષના હોબાળા વચ્ચે બિલ વોઇસ વોટથી પસાર થયું હતું.
બીજી તરફ, NCDC (Amendment) Bill, 2026નો હેતુ સહકારી ક્ષેત્ર માટે નાણાકીય સહાયની પ્રક્રિયાને વધુ સરળ અને વ્યાપક બનાવવાનો છે. પ્રસ્તાવિત ફેરફારો હેઠળ NCDC સહકારી મંડળીઓ તેમજ સહકારી વિકાસ સાથે સંકળાયેલી સંસ્થાઓને સીધી લોન અને ગ્રાન્ટ આપી શકશે. કોર્પોરેશનને સહકારી સંસ્થાઓ અથવા સહકારી વિકાસ સાથે જોડાયેલી સંસ્થાઓની શેર મૂડીમાં ભાગ લેવાની પણ સત્તા મળશે.
Reforms Bill, 2026 રાજ્યસભામાં પસાર કરવામાં આવ્યું હતું. આ બિલ ટ્રિબ્યુનલ્સની કામગીરી અને માળખામાં સુધારા સાથે સંબંધિત મહત્વપૂર્ણ જોગવાઈઓ ધરાવે છે.
સંસદમાં છેલ્લા કેટલાક દિવસોથી વિપક્ષના વિરોધને કારણે કાર્યવાહી વારંવાર ખોરવાઈ રહી છે. આજે પણ વિરોધ વચ્ચે લોકસભા અધ્યક્ષ ઓમ બિરલાએ વિરોધ સમાપ્ત કરવાની અપીલ કરી હતી. સરકાર તરફથી વિદ્યાર્થીઓના વિરોધ દરમિયાન થયેલી પોલીસ કાર્યવાહી અંગે ચર્ચા અને ગૃહમંત્રી અમિત શાહના નિવેદનની ઓફર છતાં વિપક્ષનો વિરોધ યથાવત રહ્યો હતો.
