રશિયાથી સસ્તું ક્રૂડ ખરીદીને ભારતે પોતાની ઊર્જા સુરક્ષા મજબૂત કરી છે, પરંતુ હવે આ જ સોદો નવી મુશ્કેલી ઊભી કરી શકે છે. અમેરિકી સેનેટે રશિયન ઊર્જા ખરીદતા દેશો સામે 100% સુધી વધારાનો ટેરિફ લાદવાની સત્તા રાષ્ટ્રપતિને આપતા બિલને મંજૂરી આપી હતી. ભારત આ બિલની સીધી અસર ભોગવી શકે તેવા મુખ્ય દેશોમાં શામેલ છે.
આ બિલ સેનેટમાં 86-11 મતથી પસાર થયું અને હવે તે અમેરિકી હાઉસ ઓફ રિપ્રેઝન્ટેટિવ્સમાં જશે. કાયદો બન્યા બાદ રશિયન તેલ-ગેસની ખરીદી ચાલુ રાખનારા મુખ્ય દેશો સામે 100% સુધીનો ટેરિફ લગાવવાની સત્તા અમેરિકી રાષ્ટ્રપતિને મળી શકે છે.
ભારત માટે મામલો ગંભીર છે કારણ કે રશિયા દેશનો સૌથી મોટો ક્રૂડ સપ્લાયર છે. ગ્લોબલ ટ્રેડ રિસર્ચ ઈનીશીયેટીવે (GTRI) અનુસાર, નાણાકીય વર્ષ 2026માં ભારતે કુલ 134.7 અબજ ડોલરનું ક્રૂડ આયાત કર્યું હતું, જેમાં રશિયાનો હિસ્સો 40.8 અબજ ડોલર એટલે કે 30.3% હતો.
ગ્લોબલ ટ્રેડ રિસર્ચ ઈનીશીયેટીવેGTRIનું કહેવું છે કે સસ્તા રશિયન ક્રૂડથી ભારતનું આયાત બિલ ઘટાડવામાં, ઊર્જા સુરક્ષા જાળવવામાં અને મોંઘવારીને કાબૂમાં રાખવામાં મદદ મળી છે. સંસ્થાના ફાઉન્ડર અજય શ્રીવાસ્તવના જણાવ્યા મુજબ ભારતે અમેરિકી ટેરિફની ધમકીના આધારે પોતાની ઊર્જા નીતિ નક્કી ન કરવી જોઈએ.
ભારત માટે હવે પડકાર માત્ર રશિયન તેલ ખરીદવાનો નથી, પરંતુ ઊર્જા સુરક્ષા, વધતી આયાત કિંમત અને અમેરિકા સાથેના વ્યૂહાત્મક સંબંધો વચ્ચે સંતુલન જાળવવાનો છે.
